« ’Ua tāmata fa’ahou Raina », Hoa, Tiurai 2024, 36–37.
’Ua tāmata fa’ahou Raina
« ’O te taime hope’a teie e tāmata fa’ahou ai au i te hō’ē mea ’āpī », te parau ïa a Raina.
’Ua tupu teie ’ā’amu i te fenua Marite.
’Ua tai’o fa’ahou Raina i te mau parau i ni’a i te parau pia o tāna fare ha’api’ira’a. Tata’ura’a parau pāpa’i : E rē i te hō’ē tere tāmoni ’ore i te ’oire nō New York !
E tata’ura’a teie tei fa’ata’ahia nō te mau pīahi i roto e rave rahi fare ha’api’ira’a i taua vāhi ra. Tē ’ite ra Raina iāna iho i te ’oire nō New York, ’e te mau fare teitei ’ati a’e iāna ’e te ti’i nō te ti’amāra’a e ’ere i mea ātea roa. ’Ua hina’aro ’oia e haere !
« E ti’a ia ’oe ’ia haere i roto », tē parau ra Sydney. « ’O ’oe te ta’ata pāpa’i maita’i roa a’e i roto i tā tātou piha ! »
’Ua fa’atupu te mau parau a Sydney i te mana’o maita’i i roto ia Raina. ’Aita ’oia i ’ite rahi roa nō ni’a i te pāpa’ira’a i te mau parau. ’Ua hina’aro rā ’oia e tāmata.
I muri a’e i te ha’api’ira’a, ’ua pārahi atu Raina i tāna ’iri ’ohipara’a. Tap, tap, tap. ’Ua tūpa’ipa’i ’oia i tāna pēnitara i ni’a i te ’api parau, ma te feruri i tōna mau mana’o. I te pae hope’a, ’ua ha’amata ’oia i te pāpa’i.
’Ua tītauhia ia Raima e hō’ē hepetoma tā’āto’a nō te fa’aoti. Nā roto rā i te tahi tauturu a māmā, ’ua ’ite a’era ’oia ’ua ineine ’oia nō te fa’aho’i i tāna pāpa’ira’a.
’Ua ma’iri te tahi tau hepetoma. ’Ua hina’aro rahi roa Raina e ’ite ’o vai tei haru i te rē. Penei a’e ’aita e maoro roa e tere atu ’oia i New York !
« ’Ua hau i te hānere pīahi tei tāpa’o ia rātou », tē parau ra Wright tāne nā mua mai i te piha ha’api’ira’a. « Māuruuru i te feiā ato’a tei pāpa’i i te hō’ē parau pāpa’i ».
’Ua tūpa’ipa’i te māfatu ’o Raina ma te pūai.
« Noa atu ’aita te hō’ē o tā tātou mau pīahi i upo’oti’a i te tata’ura’a, tei roto Raina i nā ti’ara’a mātāmua e pae o te mau ta’ata i tāpa’o ia rātou. Ha’apoupou tātou ia Raina », ’ua parau Wright tāne.
’Ua ’ata’ata Raina ’a pōpō noa ai tōna mau hoa ha’api’ira’a iāna. I roto rā iāna, tē tu’atu’a ra ïa ’oia te mata. Te ti’ara’a i roto i nā ta’ata mātāmua e pae e ’ere ïa i te mea maita’i i te harura’a mai i te rē. ’Ua pe’e ’ē tāna moemoeā ’ia ’ite ia New York.
I te taera’a Raina i te fare, ’ua perehu atu ’oia i ni’a i te hō’ē pārahira’a i roto i te piha tūtu, i pīha’i iho i tōna nā metua. « ’Aita vau i upo’oti’a i te tata’ura’a », tāna ïa parau. « ’O te taime hope’a teie e tāmata fa’ahou ai au i te hō’ē mea ’āpī. E rave noa vau i te mea tā’u i ’ite e mea maita’i au i reira ». ’Ua tāpo’i atu ’oia i tōna upo’o i tōna nā rima.
« Tē pe’ape’a nei au ē, ’aita ’oe i haru i te rē. Tē ha’apeu nei māua ’o māmā nō tō ’oe tāmatara’a » te parau ïa a pāpā. Pārahi atu ra ’oia i pīha’i iho ia Raina. « Tē ha’amana’o ra ’oe i te taime ’aita tā’u e ’ohipa e tau matahiti i ma’iri a’enei ? »
Tū’au a’era Raina i te upo’o.
« ’Ua tāpa’o vau iā’u i roto i te mau ’ohipa e rave rahi ’e ’aita vau i tihepuhia i roto i te hō’ē noa a’e o te reira », ’ua parau pāpā. « ’Ua tupu mai te mana’o paruparu rahi i roto iā’u ».
Ti’a mai ra te upo’o ’o Raina. « E parau mau ? »
’Ua tū’au pāpā i te upo’o. « ’Aita rā vau i fa’aru’e. I muri mai i te hō’ē tau roa, ’ua ’itehia iā’u te hō’ē ’ohipa maita’i roa a’e. E’ita rā te reira e tupu ’āhiri vau i fa’aea i te tāmata noa ».
Tu’u mai ra māmā i te hō’ē rima tāmāhanahana i ni’a i te tua o Raina. « ’Ua ’ite ānei ’oe e hia ’ā’amu tā’u i hāpono atu i te mau ve’a rau ? », ’ua ui atu ’oia. « ’E e hia rahira’a tei pāto’ihia ? E’ita rā tā’u e nehenehe e fa’aru’e, mai te mea e hina’aro vau ’ia piahia i tā’u ’ohipa. E mea faufa’a roa nō’u te pāpa’ira’a, nō reira e tāmau noa vau i te tāmata ».
’Ua mana’o noa Raina ē, e mea maita’i roa tōna nā metua i roto i te mau mea ato’a tā rāua e rave nei. ’Aita roa atu ’oia i ’ite ē, ’ua pāto’i-ato’a-hia rāua.
Tē ’oto noa ra ’oia, terā rā e au ra iāna ē, e mea ma’ama’a ’eiaha roa atu e tāmata fa’ahou i te hō’ē mea ’āpī. E ’ere te reira tā te Metua i te ao ra e hina’aro nōna. ’Ua fa’aoti Raina e’ita e fa’aru’e. E nehenehe ’oia e tāmata e rave rahi ’ohipa, ’oia ato’a te mau mea tāna i ’ore i rave maita’i i terā iho taime.
« Tē mana’o nei au ē, e fa’aō fa’ahou iā’u i roto i te tata’ura’a i te matahiti i muri nei », ’ua parau Raina. ’Eiaha te ’orera’a i upo’oti’a e riro ’ei hope’a nō tōna mau moemoeā.
’Ua haere atu Raina i tāna ’iri ’ohipara’a ’e ’ua rave mai i tāna pēnitara. E mea ’ārearea roa te pāpa’ira’a i te parau. Tap, tap, tap. Nō reira, e aha te mea ’āpī tāna e nehenehe e pāpa’i i muri iho ?
Fa’ahōho’ara’a nā Vivian Mineker