“O Le Fale Faatinoina ai Tala o Tusitusiga Paia,” Uo, Iulai 2024, 14–15.
O Le FaleFaatinoina ai Tala o Tusitusiga Paia
“Aea pe a tatou tuua i fafo le pusa taaloga mo Aso Sa?” Sa fesili atu ai Jonny.
O lenei tala sa tupu i le ISA.
“Ua ou leiloa se mea a fai.” Sa taoto Jonny i luga o le fola o le potu malolo.
Sa sioa atu lona tuafafine o Jenna i fafo o le faamalama. “E leai se mea e fai,” o lana tala lea.
Sa tilotilo atu i luga Jonny i le faalo. Aisea na lagona ai e pei o Aso Sa sa le o se mea malie?
Ona ia mafaufau ai lea i se mea, “Aea pe a tatou tuua i fafo le pusa o taaloga mo Aso Sa?” Sa fesili atu ai Jonny. O le pusa o taaloga mo Aso Sa o se pusa faapitoa e tumu i taaloga e taaalo ai i le Aso Sa.
Sa mumu foliga o Jenna ma se ataata. “Ia, manaia lena.”
Sa faanatinati atu Jonny ma Jenna i le potu o Tina. Sa la tosoa maia le pusa tele i totonu o le potu malolo.
“O le a se mea e tatau ona ta faia muamua?” Sa fesili atu ai Jonny. Sa ia tatalaina le pusa ma toso mai i fafo ni tusi ata ma se taaloga kata.
“Ta taaalo i le taaloga faafetaui o toa o tusitusiga paia,” o le tala lea a Jenna.
O le taaloga sa i ai kata e i ai ata o perofeta o le Tusi a Mamona. Sa faataatitia e Jenna ia kata e faafao i luga o le fola. Sa la feauauai i le pikiina o kata ma taumafai e sue ia kata e fetaui i ai.
Sa piki i luga e Jonny ni kata eseese se lua o Kapeteni Moronae o loo iai. “Ua ou mauaina se fetauiga!” sa ia ee atu ai.
“Ma a’u foi!” Sa uu i luga e Jenna ni kata se lua e faaali atu ai ia Sarai.
Sa taaalo Jonny ma Jenna i ni nai isi taamilosaga. Sa manaia le mafaufau e uiga i a la tala e fiafia i ai mai le Tusi a Mamona.
Ina ua mavae sina taimi sa fai mai Jenna, “Ta faia se isi mea.”
“Ua lelei. Sei o ta faatinoina se tasi o tala mai tusitusiga paia ta te fiafia i ai. O le a ta faia se fale faatinoina ai tala o tusitusiga!” Sa amata ona piki i luga e Jonny ia kata.
“Ioe!” Sa fesoasoani Jenna e ao mai le taaloga ma tuu ese.
Sa eli e Jonny i totonu o le pusa seia oo ina ia maua nisi o toniga. Sa ia aveina i fafo se ofu talaloa lanu enaena mamoe ma faamaulu. “O a’u o Samuelu le sa Lamana!” Sa ia oso i luga o se nofoa ma faatino e pei o Samuelu, ma aoao atu i luga o le puipui o le aai.
Sa tatala e Jenna le tusi ata o le Tusi a Mamona. Sa ia saili i itulau seia oo ina taunuu atu o ia ia Samuelu le sa Lamana. Sa ia faitauina leotele a o faatino e Jonny le tala.
Sa faataitai e tamaiti le tala i ni nai taimi. Sa lagonaina e Jonny le mafanafana ma le fiafia i totonu. Sa manaia le lagona o le manatuaina o perofeta o e na aoao mai e uiga ia Iesu Keriso.
Ina ua la lagona ua saunia, sa tamoe Jonny ma aumaia Tina, Tama, ma lo la tuafafine laitiiti, o Makenna. “O mai e vaai i la ma tala faatino!”
Sa tu Jenna i le ogatotonu o le potu ma sa faaloloa solo ona lima. “Susu maia i la ma fale faatino ai tala o tusitusiga paia. O le asō o le a ma tuuina atu ai le tala ia . . . Samuelu le sa Lamana!”
Ona ia amataina lea o le tala. “I aso lava la ua leva, na sau ai se perofeta e igoa ia Samuelu e aoao sa Nifae . . .”
Ina ua oo i le vaega a Jonny, sa tu sa’o o ia i luga o le nofoa. Sa ia tautala atu ma le leotele. “O a’u o Samuelu, ma e finagalo le Tama Faalelagi ia tou faia ni filifiliga lelei. Taofi le faia o mea sese. Aua i le lima tausaga o le a soifua mai ai Iesu Keriso.”
“Sa i ai le mana o le Atua ia Samuelu,” o le tala lea a Jenna. Sa uma ona ia faamatalaina le vaega o totoe o le tala. Ina ua mae’a, sa patipati Tina, Tama, ma Makenna.
“Matuai manaia tele !” Na fai atu ai Tina.
Sa ifo ia Jonny ma Jenna. Sa la fiafia tele.
“Ta faia se isi tala,” o le tala lea a Jonny.
“Matou te fiafia e matamata i se isi tala,” o le tala lea a Tina. Sa patipati ma ataata Makenna.
Sa toe taufetuli atu Jenna ma Jonny i le pusa o taaloga mo Aso Sa ina ia maua nisi toniga.
“E malie le Aso Sa! Ou te fiafia e aoao e uiga i tusitusiga paia,” o le tala lea a Jenna.
“Ma Iesu.” Sa ataata Jonny a o ia mauaina se isi toniga. O le Aso Sa o se aso faapitoa!
Ata na tusia e Shawna J. C. Tenney