’Ia ora na nā Nicaragua atu !

Ha’api’i mai nō ni’a i te mau tamari’i a te Metua i te ao ra nā te ao ato’a nei.

E fenua Nicaragua nō te pae Amerika rōpū. Fātata e 7 mirioni ta’ata e ora nei i reira !

Reo

Te reo mana ’o te reo Pāniora ïa. Tē paraparau ato’a nei te tahi mau ta’ata i te mau reo tumu mai te Miskito, te Sumo ’e te Rama.

¿Nahki sma ?

Te aura’a « E aha tō ’oe huru ? » nā roto te reo Miskito !

Te ha’aparareraʼa i te ʼevanelia

’Ua tae te mau misiōnare mātāmua i Nicaragua i te matahiti 1953. I teienei, ’ua hau i te 100 tauatini melo o te ’Ēkālesia i reira ! Tē vai ato’a ra te hō’ē hiero e patuhia ra.

Ma’o nō te Roto Nicaragua

E nehenehe te mau ma’o pua’atoro e ora i roto i te pape miti ’e te pape. Te aura’a o te reira, e nehenehe rātou e ora i roto i te mau moana, te mau ’ānāvai ’e te mau roto ! E ’au rātou mai te moana Ataranetita nā roto atu i te hō’ē ’ānāpape roa nō te ora i roto i te roto Nicaragua.

Palo de Mayo

Tē fa’atupu nei te mau ta’ata Nicaragua i te hō’ē heivanui tei pi’ihia Palo de Mayo, ’ia tae ana’e mai te tau ua. E fa’a’una’una rātou i te hō’ē tumu rā’au ’aore rā i te hō’ē pou i te mau rīpene ’ū rau nō te ’ori ’e nō te ’ārearea i te roara’a o te ’āva’e.

’Ātivite

Chuwis

Te Chuwis ’o te hō’ē ïa ha’uti nā te mau tamari’i i Nicaragua. Nō te ha’uti, e hina’arohia te mau pipi matie (’aore rā te mau rā’au ri’i) ’e hō’ē ’āpo’o i roto te repo (’aore rā hō’ē ’āu’a na’ina’i). E hōro’a e pae pipi matie nā te ta’ata ha’uti tāta’itahi. E tāora te ta’ata hā’uti mātāmua i te pipi matie hō’ēhō’ē i roto i te ’āpo’o. Mai te mea ’aita te hō’ē e ō, e fa’aea rātou, nā tō muri mai e ha’uti. Te ta’ata ha’uti tei fa’aō mātāmua i nā pipi e pae i roto i te ’āpo’o, ’ua rē ’oia !

Hāmanira’a mā’a

Gallopinto

I Nicaragua, e rave rahi ta’ata e ’amu nei i teie ’āu’a raiti ’e te pīpī i te mau mahana ato’a. Teie te hō’ē tunura’a ’o tā ’oe e nehenehe e tāmata !

1. ’A fa’aahu e 2 punu tāipu rahi hinu ’e 1 ’āfa ’ōniani re’are’a i tāpu-hu’ahu’a-hia. Fa’arapu e 5 minuti.

2. E māni’i 1 ’e te ’āfa ’āu’a na’ina’i raiti nō e 2 e tae atu e 3 minuti.

3. ’A tu’u te miti popa’a ’e e 3 ’āu’a na’ina’i pape. ’A ’īriti i te mau huero o te hō’ē ’āfa ’ōporo mā’aro matie ’e ’a tu’u atu te reira i ni’a.

4. ’A tāpo’i i te pāni ’e ’a vaiho ’ia ’ama mai nō te hō’ē maorora’a e 15 minuti ’ia pau te pape.

5. ’A fa’aru’e i te ’ōporo mā’aro matie i tunuhia ’e ’a māni’i e 2 ’āu’a na’ina’i pipi ’ute’ute ’aore rā pipi ’ere’ere ’ama ’e 1 ’āfa punu taipu na’ina’i ’ōniani piropiro puehu. Tunu ā e 10 minuti te maoro.

’A ani i te tauturu a te hō’ē ta’ata pa’ari !

Fa’ahōho’ara’a nā Dave Klüg