“Ko ha Fāmili Fakaemāmani Lahi,” Kaumeʻá, ʻAokosi 2024, 32–33.
Kaumeʻa ki he Kaumeʻa
Ko ha Fāmili Fakaemāmani Lahi
Mei ha ʻinitaviu mo Peletilī Salimoni III mo Lepeka Seikimeni.
ʻŪ tā fakatātā ʻa Yev Haidamaka
ʻI heʻeku kei siʻí, naʻe ngāue tokoni ʻeku ongomātuʻá ʻi ha ngaahi fonua kehekehe. Naʻá ku fie tokoni foki ki he kakai ʻi he funga ʻo e māmaní. Pea ʻi heʻeku tupu haké, naʻá ku hoko ko ha toketā. Kuó u ngāue ʻeni ʻi ha ngaahi fonua kehekehe ʻo tokoni ki he kakaí. Kuó u fiefia mo hoku fāmilí ke hoko ko ha Kāingalotu ʻo e Kau Māʻoniʻoni ʻi he Ngaahi ʻAho Kimui Ní ʻi he ngaahi feituʻu ko ʻení. ʻOku nau fuʻu fiefia mo ʻamanaki lelei. Pea ʻoku nau ʻofa ʻia Sīsū Kalaisi mo ʻEne ongoongoleleí.
Naʻe faʻa ō ʻeku fānaú ki he Palaimelí mo ha fānau kehe naʻe ʻikai ke nau fōtunga tatau pe lea ʻaki ʻa e lea fakafonua tatau. Ka ko e fānau kotoa kinautolu ʻa e Tamai Hēvaní. ʻOkú Ne ʻafioʻi mo ʻofeina kitautolu takitaha. Ko e konga takitaha kitautolu ʻo Hono fāmilí.
ʻOku ou fakatauange ʻoku ʻiloʻi ʻe kimoutolu fānau Palaimelí ko e konga kimoutolu ʻo ha fāmili fakaemāmani lahi ʻoku mātuʻaki mahuʻinga. Tatau ai pē pe ko e hā, ka ʻoku ʻofaʻi kimoutolu heʻetau Tamai Hēvaní. ʻOkú Ne falala lahi kiate kitautolu—ke tau hoko ʻo hangē ko Iá. ʻOku takitaha ʻi ai hotau mahuʻinga. Ko e taimi ʻoku tau maʻu ai ʻa e ongoongoleleí, ʻe ʻikai leva toe vahevaheʻi kitautolu ʻe he ngahi meʻa te nau lava ke vahevaheʻi kitautolú, hangē ko hotau anga fakafonuá, lea fakafonua ʻoku tau fakaʻaongaʻí, pe feituʻu ʻoku tau nofo aí. Koeʻuhí he te tau feʻiloʻiʻaki hotau tuʻunga totonú—ko e ngaahi tokoua, tuofāfine, ko e fānau ʻa e ʻOtuá.
Taha Kumi Kaumeʻa
Ko e konga kātoa kitautolu ʻo e fāmili ʻo e Tamai Hēvaní! Te ke lava nai ʻo maʻu ʻa e fānau ʻi he ngaahi fakatātaá ʻoku hoa lelei mo e fōtungá takitahá?