Mei he Kau Palesitenisī ʻUluakí

Ko e Mālohi Maʻongoʻonga Tahá

Fai ʻe Palesiteni Lāsolo M. Nalesni

Toʻo mei he “Kuo Toetuʻu ʻa Kalaisí; ʻE Hiki e Ngaahi Moʻungá ʻe he Tui Kiate Iá,” Liahona, Mē 2021, 101–4.

ʻI he ngaahi taʻu siʻi kuo hilí, naʻá ku ʻaʻahi ai mo Sisitā Nalesoni ki Haʻamoa, Tonga, Fisi, pea mo Tahiti. Ne ʻuha lōvai ʻa e ngaahi ʻotumotú ni takitaha ʻi ha ngaahi ʻaho lahi. Naʻe lotu ʻa e kāingalotú ke ʻalomālie ʻenau ngaahi fakatahaʻanga ʻi tuʻá, he ʻuhá.

ʻI Haʻamoa, Fisi pea mo Tahití, ko ʻene kamata pē ʻa e fakatahá, naʻe tuʻu leva ʻa e ʻuhá. Ka ʻi Tongá, naʻe ʻikai pē tuʻu ʻa e ʻuhá ia. Ka naʻe lau-houa e muʻomuʻa mai ha siʻa Kāingalotu ʻe 13,000 ke maʻu siʻanau nofoʻanga. Naʻa nau siʻi kātaki pē he tali ʻi he ʻuha lōvai taʻetukú. Pea nau toe siʻi tangutu pīponu ai pē ʻi he fakatahá.

Naʻá ma mamata ki ha tui lahi ʻi he kakai ʻo e ʻotu motu ko ʻení—ha tui ke taʻofi ʻa e ʻuhá mo ha tui ke kei hoko atu pē ʻi he taimi naʻe ʻikai ʻafua ai ʻa e ʻuhá.

Ko e ngaahi pole ʻi heʻetau moʻuí ʻoku ʻikai ke nau liliu maʻu pē ʻa e foungá pe ko e taimi ʻoku tau loto ki aí. Ka ʻe tokoni maʻu pē ʻetau tuí ke tau ngaʻunu kimuʻa. ʻE tokoni hoʻo tuí ke liliu ʻa e ngaahi faingataʻaʻiá ko ha tupulaki mo ha faingamālie.

Ko e tui kia Sīsū Kalaisí ko e mālohi maʻongoʻonga taha ia ʻoku tau malava ke maʻu ʻi he moʻui ní. ʻOku malava ʻa e meʻa kotoa pē kiate kinautolu ʻoku tuí.

Ko Hono Fakatupulaki Hoʻo Tuí

Hangē ko ʻetau lava ʻo tokoniʻi ha tengaʻi ʻakau ke tupu ʻi hono ʻoange ki ai ʻa e laʻaá, vaí, mo e kelekele leleí, te tau toe lava ʻo fai ha ngaahi meʻa ke tokoni ke tupulaki mo ʻetau tuí! Valivali ʻa e konga takitaha ʻo e fakatātaá pea lau ʻa e meʻa te ke lava ʻo fai ke fakatupulaki ai hoʻo tuí.

• Ako kau kia Sīsū Kalaisi mo ʻEne ongoongoleleí ʻi ʻapi, ʻi he lotú, pea ʻi he folofolá.

• Lotu ʻo kole ha tokoni ke ke ʻiloʻi ʻa e meʻa ʻoku moʻoní.

• Tauhi ʻa e ngaahi fekaú pea fai ʻa e ngaahi fili leleí ke tokoni ke ke tupulaki ʻo ofi ange ki he Tamai Hēvaní.

Ngaahi tā fakatātā ʻa Lisa Hunt