“O Pāpā Lapopoa ma Lanu Sesega,” Uo, Iulai 2024, 10–11.
O Pāpā Lapopoa ma Lanu Sesega
“Aisea e le aveesea ai e le Tama Faalelagi leo tetele?” Sa fesili atu ai Charlotte.
O lenei tala sa tupu i le ISA.
Sa inoino Charlotte i leo leotele! Sa le‘i fiafia o ia i le auala e tatavale ai leo i ona taliga pe faasi’uleo foi i lona ulu. E ui lava ina sa ia iloaina sa saogalemu o ia, ae sa ia lagona pea le popole pe a faaee taavale, alalaga le motu o tagata, po o le pao o tigipalau.
Ma sa le‘i fiafia tele Charlotte i ni faapāpā!
Sa taumafai e lona aiga le tele o mea e faamafanafana ai o ia pe a i ai ni leo leotetele. Sa faatau mai e Tama ana pupuni taliga faapitoa e fesoasoani ai e poloka le pisapisao. Ina ua i ai le faititili, sa faapupuu faatasi Tina ma ia i lalo o ieafu. Sa tatalo foi Charlotte mo se fesoasoani ia ‘aua nei fefe.
Sa fesoasoani nei mea uma. Ae o leo leotele sa ia lagona ai le fefe.
“O le a matou o i se faaaliga faapitoa o mea faapāpā i le paka i le po nei,” na fai atu ai Tina ia Charlotte. “E te fia alu?”
Sa faauu Charlotte. “Ae o mea faapāpā e matua leotele lava.”
“O lea la ua e matua, atonu o le a sili atu ona manaia le matamata i mea faapāpā,” o le tala lea a Tina. “O le a i ai uma au uo iina. E mafai foi ona tatou avea au pupuni taliga faapitoa. E te manatu e mafai ona e faataitaia?”
Sa mapuea Charlotte. “Ia ua lelei. Ou te matea o le a ou taumafai.”
O le faaaliga o mea faapāpā i le paka na amata lelei lava. Sa taufetuli solo Charlotte ma ana uo i luga o le mutia, ma faasoa atu ni meaai mama ma taaalo i taaloga. E le‘i umi ae pogisa le lagi. Sa nofo i lalo Charlotte ma toso i luga ona pupuni taliga a o ia tilotilo atu ma le popole i le lagi.
PA! PA! PA!
Sa televave le tata o le fatu o Charlotte, ma sa lagona le fufusi o lona fatafata. Sa oso o ia i luga ma taumafai e aluese mai le pāpāaga o loo siomia ai o ia.
Sa tamoe atu Tina e tuliloa Charlotte ma sii o ia i luga. Sa la toe saofafai i lalo, ma sa fusi faalatalata mai o ia e Tina. Na tafe ifo loimata mai foliga o Charlotte.
“Ou te faamalie atu sa faafefeina oe” o le tala lea a Tina. “lea ou te iai iinei. Sei o ta taulai atu i lanu ina ia ‘aua nei e mafaufau ai i leo. O le a se mea o vaaia i ou mata?”
Sa manava umi Charlotte. “Ua ou vaai i le auro, ma le lanu mumu, ma le lanumeamata.”
“Ia faaaoga nei loa lou isu,” o le tala lea a Tina. “O le a le mea o e sosogi iai?”
“E mafai ona ou sosogi i le asu ma le mutia,” o le tala lea a Charlotte. “Ma le popcorn!”
“O a isi sane e mafai ona e faaaogaina i le taimi nei?”
Sa moeiini mata o Charlotte. “Sa ou lagonaina i latou. Pe a pa mea faapāpā, e mafai ona ou lagonaina le gatete i lo’u fatafata.”
“E mafai ona e tofo i se mea?” O le fesili lea a Tinā.
Sa tuu mai i fafo e Charlotte lona laulaufaiva. “e le mafai ona ou tofoina mea faapāpā.” Sa ata o ia.
O nei mea uma na avea ai Charlotte ma se tagata suesue. E faapefea ona faia e tagata ia lanu eseese? sa ia tomanatu ai. Aisea e pa ai mea faapāpā? E faapefea ona latou faia ni siepi eseese? E le‘i foliga taufaafefe nei ia mea faapāpā.
“Tina, e ofoofogia mea faapāpā!” o le tala lea a Charlotte.
A o tuu e Tina ia Charlotte i le moega i lena po, sa fesili Charlotte, “Aisea e le tali mai ai le Tama Faalelagi i a‘u tatalo pe a ou ole atu ia te Ia e aveese ia leo leotele?”
Sa mafaufau Tina mo sina taimi. “E le aveesea i taimi uma e le Tama Faalelagi mea taufaafefe,” o lana tala lea. “Ae o nisi taimi e fesoasoani mai o Ia ia tatou vaai i mea i se auala ese pe tuuina mai ia i tatou ni tagata e fesoasoani e faamafanafana i tatou.”
“E pei o le auala na Ia fesoasoani ai ia te a‘u i le po nei!” o le tala lea a Charlotte.
“E sa’o lena!” Na ataata Tinā. “Sa e alu i le faaaliga mea faapāpā e ui lava ina sa e fefe. Ona fesoasoani lea o le Tama Faalelagi ia te oe e faatoafilemu ou popolega. Sa ia fesoasoani foi ia te oe e vaai i le matagofie o mea faapāpā e ala i le faaaogaina o isi ou sane.
Sa mafaufau Charlotte i lanu sesega i le lagi ma ataata. Sa le‘i fiafia lava o ia i ni leo leotele. Sa taufaafefe pea ia te ia. Ae sa ia iloa e mafai lava e le Tama Faalelagi ona fesoasoani ia te ia ia lototele.
Ata na tusia e Adam Howling