« Te teata ta’ata ora o te pāpa’ira’a mo’a », Hoa, Tiurai 2024, 14–15.
Te teata ta’ata ora o te pāpa’ira’a mo’a
Nā ’ō a’era Jonny, « āhiri na e haere tāua e tātara mai i te ’āfata o te sābāti ? ».
’Ua tupu teie ’ā’amu i te fenua Marite.
« ’Ua ha’umani roa vau ». Tē tārava ra Jonny i ni’a te tahua o te piha fa’afa’aeara’a.
Tē hi’o ra tōna tuahine ’o Jenna nā te ha’amāramarama. « ’Aita ho’i e ’ohipa nō te rave », ’ua parau ’oia.
Hi’o a’era Jonny i ni’a te aroaro. Nō te aha e au ra ē, e ’ere te sābati i te mea ’ārearea ?
I muri iho, mana’o a’era ’oia i te hō’ē mea. Nā ’ō iho ra Jonny, « ’āhiri na haere tāua e tātara mai i te ’āfata o te sābāti ». E ’āfata ta’a ’ē roa te ’āfata o te sābati tei fa’a’īhia i te mau perēra’a nō te ha’uti i te sābati.
’Ana’ana a’era te hōho’a mata o Jenna i te ’oa’oa. « E mea ’arearea ïa te reira ».
’Ua horo atu Jonny ’e ’o Jenna i roto i te piha o Māmā. Huti mai ra rāua i te ’āfata rahi i roto i te piha fa’afa’aeara’a.
« E aha tā tāua e rave nā mua ? », ui a’era Jonny. ’Īriti mai ra ’oia i te ’āfata ’e tātara mai ra i te tahi mau buka hōho’a ’e i te hō’ē ha’uti perē.
Nā ’ō a’era Jenna, « e ha’uti ana’e te fa’atū’atira’a i te mau ’aito o te pāpa’ira’a mo’a ».
I roto te perē, tē vai ra te mau tāreta ’e te hōho’a o te mau peropheta nō te Buka a Moromona. ’Ua ’āna’i Jenna i te mau tāreta i ni’a te tahua, ’ua hunahia te hōho’a. Te tahi i muri mai i te tahi, e fa’ahuri rāua hō’ē tāreta ’e e tāmata i te ’imi mai i te tāreta e tū’ati.
’Ua ’ōhi mai Jonny e piti tāreta ta’a ’ē ’e te tāpena Moroni i ni’a. « ’Ua ’itehia mai iā’u hō’ē tū’atira’a ! », ’ua tuo ’oia.
« ’O vau ato’a ! » ’Ua fa’a’ite mai Jenna e piti tāreta nō Saria.
’Ua nā ni’a ’e ’ua nā ni’a ā Jonny ’e ’o Jenna i te ha’uti i te reira. E mea ’ārearea ’ia feruri i tā rāua mau ’ā’amu au roa a’e o te Buka a Moromona.
I te hō’ē taime i muri iho, ’ua parau Jenna, « e rave ana’e i te tahi atu ’ohipa ».
« Nā reira. E ha’uti ta’ata ora ana’e i te hō’ē ’o tā tāua ’ā’amu pāpa’ira’a mo’a au roa a’e. E teata ta’ata ora ïa nō te pāpa’ira’a mo’a tā tāua ! » ’Ua ha’amata Jonny i te ’ohi i te mau tāreta.
« ’Ē ïa ! ». ’Ua tauturu Jenna i te ha’aputu i te perē ’e i te pānaho i te reira.
’Ua pāheru haere Jonny i roto i te ’āfata ē tae roa atu ’ua ’itehia mai iāna te tahi mau ’ahu teata. ’Ua ’īriti mai ’oia i te hō’ē ’ahu veuveu ravarava ’e ’ua ’ō’omo i te reira. « ’O Samuela, te ’āti Lamana vau ! » ’Ua ’ōu’a ’oia i ni’a i te hō’ē pārahira’a ’e ’ua ha’uti mai ia Samuela, i te ha’api’ira’a i ni’a i te patu o te ’oire.
’Ua ’īriti mai Jenna i te buka hōho’a o te Buka a Moromona. ’Ua ’imi ’oia nā roto i te mau ’api ē tae roa, ’ua ’itehia mai iāna ia Samuela te ’āti Lamana. ’Ua tai’o pūai ’oia ’a ha’uti ai Jonny i te ’ā’amu.
’Ua ha’api’ipi’i nā tamari’i i te ’ā’amu e rave rahi taime. ’Ua putapū Jonny i te māhanahana ’e te hau. E mana’o maita’i, ’ia ha’amana’o i te mau peropheta ’o tei ha’api’i nō ni’a ia Iesu Mesia.
I tō rāua ’itera’a ’ua ineine rāua, ’ua horo atu Jonny e ti’i ia Māmā, ia Pāpā ’e tō rāua tuahine teina ’o Makenna. « ’A haere mai e māta’ita’i i tā māua ha’uti ! »
Tē ti’a ra Jenna i rōpū i te piha ma te rima māhora rahi. « Manava i te haerera’a mai i tā māua teata ta’ata ora nō te pāpa’ira’a mo’a. I teie mahana, e vauvau atu māua i te ’ā’amu nō… Samuela te ’āti Lamana ! »
I muri iho, ’ua ha’amata ’oia i te ’ā’amu. « I tahito ra, ’ua haere mai te hō’ē peropheta ’o Samuela te i’oa nō te ha’api’i i te mau ’āti Nephi… »
’Ia tae i te taime nō te tuha’a a Jonny, e ti’a ’āfaro ’oia i ni’a i te pārahira’a. E parau ’oia ma te reo pūai. « ’O Samuela vau, ’e tē hina’aro nei te Metua i te ao ra ’ia rave ’outou i te mau māitira’a maita’i. ’Ia fa’aea i te rave i te ’ohipa ’ino. Nō te mea i roto e pae matahiti e fānauhia mai Iesu Mesia ».
« Tei ni’a ia Samuela te mana o te Atua », ’ua parau Jenna. ’Ua fa’aoti iho ra ’oia i te fa’ati’a i te ’ā’amu. I te otira’a, pōpō ana’e ra ’o Māmā, Pāpā ’e ’o Makenna.
« Hope roa te au ! », ’ua parau Māmā.
Taupe iho ra te ’ūpo’o o Jonny ’e ’o Jenna i raro. E mata ’oa’oa rahi tō rāua.
« E ha’uti ana’e i te tahi atu teata ta’ata ora », ’ua parau Jonny.
Parau mai nei Māmā, « e ’oa’oa roa ïa mātou ’ia māta’ita’i i te tahi atu ». Pōpō iho ra Makenna ma te ’ata’ata.
Horo atu ra Jenna ’e ’o Jonny i te ’āfata sābati nō te rave mai i te tahi atu mau ’ahu teata.
« Mea ’ārearea te sābati ! ’Ua au roa vau i te ha’api’ira’a mai nō ni’a i te mau pāpa’ira’a mo’a », ’ua parau a’era Jenny.
« ’E nō Iesu ». ’Ata’ata iho ra Jonny ’a ’ite mai ai ’oia i te tahi atu ā ’ahu teata. ’Ua riro mau te sābati ’ei mahana ta’a ’ē !
Fa’ahōho’ara’a nā Shawna J. C. Tenney