“O Le Filifiliga o le Aso Sa,” Uo, Iulai 2024, 4–5.
O Le Filifiliga o le Aso Sa
“O le a le faamanatuga?” Sa fesili atu ai Anita.
O lenei tala na tupu i Iceland.
“Maualuga atu!” Sa fai atu ai Evolett i lana uo o Anita. Sa la vaaia le maualuga na mafai ai ona la feosofai i luga o le tapoleni a Evolett.
O le taimi lava lena, na oso maualuga ai Anita. Ina ua toe tulaueleele ona vae, sa faapea ona lele ai i luga Evolett! Sa taufai pauu i lalo teineiti uma e toalua i luga o le tapoleni. Sa la talie.
“E malie lenei mea,” o le tala lea a Anita. “E mafai foi ona ta taaalo taeao?”
Sa faapau atu Evolett i lona tua. “Ioe! Ou te fiafia i ai.”
“E mafai ona ta taaalo i le fale o lo’u tinamatua.” Sa nofo le tinamatua o Anita i ni nai fale e le mamao ese mai ia Evolett.
Ona manatua lea e Evolett o le aso na sosoo ai o le Aso Sa. Sa manao o ia e alu i le Peraimeri. O se mea malie le taaalo ma Anita, ae sa manao o ia e fai se filifiliga lelei.
“Ua ou manatuaina nei lava, e le mafai,” o le tala lea a Evolett. “Ou te faamalie atu. O le a ou alu i le lotu ma lo’u aiga taeao.
Sa tu i luga Anita ma toe oso. “Aisea?”
Sa amata foi ona osooso Evolett. “Ia, ou te fia mulimuli ia Iesu Keriso.” O lo’u aiga e o i le lotu i Aso Sa uma e aoao e uiga ia te Ia ma ai ma inu i le faamanatuga.”
“O le a le faamanatuga?” Sa fesili atu ai Anita.
“O le taimi lena matou te aai ai i se tamai falaoa ma inu se tamai ipu vai e manatua ai Iesu Keriso,” o le tala lea a Evolett. “Ona talanoa lea o tagata e uiga i le auala e fesoasoani ai Iesu ia i latou. Ma a mavae lena, e i ai se vasega faapitoa mo tamaiti!”
“E foliga malie lena mea!” Na fai atu ai Anita. “E mafai ona ou alu?”
“Ioe!” Sa ataata Evolett.
Sa tamoe Atu Anita i le fale e fesili i lona tina matua pe mafai ona la o i le lotu ma Evolett. O le taeao na sosoo ai, na piki ai e Evolett ma lona aiga ia Anita i lo latou ala.
Ina ua la taunuu i le lotu, sa faamatamata solo e Evolett Anita. Sa la faaali atu ia te ia le potu o le Peraimeri, faletaalo, ma le falesa.
Sa lei leva ae oo i le taimi o le faamanatuga. Sa nonofo faatasi Evolett ma Anita. Sa taumafai Evolett e mafaufau ia Iesu Keriso i le taimi o le faamanatuga. Ona latou faalogologo lea i lauga.
Ua oo i le taimi o le Peraimeri! Sa faailoa atu e Evolett ia Anita i nisi o ana uo.
“O la’u uo lenei o Anita,” o le tala lea a Evolett.
“Ua matou fiafia lava ua e sau i le asō. O a’u o Sister Magnusson,” o le tala lea a le faiaoga o le Peraimeri.
A o faalogologo Evolett ma Anita i le lesona e uiga ia Iesu Keriso, sa lagona e Evolett le fiafia i totonu. Sa fiafia o ia e i ai i le lotu ma Anita. Sa faliu mai o ia ma ataata atu ia Anita. Sa ataata mai foi lana uo.
“Faafetai mo le valaauliaina o a’u,” na fai atu ai Anita a o agai atu i le fale.
Sa fiafia Evolett e mafai ona ia mulimuli ia Iesu Keriso. Ma sa fiafia o ia ona sa manao foi Anita e aoao e uiga ia te Ia.
Sa malie le oso i luga o se tapoleni ma lele i le ea, ae o le lagona mafanafana na lagonaina e Evolett i totonu sa sili atu ona lelei.
Ata na tusia e Fiona Powers