« Haerera’a e fārerei ia māmā rū’au ’e ’ia pāpā rū’au », Hoa, Tiurai 2024, 30–31.
Haerera’a e fārerei ia māmā rū’au ’e ia pāpā rū’au
’Ua hina’aro Ernesto e fa’a’ite i te mea tāna i ha’api’i mai i te Paraimere.
’Ua tupu teie ’ā’amu i Inidonesia.
’Ua tu’u Ernesto i te hō’ē atu ’ahu tāne i roto i tāna pūtē. ’Ua hi’o atu ’oia nā roto i te piha. E aha atu ā te mea tāna e nehenehe e rave ? ’Ua ’ite atu ’oia i tāna Buka a Moromona i ni’a i te ’amura’a mā’a. ’Aita e ti’a iāna ’ia ha’amo’e i te reira !
E tau fa’afa’aeara’a teie nō te pu’e tau māhanahana. Tē haere ra te ’utuāfare o Ernesto e fārerei ia māmā rū’au ’e ia pāpā rū’au. ’Ua ’oa’oa roa ’oia ’ia haere e hi’o i tōna nā metua tupuna.
I te taera’a atu Ernesto ’e tōna ’utuāfare, ’ua tauahi maita’i pāpā rū’au iāna. « ’Ua ’oa’oa roa vau tei i’ō nei ’oe ! »
« ’Ua mihi noa māua ia ’oe ! » ’Ua ’ata’ata māmā rū’au ’e ’ua tauahi ato’a mai ia Ernesto.
« ’Ua tīa’i noa ’e ’ua tīa’i noa vau i teie mahana. Mea au nā mātou e haere mai e fārerei », ’ua parau Ernesto.
« E haere ana’e i roto », ’ua parau pāpā rū’au. « E haere māmā rū’au e hāmani i tā ’oe mā’a au roa a’e ».
’Ua tomo atu Ernesto i roto i te fare ’e ’o māmā rū’au ’e ’o pāpā rū’au. ’Ua ’oa’oa roa ’oia ’ia fa’aea mai i pīha’i iho ia rāua.
I te po’ipo’i a’e, ’ua ara mai Ernesto ma te hau’a i te raiti e tunuhia ra. ’Ua ’ite atu ’oia ia māmā ’e ia māmā rū’au e ha’a ra i roto i te piha tūtu. ’Ua ’āpā ’oia ia rāua to’opiti i ni’a i te pāpāri’a. I muri iho, ’ua horo atu ’oia i roto i te ’āua.
Tē pārahirahi ra pāpā ’e ’o pāpā rū’au i rāpae ’e ’a paraparau noa ai, ma te inuinu i roto i te ’āu’a.
« ’Ia ora na. E hina’aro ānei ’oe i te tahi tī ? » ’Ua toro mai pāpā rū’au i tāna ’āu’a ia Ernesto ra.
’Ua hi’o atu Ernesto i te ’āu’a tī ’e i muri iho ia pāpā rū’au. ’Ua hina’aro ’oia e fa’a’ite atu i te mea tāna i ha’api’i mai i te Paraimere. « ’Aita, māuruuru, pāpā rū’au », tāna ïa i parau. « ’Ua ha’api’i mai au i roto i tā’u ’Ēkālesia ē, e ’ere te tī, te taofe ’e te ’ava’ava i te mea maita’i nō tō tātou tino. Tē hina’aro nei au e pe’e i te mea tā Iesu e hina’aro ’ia rave au ».
’Ua ’ata’ata pāpā. « Tē ha’apa’o nei tō mātou ’utuāfare i te parau pa’ari, e mea ta’a ’ē rā tā pāpā rū’au ti’aturira’a, ’aita ra e fifi ».
« Māuruuru nō tō ’oe fa’a’itera’a mai i te mea tā ’oe e ti’aturi nei », ’ua parau pāpā rū’au ia Ernesto. « E tamaiti maita’i roa ’oe. E nehenehe ’oe e fāri’i i te pape ve’ave’a mai tō ’oe pāpā ». ’Ua māni’i mai pāpā rū’au i te hō’ē ’āu’a pape nā Ernesto mai roto mai i te tītata.
’Ua inu Ernesto ma’a vāhi iti. ’Ua ’oa’oa ’oia i roto iāna nō tōna mā’itira’a i te maita’i.
I te tāmā’ara’a avatea, ’ua ’amu Ernesto i tāna mā’a au roa a’e. ’Ua hāmani māmā rū’au i te nasi goreng, e mā’a tei roto te raiti, te huero mo’a, te i’o pua’a ’e te pota. E mea monamona mau. ’E ’ua au roa Ernesto i te paraparaura’a ia māmā rū’au ’e ia pāpā rū’au, ’a tāmā’a noa ai rātou.
I te avatea, ’ua ha’uti ’āmui te ’utuāfare i te perē tāpuni. ’Ua ha’uti ato’a ’o pāpā rū’au ’e ’o māmā rū’au !
« Tē ’ite ra vau ia ’oe i muri i terā tumu rā’au, Ernesto ! » ’Ua tuō atu pāpā, ma te tāpapa iāna. ’Ua ’ata Ernesto ’a tāmata ai ’oia i te horo ’ē. E mea ’ārearea roa te ha’utira’a ’e tōna ’utuāfare.
I terā pō, ’ua pārahi hā’ati te mau ta’ata ia pāpā rū’au, ’a fa’ati’a ai ’oia i te tahi mau ’ā’amu. I te fa’aotira’a pāpā rū’au, ’ua ha’amana’o a’era Ernesto ē, ’aita rātou i tai’o i te mau pāpa’ira’a mo’a.
’Ōu’a a’era Ernesto i ni’a. « E ho’i fa’ahou mai ā vau ».
’Ua horo atu ’oia ’e ’ua rave mai i tāna Buka a Moromona. I tōna ho’ira’a mai, ’ua ui a’era ’oia, « e nehenehe ānei tātou e tai’o ? »
« Tē ’oa’oa nei au ē, ’ua ha’amana’o ’oe ». ’Ua rave mai māmā i te buka i te rima o Ernesto ’e ’ua huri i ni’a i tāna ’īrava au roa a’e. ’Ua tai’o pūai atu ’oia i te reira. I muri iho, ’ua tūturi rātou pā’āto’a i raro.
« E hina’aro ānei ’ōrua e pure ’e ’o mātou ? » ’Ua ui atu Ernesto i tōna nā metua rū’au.
« ’Ē, e mea maita’i roa te reira », ’ua parau māmā rū’au. ’Ua tūturi atu ’oia i pīha’i iho ia pāpā rū’au.
’Ua fa’ahiti pāpā i te pure. ’Ua ha’amāuruuru ’oia i te Metua i te ao ra, ’ua ti’a ia mātou ’ia ’āmui mai ’ei ’utuāfare.
I muri a’e i te pure, ’ua ’āpā pāpā rū’au ia Ernesto. « E mea maita’i roa ’ia pure tō ’oe ’utuāfare », tāna ïa i parau. « Tē ’oa’oa nei au i te mea ē, tē hina’aro nei ’oe ’ia ha’afātata atu i te Atua. E tauturu te reira i tō ’oe ’utuāfare ’ia vai pūai noa ».
’Ua tupu te māhanahana ’e te hau i roto ia Ernesto. Mea au roa nāna e fa’a’ite i tōna mau ti’aturira’a—te hō’ē mea tāna i here—ia māmā rū’au ’e ia pāpā rū’au—nā ta’ata tāna i here mau.
Faʼahōho’araʼa nā Melissa Manwill Kashiwagi