“O Le Olioli i le Aoaoina,” Uo, Iulai 2024, 32–33.
Uo i le Uo
O Le Olioli i le Aoaoina
Mai se faatalanoaga ma Olivia Kitterman ma Noelle Lambert Barrus.
Ou te le’i lagonaina o a’u o se tagata aoga lelei ao o’u tuputupu a’e. Sa matua atamamai uma o’u tei. Sa lelei o latou togi. Sa latou aveina vasega sili ona faigata. Sa ou taumafai pea mo vasega sili ona faigata, ae e le’i taliaina lava a’u. Sa faigata tele le matematika. O lea sa ou mafaufau ai, “Ia, ou te matea ou te le poto.” Ou te le’i manatu e mafai ona suia lena mea.
Ona oo lea i se tasi tausaga sa i ai so’u faiaoga na tuuina mai ia te a’u le lagona mautinoa sa ou manaomia. Sa vaai lo’u faiaoga i le tele o taleni ia te a’u nai lo a’u. Sa ia fai mai, “Clark, e mafai ona avea oe ma se tagata aoga lelei. Tau lava o lou talitonu ia te oe lava.”
O lea sa ou taumafai ai pea. Sa ou suesue malosi. Sa ou galue foi ina ia sili atu ona maopopo mea uma. Sa ou aoao i le auala e siaki ai a’u meaaoga. O le tapeina o le TV na fesoasoani ia te a’u e taulai atu ai i a’u meaaoga. E le’i umi, ae avea a’u ma se tagata aoga lelei atu. Ma sa tuputupu a’e lo’u talitonuga.
Ina ua ou alu i la’u misiona, sa ou vaaia ou te le tau aoao na o a’u. Sa ou ole atu i le Tama Faalelagi mo le fesoasoani. Ma sa ou faalogo i le Agaga Paia. A o o’u galue malosi, sa mafai ona ou aoao atu ma fesoasoani i tagata. Ina ua ou sau i le fale mai la’u misiona, sa ou alu i le kolisi. Sa ou tatalo mo le fesoasoani a le Atua i vasega uma. Sa avea a’u ma se tagata aoga lelei atu ma amata ai foi ona ou fiafia i le matematika!
Sa ou manatu o le atamai o lona uiga ua tele mea ua e iloa ma sa faigofie le aoga. E le moni lena mea. Afai e te naunau e faaaofia le Alii i lou aoaoina ma galue malosi e faaleleia atili, ua e poto!
Afai e faigata mea i le taimi nei, ia manatua o oe o se atalii/afafine o le Atua. E i ai sou gafatia ofoofogia. E mafai ona e faia mea faigata. Tatou te faataitai pea. Ole atu i le Tama Faalelagi mo le fesoasoani. E finagalo o Ia ia e manuia. E mafai ona e faia lena mea!
Mea Malie i le Aoaoina
Saili mamanu taitasi o sapalai a le aoga i le kalava o loo i lalo. O a ni mea e te fiafia e aoao i le aoga?
Ata na tusia e Agnes Saccani