“Fakafepakiʻi ʻa e Houtamakí ʻaki ʻa e ʻOfá,” Kaumeʻá, ʻAokosi 2024, 38.
Tohi ʻe Koe
Fakafepakiʻi ʻa e Houtamakí ʻaki ʻa e ʻOfá
Ko hoku hingoá ko Matilitā, pea ko ʻeku haʻú mei Silei. Talu mei heʻeku hiki ki he fonua kehé, mo e ʻai ʻe he longaʻi fānaú ke u fakatokangaʻi ʻoku ou kehe meiate kinautolu. Kuo nau kataʻi hoku ʻulu mingimingí, lanu hoku kanoʻi-matá, hoku kemó, pea aʻu ki he lanu ʻo hoku kilí. Kuo nau ui tala ʻoku ou palakū mo faikehe pea aʻu ʻo nau talamai ʻoku ou masiva he ʻoku ou ʻasi faikehe mei he taha kotoa.
Kuo ʻosi akoʻi au ʻe heʻeku fineʻeikí ke u fakafepakiʻi ʻa e houtamakí ʻaki ha fofonga malimali. ʻOkú ne faʻa pehē tā-tuʻolahi ko e kakai ʻoku nau houtamakí ʻoku nau mamahi pe ʻoku nau moʻui mo ha faʻahinga meʻa ʻokú ne fakamamahiʻi kinautolu. Kuó ne ʻosi toe akoʻi foki au ʻoku ʻikai ko haku foʻui, pea ko ʻete kehé ko ha meʻa lelei mo fakaʻofoʻofa ia. Naʻe fakatupu ʻe he ʻOtuá ha ngaahi meʻa kehekehe ʻi māmani hangē ko e ʻakaú, ngaahi feituʻú, mo e kakaí. ʻOku ʻikai mahuʻinga ia pe ʻoku tau fōtunga fēfē, kehe pe ke tau maʻu ha loto ʻoku lelei.
Koeʻuhí naʻe akoʻi au ʻe heʻeku faʻeé, ko e taimi kotoa pē ʻoku houtamaki mai ai ha taha, fakakaukau ki ai pea lea ki he taha ʻokú ne lea ʻaki ʻa e ngaahi meʻa ʻoku koví. ʻOku ou feinga ke taʻofi e meʻa ʻoku hokó. Ne tuʻo taha haʻaku talaange ki haku kaungāako ʻe lava ke fakalotolavea lahi hono lea ʻaki ʻa e ngaahi meʻa ʻoku koví. Naʻá ku talaange ʻoku ʻikai ke ne ʻilo ʻa e meʻa ʻoku hoko ki he loto ʻo e niʻihi kehé ʻi he taimi ʻoku nau fanongo ai ki ha ngaahi meʻa kovi fekauʻaki mo kinautolu koeʻuhí ko ʻenau kehé. Talu mei he ʻaho ko iá, kuo teʻeki ke toe fakakata ʻaki au ʻe he kaungā-akó, pea kuó ma kaungāmeʻa ʻeni.
Te u pehē ko e founga naʻe akoʻi au ʻe heʻeku fineʻeikí ke fakafepakiʻi ʻaki ʻa e houtamakí founga lelei tahá ia. Naʻá ne akoʻi au ke u fakafepakiʻi ʻa e houtamakí ʻaki ʻa e ʻofá, he ko e meʻa ia ʻe fakahoko ʻe he ʻOtuá. ʻOku ou feinga ke u fehuʻi maʻu pē kiate au, “Ko e hā ʻe fakahoko ʻe Sīsū Kalaisi ʻi he tūkunga ko ʻení?” Kuo tokoniʻi au ʻe he meʻá ni ke u ofi ange ki heʻetau Tamai Hēvaní.