« Te mau poum rārahi ’e te mau ’ū ’ana’ana », Hoa, Tiurai 2024, 10–11.
Te mau poum rārahi ’e te mau ’ū ’ana’ana
« Nō te aha ’aita te Metua i te ao ra e fa’a’ore atu i te mau māniania pūai ? », ’ua ui atu Charlotte.
’Ua tupu teie ’ā’amu i te fenua Marite.
Mea au ’ore roa nā Charlotte te mau māniania pūai ! ’Aita roa ’oia e au nei te huru haruru e ta’i nei i roto i tōna tāri’a ’aore rā e vevo haere nei nā roto i tōna upo’o. Noa atu ē ’ua ’ite ’oia tei te vāhi pāruruhia ’oia, e hitahita noa ’oia ’ia ’āvivi te mau pere’o’o, ’ia pōpō te nāho’a ta’ata, ’aore rā ’ia haruru te mau pahu.
’E ’aita iho ā Charlotte e au i te mau ahitiri !
’Ua tāmata tōna ’utuāfare e rave rahi ’ohipa nō te tāmarū iāna ’ia māniani’a pūai ana’e. ’Ua ho’o mai Pāpā i te mau pāruru tāri’a ta’a ’ē nōna nō te tauturu i te tāpe’a i te māniania. ’Ia haruru ana’e te pātiri, e mo’e atu Māmā i roto iāna i raro a’e i te paraikete. ’Ua pure ato’a Charlotte ’ia tauturuhia ’oia ’ia ’ore e ri’ari’a.
’Ua tauturu teie mau mea ato’a. Terā rā, e ri’ari’a noa ā ’oia i te mau haruru pūai.
« E hāere tātou i teie pō i te hō’ē fa’aharurura’a ahitiri ta’a ’ē i te ’āua orihaerera’a », ’ua parau atu Māmā ia Charlotte. « E hina’aro ānei ’oe e haere mai ? »
’Ua fa’atu’atu’a mai Charlotte i tōna mata. « E mea māniania roa ho’i te ahitiri ».
Nā ’ō atu ra Māmā, « i teienei ’ua pa’ari ’oe, e mea ’ārearea roa paha ïa ’ia māta’ita’i atu i te ahitiri ». « E haere ato’a mai tō ’oe mau hoa tā’āto’a. E nehenehe ato’a tātou e ’āfa’i i tō ’oe pāruru tāri’a. I tō ’oe mana’o, e nehenehe ’oe e tāmata i te reira ? ».
Huti a’era Charlotte i te aho. « Nā reira. Tē mana’o nei au e tāmata vau ».
’Ua ha’amata maita’i te mao’ara’a o te ahitiri i roto i te ’āua orihaerera’a. Tē hōhoro ra Charlotte ’e tōna mau hoa nā ni’a i te matie, te ’amura’a i te mā’a monamona ’e te ha’uti-haere-ra’a. ’Aita i maoro roa, ha’apōiri a’era te ra’i. Pārahi a’era Charlotte ’e tāmau iho ra i tōna pāruru tari’a ma te hi’o hitahita i te ra’i.
POUM ! POUM ! KRAK !
’Ua ’ōtu’itu’i vitiviti te māfatu o Charlotte ’e ’ua vī tōna ’ōuma. Ti’a tā’ue iho ra ’oia i ni’a ’e tāmata a’era i te fa’aātea iāna i te māniania e ha’ati ra iāna.
Horo atu ra Māmā e tāpapa ia Charlotte ’e ’ua haru mai iāna. Pārahi iho ra rāua i raro ’e ’ua tāuahi pūai atu Māmā iāna. Tahe a’era te roimata o Charlotte.
« Tē pe’ape’a nei au ’ua fa’ari’ari’a te reira ia ’oe », ’ua parau Māmā « Tei i’ō nei au. E tūtonu ana’e tāua i ni’a i te mau ’ū ’ia ’ore ’oe ’ia tau’a roa i te maniania. E aha tā ’oe e ’ite ra i tō ’oe nā mata ?
Huti maite a’era Charlotte i te aho. « Tē ’ite nei au i te ’auro, ’e te ’ute’ute, ’e te matie ».
« I teienei, ’a fa’a’ohipa i tō ’oe ihu », ’ua parau atu māmā. « E aha te mea tā ’oe e hau’a ra ? »
Nā ’ō a’era Charlotte, « e nehenehe au e hau’a i te au auahi ’e te matie ». « ’E te tō popa’ā farai ! »
« E aha te tahi atu mau ’iteiho o te tino tā ’oe e nehenehe e fa’a’ohipa i teienei ? »
Tāpō a’era Charlotte i tōna mata. « E nehenehe au e putapū i te reira.« »« ’Ia pa’a’ina ana’e te mau ahitiri, e nehenehe au e putapū i te mau rūrūra’a i roto i tō’u ’ōuma ».
Nā ’ō mai nei Māmā : « E nehenehe ’oe e tāmata i te hō’ē mea ? »
Fa’atoro a’era Charlotte i tōna arero. « E’ita tā’u e nehenehe e tāmata i te ahitiri ». ’Ua ’ata Charlotte.
’Ua ha’amaere teie mau mea ato’a ia Charlotte. Nāhea te mau ta’ata i te hāmani i te mau ’ū rau ?, uiui a’era ’oia iāna iho. Nō te aha te mau ahitiri e pa’a’ina ai ? Nāhea rātou i te hāmanira’a i te mau hōho’a ta’a ’ē ? E ’ere roa atu ho’i te mau ahitiri i te mea ri’ari’a i teienei.
« Māmā, e mea māere mau te mau ahitiri ! », ’ua parau Charlotte.
’A fa’ata’oto ai Māmā ia Charlotte i roto i tōna ro’i i taua pō ra, ’ua ui atu ra Charlotte, « nō te aha ’aita te Metua i te ao ra i pāhono i tā’u mau pure, ’ia ani ana’e au iāna ’ia fa’a’ore i te mau maniania pūai ? »
’Ua feruri Māmā ma’a taime ’iti. E pāhono atu ra, « e’ita te Metua i te ao ra e fa’a’ore noa i te mau mea ri’ari’a ». I te tahi rā taime, e tauturu ’oia ia tātou ’ia hi’o i te mau mea ma te hō’ē huru ta’a ’ē, ’aore rā e hōro’a mai ia tātou i te mau ta’ata nō te tauturu i te tāmāhanahana ia tātou ».
« Mai iāna i tauturu iā’u i teie pō ! » ’ua parau Charlotte.
« Oia mau ! », ’ua ’ata Māmā. « ’Ua haere ’oe i te mao’ara’a ahitiri noa atu tō ’oe ri’ari’a. I muri iho, ’ua tauturu te Metua i te ao ra ’ia tāmarū i tō ’oe mata’u. ’Ua tauturu ato’a ’oia ia ’oe ’ia hi’o i te nehenehe o te mau ahitiri ma te fa’a’ohipara’a i te tahi o tō ’oe mau ’iteiho o te tino.
Mana’o a’era Charlotte i te mau ’ū ’ana’ana i ni’a i te ra’i ’e ’ua ’ata’ata. ’Aita iho ā ’oia e au i te mau maniania pūai. E mata’u noa ā ’oia i te reira. ’Ua ’ite rā ’oia e tauturu noa mai te Metua i te ao ra iāna ’ia vai itoito noa.
Fa’ahōho’ara’a nā Adam Howling