Te hoa i te hoa

Te ’oa’oa o te ha’api’ira’a mai

Nā Elder Clark G. Gilbert

Nō te Hitu ’Ahuru

Nō roto mai i te hō’ē uiuira’a ’e ’o Olivia Kitterman ’e ’o Noelle Lambert Barrus.

’Aita vau i mana’o ē, e riro vau ’ei pīahi maita’i roa ’a pa’ari noa ai au. E mea māramarama mau tō’u mau taea’e ’e mau tuahine ato’a. E mau nota maita’i tā rātou. ’Ua rave rātou i te mau ha’api’ira’a pa’ari roa a’e. ’Ua tāmata noa vau i te rave i te mau ha’api’ira’a pa’ari roa a’e, ’aita roa rā vau i fāri’ihia. Mea fifi roa te ’ohipa nūmerara’a. Nō reira ’ua feruri au, « ’oia ïa, tē mana’o nei au ē, e ’ere au i te ta’ata māramarama ». ’Aita vau i feruri ē, e nehenehe te reira e taui.

I muri iho, i te hō’ē matahiti, ’ua fāri’i au i te hō’ē ’orometua ha’api’i tei hōro’a iā’u te ti’aturira’a i hina’arohia e au. ’Ua ’ite tō’u ’orometua ha’api’i e tārēni hau atu tō roto iā’u, ’aita ra vau. ’Ua nā ’ō mai ’oia, « e Clark, e nehenehe ’oe e riro ’ei pīahi maita’i. E ti’a noa ia ’oe ’ia ti’aturi ia ’oe iho.

Nō reira ’ua tūtava noa vau. ’Ua ’imi maita’i pūai atu vau. ’Ua ha’a ato’a vau ’ia nahonaho maita’i a’e au. ’Ua ha’api’i mai au nāhea ’ia ha’apa’o maita’i i tā’u ’ohipa ha’api’ira’a. Te tūpohera’a i te ’āfata teata, ’ua tauturu te reira iā’u ’ia rōtahi i ni’a i tā’u ’ohipa ha’api’ira’a. ’Aita i maoro, ’ua riro mai au ’ei pīahi maita’i a’e. ’E ’ua tupu i te rahi tō’u ti’aturira’a.

I tō’u haerera’a i tā’u misiōni, ’ua ’ite a’era vau ’aita i tītauhia iā’u ’ia ha’api’i mai ’o vau ana’e. ’Ua ani au i te Metua i te ao ra te tauturu. ’E ’ua fa’aro’o vau i te Vārua Maita’i. ’A rave itoito ai au i te ’ohipa, ’ua ti’a iā’u e ha’api’i ’e e tauturu i te ta’ata. I tō’u ho’ira’a nā tā’u misiōni mai, ’ua haere au i te fare ha’api’ira’a tuarua. ’Ua pure au nō te tauturu a te Atua i roto i te mau ha’api’ira’a ato’a. ’Ua riro mai au ’ei pīahi maita’i roa ’e ’ua ha’amata ato’a vau i te au i te ’ohipa nūmerara’a !

’Ua mana’o vau ē, te rirora’a ’ei ta’ata māramarama te aura’a, ’o te ’itera’a ïa i te mau mea e rave rahi ’e e mea ’ōhie te ha’api’ira’a. E ’ere te reira i te parau mau. Mai te mea ’ua ineine ’oe ’ia fa’aō mai i te Fatu i roto i tā ’oe ha’api’ira’a mai ’e ’ia ’ohipa itoito nō te ha’amaita’i ia ’oe, e mea māramarama ’oe !

Mai te mea e mea pa’ari te mau mea i teie taime, ’a ha’amana’o ē, e tamari’i ’oe nā te Atua. E pūai fa’ahiahia tō ’oe. E nehenehe ’oe e rave i te mau ’ohipa pa’ari ! ’A tāmau noa i te ha’api’ipi’i. ’A ani i te tauturu a te Metua i te ao ra. Tē hina’aro nei ’oia ’ia manuia ’oe. E nehenehe ’oe e rave te reira !

Ha’api’i mai ma te ’ārearea

’A ’ite mai i te hōho’a tāta’itahi o te tauiha’a nō te ha’api’ira’a i roto i te hōho’a i raro nei. E aha tā ’oe e au roa ’ia ha’api’i mai i te fare ha’api’ira’a ?

« ’A ’imi na ’outou i roto mai i te mau buka maita’i roa a’e i te mau parau pa’ari, ’a ’imi ho’i i te ’ite, ’oia ïa nā roto i te ha’api’i ’e nā roto ato’a i te fa’aro’o ». (Te Ha’api’ira’a Tumu ’e te mau Fafaura’a 109:7).

Fa’ahōho’ara’a nā Agnes Saccani