Ngaahi ʻEkitivitī Haʻu, ʻo Muimui ʻIate Aú

Ki he efiafi ʻi ʻapí pe ako folofolá—pe ke maʻu pē ha fiefia!

29 Siulaí–4 ʻAokosí

Fanga Kiʻi Meʻa Iiki, Faikehekehe Lahi

Ki he ʻAlamā 36–38

ʻI he tokoni ʻa e Tamai Hēvaní, ʻe lava ʻa e fanga kiʻi meʻa īkí ʻo fai ha liliu lahi (vakai, ʻAlamā 37:6–7). Tokoni ke ʻai hoʻo founga feimeʻatokoni ʻokú ke manako taha aí. Ko e hā ʻe hoko ki he meʻatokoní kapau te ke toʻo ha taha ʻo e ngaahi meʻa ʻoku fiemaʻú? Talanoa fekauʻaki mo e founga ʻe lava ai ʻe he fanga kiʻi meʻa īkí ʻo fakahoko ha leleí mo e founga te ke lava ai mo koe ʻo fai ha leleí.

Maʻá e fānau iiki angé: Kumi ʻa e fanga kiʻi meʻa iiki ʻoku ʻaongá, hangē ko ha kiʻi tengaʻi ʻakau ʻoku tupu ʻo hoko ko ha fuʻu ʻakau pe ko ha meʻa-kamosi ʻuhila ʻokú ne fakaulo ʻa e māmá. Talanoa fekauʻaki mo e founga ʻe lava ai ʻe he fanga kiʻi meʻa īkí ʻo fakahoko ha kehekehe lahí, ʻo hangē pē ko koé!

5–11 ʻo ʻAokosí

ʻEkitivitī ʻo e Toetuʻú

Ki he ʻAlamā 39–42

Naʻe akonaki ʻa ʻAlamā fekauʻaki mo e toetuʻú (vakai, ʻAlamā 40:23). Faʻu ha kiʻi tamapua ʻoku fōtunga tatau mo koe! Te ke lava ʻo fakaʻaongaʻi ha tangai pepa, pe sitōkeni ke faʻu ha kiʻi tamapua. Fakaʻaongaʻi ha ʻū peni fakaʻilonga, vali, kulasi, pe ha ngaahi meʻa kehe ke teuteuʻi ʻaki. ʻOku hangē ho nimá ko ho laumālié, pea ʻoku tatau hoʻo tamapuá mo ho sinó. Koeʻuhí ko Sīsū Kalaisi, ʻe toe fakataha hotau sinó mo e laumālié ʻo taʻengata hili ʻetau toetuʻú.

Maʻá e fānau iiki angé: Fai ha meʻa ke ueʻi ho sinó, hangē ko ha tauʻolunga pe vaʻinga! Hili ia, peá ke fakamatala ki he ʻuhinga ʻa e toetuʻú, te tau toe maʻu hotau sinó ʻi he hili ʻetau maté.

12–18 ʻo ʻAokosí

Kolotau ʻo e Malú

Ki he ʻAlamā 43–52

Ko e taimi naʻe teuteu ai ʻa e ʻEikitau ko Molonaí ki he taú, naʻá ne langa takai ha ngaahi meʻa ʻi he koló ke maluʻi ʻa e kakaí (vakai, ʻAlamā 50:1–6). Langa ha kolotau mo homou fāmilí! Ko e taimi kotoa pē te mou tānaki ai ha meʻa foʻou ki homou kolotaú, fakamatala ha meʻa te mou lava ʻo fakahoko ke malu fakalaumālie ai homou fāmilí, hangē ko e lau ʻo e folofolá pe ko e lotú.

Maʻá e fānau iiki angé: Langa ha kolotau ke mou nofo ʻi ai. Talanoa ki he founga hono langa ʻe he kakaí ʻa e ngaahi kolotau ke nau malú. Pea mou toki talanoa ki he founga te tau lava ʻo ʻai ai hotau ngaahi ʻapí ke malu fakalaumālie ʻaki ʻetau lau ʻa e folofolá.

19–25 ʻo ʻAokosí

Ngaahi Tohi ʻo e ʻOfá

Ki he ʻAlamā 53–63

Naʻe hiki ʻe Hilamani mo ha kau taki kehe ha ngaahi ʻipiseli pe tohi, ke fefakahokoʻaki a e meʻa lelei pe kovi ʻoku hoko ʻi he taú (vakai, ʻAlamā 56). Te ke lava mo koe foki ke fai ha ngaahi tohi! Fai ha tohi ki ha mēmipa ʻo e fāmilí pe kaungāmeʻá. Hiki ʻa e ngaahi meʻa lelei ʻoku hoko ʻi hoʻo moʻuí pea mo e ngaahi meʻa ʻoku faingataʻa kiate koé. Pea ʻave leva hoʻo tohí!

Maʻá e fānau iiki angé: Ako faitohi “ʻOku ou ʻofa atu” pe tā ha foʻi haati ke ʻoange ki ha taha ʻokú ke ʻofa ai. Talanoa ki he founga naʻe fai tohi ai mo e kau palōfita ʻi he folofolá.

ʻŪ tā fakatātā ʻa Katy Dockrill