« Te mā’itira’a i te sābati », Hoa, Tiurai 2024, 4–5.
Te mā’itira’a i te sābati
« ʼE aha te ʼōroʼa mo’a ? », ui mai ra Anita.
’Ua tupu teie ’ā’amu i ’Itirane.
« I ni’a roa atu ā ! », parau atu ra Evolett i tōna hoa ia Anita. Tē ’ite ra rāua i te teiteira’a e roa’ahia ia rāua, ’ia ’ōu’a i ni’a i te ’öu’ou’ara’a rereata o Evolett.
I reira iho, ’ua ’ōu’a Anita i ni’a roa atu. I te topa-fa’ahou-ra’a mai tōna ’āvae i raro, pe’e a’era Evolett i ni’a ! Perehū ihora nā tamāhine i ni’a i te ’öu’ou’ara’a rereata. Pahō a’era tā rāua ’ata.
« ’Auē te ’ārearea ē », parau a’era Anita. « E nehenehe ānei tāua e ha’uti fa’ahou ananahi ? »
Topa a’era Evolett i ni’a tōna tua. « ’Ē ïa !. « E ’oa’oa roa ïa vau ! »
« E nehenehe tāua e ha’uti i te fare o tō’u māmā’ū ». Tē ora ra te māmā’ū o Anita tau fare ri’i noa i te fare o Evolett.
I muri iho, ha’amana’o a’era Evolett ē, e sābati ananahi a’e. ’Ua hina’aro ’oia e haere i te Paraimere. E mea ’ārearea ihoā ïa ’ia ha’uti nā muri ia Anita, ’ua hina’aro rā ’oia e rave i te hō’ē mā’itira’a maita’i.
Parau atura Evolett, « nō ha’amana’o noa iho nei au ē, e’ita tā’u e nehenehe ». « ’Eiaha e ’ino’ino mai. ’Ananahi, e haere au i te purera’a ’e tō’u ’utuāfare ».
Ti’a a’era Anita ’e ’ōu’a fa’ahou ihora. « Nō te aha ? »
Ha’amata a’era Evolett i te ’ōu’a ato’a. « Nō te mea, tē hina’aro nei au e pe’e ia Iesu Mesia. E haere tō’u ’utuāfare i te purera’a i te mau sābati ato’a nō te ’apo mai nō ni’a iāna ’e nō te rave i te ’ōro’a mo’a ».
« ʼE aha te ʼōroʼa mo’a ? », ui mai ra Anita.
Nā ’ō atu ra Evolett, « i te reira taime mātou e ’amu ai i te hō’ē faraoa iti ’e e inu ai i te hō’ē hāpaina iti pape, nō te ha’amana’o ia Iesu Mesia ». « I muri iho e paraparau mai te mau ta’ata e mea nāhea Iesu i te tauturura’a ia rātou.« »« ’E i muri mai, tē vai ra hō’ē piha ha’api’ira’a ta’a ’ē nā te mau tamari’i ! »
« E au ra ē, mea ’ārearea ! », parau mai ra Anita. « E nehenehe au e haere mai ? »
« ’Oia mau ! » ’Ata’ata ihora Evolett.
’Ua horo atu Anita i tōna fare nō te ani i tōna māmā’ū, e nehenehe ānei ’oia e haere i te purera’a nā muri ia Evolett. A po’ipo’i a’e, ’ua rave mai Evolett ’e tōna ’utuāfare ia Anita i ni’a te purūmu.
I tō rātou taera’a i te fare purera’a, ’ua fa’a’ite’ite atu Evolett ia Anita te mau vāhi ato’a i reira. ’Ua fa’a’ite atu Evolett iāna te piha Paraimere, te vāhi fa’a’eta’etara’a tino ’e te fare purera’a.
’Aita i maoro roa, ’o te taime ïa nō te purera’a ’ōro’a. ’Ua pārahi atu Evolett i pīha’i ia Anita. ’Ua tāmata Evolett i te ha’amana’o ia Iesu Mesia i te taime nō te ’ōro’a mo’a. I muri iho, ’ua fa’aro’o atu rāua i te mau a’ora’a.
I te hope’a, tae mai nei te taime nō te Paraimere ! ’Ua fa’a’ite atu Evolett ia Anita i te tahi o tōna mau hoa.
« Teie tō’u hoa ’o Anita », ’ua parau Evolett.
« Tē ’oa’oa nei mātou i tō ’oe haerera’a mai i teie mahana. ’O te tuahine Magnusson tō’u i’oa », ’ua parau te ’orometua ha’api’i o te Paraimere.
’A fa’aro’o noa ai Evolett ’e ’o Anita i te ha’api’ira’a nō ni’a ia Iesu Mesia, ’ua putapū Evolett i te ’oa’oa. Mea au roa nāna ’ia pārahi mai i te purera’a ’e ’o Anita. Fāriu atu ra ’oia ’e ’ua ’ata’ata ia Anita. ’Ua nā reira ato’a mai Anita.
« Māuruuru i tō ’oe ani-manihini-ra’a mai iā’u », ’ua parau Anita i te taime ho’ira’a fare.
’Ua ’oa’oa roa Evolett i te pe’era’a ia Iesu Mesia. ’Ua ’oa’oa ato’a ’oia nō te hina’aro o Anita ’ia ha’api’i mai nō ni’a ia Iesu Mesia.
E mea ’ārearea ’ia ’ōu’a i ni’a i te ’öu’ou’ara’a rereata ’e ’ia rere nā roto i te aore, ’āre’a rā te mahanahana tā Evolett i putapū i roto iāna e mea maita’i roa a’e.
Fa’ahōho’ara’a nā Fiona Powers