“Ua Toe Taumafai Raina,” Uo, Iulai 2024, 36–37.
Ua Toe Taumafai Raina
“O le taimi mulimuli lena o le a ou toe taumafai ai i se mea fou,” o le tala lea a Raina.
O lenei tala sa tupu i le ISA.
Sa toe faitau e Raina ia upu o loo i luga o le pepa i lana aoga. Tauvaga Tala: Manumalo i se malaga maua fua i le Aai o Niu Ioka!
Sa o se tauvaga mo tamaiti aoga i le tele o aoga i le eria. Sa mafaufau Raina ia te ia lava i le Aai o Niu Ioka, faatasi ai ma le mau fale tetele maualuluga na siomia ai o ia ma le Faatagata o Liperate na lata ane. Sa manao o ia e alu!
“E tatau ona e ulufale atu”, o le tala lea a Sydney. “O oe o le tusitala sili ona lelei i la tatou vasega!”
O upu a Sydney na maua ai e Raina se lagona lelei. Sa le’i tele ni mea na ia iloa e uiga i tusigā tala. Ae sa ia manao e taumafai.
Ina ua tuua le aoga, sa nofo Raina i lana kesi. Oomi, oomi, oomi. Sa ia ta ta lana penitala i luga o le pepa a o ia mafaufau e uiga i ona manatu. Mulimuli ane, sa amata ona ia tusitusi.
Sa alu ai se vaiaso atoa mo Raina e faamae’a ai. Ae faatasi ai ma sina fesoasoani mai ia Tina, sa iu ai ina ia lagona ua saunia e faaulu atu lana tala.
Na mavae ni nai vaiaso. Sa fiafia Raina e vaai po o ai na manumalo. Atonu o le a le pine ae agai atu o ia i Niu Ioka!
“E silia ma le selau tamaiti aoga na faaulu mai,” Na fai mai ai Mr. Wright mai luma o le potuaoga. “Faafetai atu ia te outou uma o e na tusia se tala.”
Sa ta ta vale le fatu o Raina i le fiafia.
“E ui e leai se tasi o a tatou tamaiti aoga na manumalo i le tauvaga, ae sa i ai Raina i le toalima pito i luga. Faamalo atu, Raina,” Sa fai atu ai Mr. Wright.
Sa ataata Raina a o patipati ana uo i le vasega. Ae o totonu sa le fiafia ai o ia. O le i ai i le pito i luga e lima sa le lelei e pei o le manumalo. O lana miti o le vaaia o Niu Ioka ua leai.
Ina ua taunuu Raina i le fale, sa ia faapa’u ifo i se nofoa i le umukuka e i autafa o ona matua. “Sa ou faiaina i le tauvaga,” o lana tala lea. “O le taimi mulimuli lena o le a ou toe taumafai ai i se mea fou. O le a ou faia le mea ou te iloa ou te lelei ai.” Sa ia kavaina lona ulu i ona lima.
“Ou te faamalie atu e te le’i manumalo. Ma te matuā mitamita lava ma Tina ia te oe ona o lou taumafai,” o le tala lea a Tama. Sa ia nofo i talaane o Raina. “E te manatua le taimi na ou le faigaluega ai i ni nai tausaga ua mavae?”
Sa luelue le ulu o Raina.
“Sa ou talosaga mo le tele o galuega ma sa le’i faamanuiaina a’u i se tasi o i latou,” o le tala lea a Tama. “Sa ou lagonaina le lotovaivai.”
Sa ea i luga le ulu o Raina. “E mo’i?”
Na luelue le ulu o Tamā. “Ae ou te le’i faavaivai ai. Ina ua mavae se taimi umi, sa ou maua se galuega sa atoatoa. Ae semanu e le tupu pe ana o’u le toe taumafai.
Sa tuu e Tina se lima faamafanafana i luga o le tua o Raina. “E te iloa pe fia ni tala ou te auina atu i mekasini eseese? sa ia fesili ai. “Ma e fia e teenaina? Ae e le mafai ona ou fiu pe afai ou te manao e vaai i la’u galuega o lolomiina. E taua le tusitusi ia te a’u, o lea ou te taumafai ai pea.
Sa manatu lava Raina e lelei ona matua i mea uma sa la faia. Na te le’i iloaina foi na teena i la’ua.
Sa faanoanoa pea o ia, ae sa foliga le atamai le le toe taumafai i se mea fou. E le o le mea lena na finagalo ai le Tama Faalelagi mo ia. Sa tonu ia Raina o le a le fiu o ia. Sa mafai ona ia taumafaia nisi mea, e oo lava i mea na te le’i faia i le taimi lava lena.
“Ou te manatu o le a ou toe ulufale atu i le tauvaga i le tausaga a sau,” o le tala lea a Raina. O le faia’ina i le tauvaga e le faapea o le mutaaga lea o ana miti.
Sa alu Raina i lana kesi ma piki i luga lana penitala. Sa manaia lava le tusitusi. Oomi, oomi, oomi. O le a la le isi mea fou e mafai ona ia tusia?
Ata na tusia e Viviana Mineker