E tāu’aparaura’a ’e ’o Alan nō ni’a i te mau Hīro’a Fa’aro’o

Nō Málaga, Pāniora mai ’o Alan. ’Ua ui atu mātou iāna i te tahi mau uira’a e mea nāhea ’oia i te ha’api’ira’a mai i te mau Hīro’a Fa’aro’o.

’A fa’ati’a mai ia mātou nō ni’a ia ’oe.

E va’u matahiti tō’u. ’Ia pa’ari ana’e au, tē hina’aro nei au ’ia riro ’ei ’aivāna’a tu’iro’o. Tā’u ’ū au roa ’o te pua tou ïa, e tā’u mā’a au roa a’e ’o te tortillas de patatas (huero moa farai pāniora) ïa ’o tā tō’u māmā rū’au e hāmani.

Mea nāhea tō ’oe ha’api’ira’a mai i te mau Hīro’a Fa’aro’o ?

’Ua ha’amata vau i te ha’api’i mai i te reira i te Paraimere. ’Ua hīmene mātou i te mau hīmene nō te tauturu ia mātou ’ia tāmau ’ā’au i te reira. I te tahi taime e pāpa’i tō mātou mau ’orometua ha’api’i i te reira i ni’a i te tāpura ere’ere ’e e tūmā i te tahi mau ta’o. E pāpa’i ato’a mātou i te mau hōho’a nō te fa’ata’a e aha te aura’a te Hīro’a Fa’aro’o tāta’itahi.

’Ua ha’api’ipi’i ato’a vau iā’u iho ’ia fa’ahiti i te reira ’e tō’u ’utuāfare i roto i te pere’o’o nō te haere i te fare ha’api’ira’a. Tē tauturu nei au i tō’u tuahine teina ’o Maia, ’ia ha’api’i ato’a mai i te reira. ’Ua ’ite a’ena ’oia i nā e ono Hīro’a Fa’aro’o mātāmua !

E aha tā ’oe Hīro’a Fa’aro’o au roa a’e ?

E mea au nā’u te nūmera iva. « Tē ti’aturi nei mātou i te mau mea ato’a i heheuhia mai e te Atua, te mau mea ato’a o tāna e heheu mai nei i teienei, ’e tē ti’aturi nei ho’i mātou ē, e heheu mai ā ’oia e rave rahi atu ā mau mea maita’i ’e te faufa’a rahi nō te Bāsileia o te Atua ». Tē ha’api’i nei te reira ē, e rave rahi atu ā mau mea tā te Metua i te ao ra nō te ha’api’i mai ia tātou, ma’a vāhi iti ’e ma’a vāhi iti.

Nāhea te ’itera’a i te mau Hīro’a Fa’aro’o i te tauturura’a ia ’oe ?

I te hō’ē mahana i te fare ha’api’ira’a, ’ua ui mai tō’u hoa ’o Sophia iā’u e aha tā’u e ti’aturi nei, ’e tei roto ānei au i te hō’ē ha’apa’ora’a fa’aro’o. ’Ua ha’amana’o vau i te Hīro’a Fa’aro’o mātāmua ’o te nā ’ō ra « tē ti’aturi nei mātou i te Atua, te Metua Mure ’Ore, ’e i tāna Tamaiti ia Iesu Mesia, ’e i te Vārua Maita’i ho’i ». Nō reira ’ua fa’a’ite atu vau i te reira iāna.

’Ua parau ato’a vau iāna ē, e keresetiano vau ’e e melo vau nō Te ’Ēkālesia a Iesu Mesia i te Feiā Mo’a i te mau Mahana Hope’a nei. ’Ua fa’aro’o ’oia iā’u ’e ’ua ta’a iāna i te mea tā’u i fa’a’ite iāna.

E aha te mea tā ’oe i putapū ’a tupu teie ’ohipa nō ’oe ?

’Ua ’ite au te au maita’i i roto iā’u nō te mea ’ua ’ite au ē, ’ua itoito vau i te fa’a’ite i tō’u mau ti’aturira’a i tō’u hoa. Maoti tō’u itoito i te ha’api’ira’a mai i te mau Hīro’a Fa’aro’o, ’ua nehenehe iā’u e fa’a’ite i te ’evanelia ’e ’ia ’ite e aha te mea e parau atu.

E nehenehe ato’a ’oe e ha’api’i mai i te mau Hīro’a Fa’aro’o !

ʼA tāmata i te ha’api’ipi’i ’e te hōʼē hoa.

Fa’ahōho’ara’a nā Toby Newsome