“O Se Talanoaga ma Alan e uiga i Mataupu Faavae o le Faatuatua,” Uo, Iulai 2024, 40–41.
O Se Talanoaga ma Alan e uiga i Mataupu Faavae o le Faatuatua
O Alan e sau mai Málaga, i Sepania. Sa matou fesili atu ia te ia ni fesili e uiga i le auala na ia aoaoina ai Mataupu Faavae o le Faatuatua.
Ta’u mai ia i matou e uiga ia te oe lava ia.
E valu o’u tausaga. Pe a ou matua, ou te manao e avea ma se saienitisi ta’uta’ua. O le lanu e sili ona ou fiafia i ai o le lanumoli, ma o le meaai e sili ona ou fiafia i ai o le totila de patatas (omelete faaSipaniolo) e fai e lo’u tinamatua.
Na faapefea ona e aoaoina Mataupu Faavae o le Faatuatua?
Sa amata ona ou aoaoina i latou i le Peraimeri. Sa matou usuina ni pese e fesoasoani ia i matou e taulotoina ai. O nisi taimi e tusi ai e o matou faiaoga i luga o le laupapa ma tapeese nisi o upu. Sa matou tusia foi ni ata e faamalamalama ai uiga o Mataupu Faavae o le Faatuatua taitasi.
Sa ou faataitaia foi le fai atu o mataupu faavae o le faatuatua i lo’u aiga i totonu o le taavale a o agai atu i le aoga. O loo ou fesoasoani i lo’u tuafafine laitiiti, o Maia, e aoao foi i latou. Ua ia iloa le ono muamua!
O le a le Mataupu Faavae o le Faatuatua e sili ona e fiafia i ai?
Ou te fiafia i le numera iva. “Matou te talitonu i mea uma na faaali mai e le Atua, mea uma ua ia faaali mai nei, ma matou te talitonu foi o le a ia faaali mai le tele o mea silisili ma le tāua tau i le Malo o le Atua i le lumanai.” O loo aoao mai ai e tele atu mea a le Tama Faalelagi mo i tatou e aoao ai i lea mea itiiti ma lea mea itiiti.
Na faapefea e le aoaoina o Mataupu Faavae o le Faatuatua ona fesoasoani ia te oe?
I se tasi aso i le aoga, sa fesili mai ai la’u uo o Sofia ia te a’u po o le a lo’u talitonuga ma pe ou te auai i se lotu. Sa ou manatua le Mataupu Faavae o le Faatuatua muamua, o loo faapea mai “Matou te talitonu i le Atua, le Tamā Faavavau, ma Lona Alo, o Iesu Keriso, ma le Agaga Paia.” O lea sa ou faasoa atu ai lena mea ia te ia.
Sa ou ta’u atu foi ia te ia, o a’u o se tagata Kerisiano ma o a’u o se tagata O Le Ekalesia a Iesu Keriso o le Au Paia o Aso e Gata Ai. Sa faalogo o ia ia te a’u ma malamalama i mea sa ou faasoa atu ia te ia.
O a ni ou lagona na maua i lena aafiaga?
Sa ou lagona le fiafia tele aua sa ou iloaina sa ou lototele e faasoa atu o’u talitonuga i la’u uo. Ona o lo’u galue malosi e aoao Mataupu Faavae o le Faatuatua, sa mafai ai ona ou faasoa atu le talalelei ma iloa le tala e fai atu.
O Ata na tusia e Toby Newsome