“Na Vakacalaka ni Veitiqa,” iTokani, Sepiteba 2024, 4–5.
Na Vakacalakani Veitiqa
A doudou beka o Taniela me tukuna na ka dina?
Na italanoa oqo a yaco mai Amerika.
A laveta cake o Taniela na isogo ni kato ni vakatatalo makawa nei Tukana ka iro ki loma. Era a soqoni vata mai na tavalena mera raica. Era dau taleitaka mera qito vata ena vale nei Tukana!
E loma era tiko kina e levu na iyaya ni vakatatalo makawa erau dau qitotaka o tinai Taniela kei nona nei ena gauna erau se gone kina.
“Na cava soti qori?” Na tavalei Taniela o Noa a dusia e ono na itiqa lalai caliva e loma. E a momoto na muadra ka ukutaki ena kuila duiroka—eso e damudamu ka so e dromodromo.
A tomika cake o Taniela e dua. “A tukuna vei au o tinaqu me baleti ira na veika oqo,” a kaya o koya. “O biuta e dua na ka mokimokiti ena lomanibai e tautuba. Moni qai veivukevuke ena kolotaka cake ki macawa na itiqa lalai oqo ka tovolea mo vakalutuki ira ki loma ni ka mokimokiti.”
“Totoka!” a kaya o Noa. A cici yani o koya ki lomanibai me vakarautaka na qito.
Sega ni dede eratou sa viritaka cake ki macawa o Taniela kei iratou na tavalena na itiqa kaukamea ena veiyasa kece ni lomanibai nei Tukana. E dau taleitaka o Taniela ni lutu na itiqa ka coba vakaukauwa ki na co.
“Au kila niu rawa ni viritaka cake na noqu me tubu sivita na nomu,” a kaya o Lili na tavalei Taniela.
Era dredre na gone ka viritaka cake na itiqa me yawa sara ki cake.
A qai votu mai vei Taniela edua na vakasama. “Au kila niu rawa ni viritaka na noqu me takosova na sala ni motoka ki na ka mokimokiti!” a kaya o koya. A cici yani ki na tai kadua ni sala ni motoka ka viritaka ena nona igu na itiqa.
A tubu ki macawa na itiqa, ia a sega ni tau ki na veico. Ia e a lutu sobu ki na dela ni motoka vou nei nona Nei o Robilyn ena dua na CABOLOrogo levu.
“Oilei!” a kailavaka o Noa.
A tomika cake o Taniela na itiqa. E a kabibi vaka ca na vanua a tau kina na itiqa ena motoka.
Eratou a veiraici na gone ena taqaya. Ia, ni sega tale na veivosaki, eratou a biuta tu na itiqa e tuba ka cici ki loma.
Ena yakavi o ya, era a gole kece ki na nodra dui motoka me ra lako i vale. A raica sara na nona nei o Taniela na kabibi e dela ni nona motoka. “Na cava a yaco?” a taroga o koya.
E a vakila o Taniela ni bibi mai na ketena. Ia a sega ni tukuna e dua na ka. E a curu ga yani ki loma ni motoka ka vakamoce vei iratou na tavalena.
Ena ilakolako lesu ki vale, e a dabe vakanomodi toka ga o Taniela ena idabedabe e muri. A tovolea me wilika na nona ivola. Ia a sega ni rawa vua me wiliwili. A vakila na leqa ni lomana ena veika a yaco. A kila o koya ni dodonu vua me tukuna na ka dina. Ia, na tukuni ni ka dina ena sega ni marautaki! Erau na cudruvi koya vakalevu sara na nona itubutubu. Ka vakakina o nona nei.
Sa qai vakasamataka o Taniela na nona tamata qaqa taleitaki ena ivolanikalou. A kolotaki o Taniela ki na qara ni laione ena Veiyalayalati Makawa ni a digitaka na dodonu. A yaloqaqa o Koya. De rawa talega ni yaloqaqa o Taniela.
“I, Na?” A kaya o Taniela. “Au a viritaka e dua na itiqa, ka lauta na motoka nei Nei Robilyn ka mani kabibi kina. E a noqu cala.”
A raici koya mai o Na ena iloilo ka toka e matana. A sega ni cudru sara me vaka a nanuma o Taniela ni na vakakina. “Vinaka vakalevu nomu tukuna vei au na ka dina,” a kaya o koya.
A mai cegulevu yani o Taniela. “E rawa beka niu qiriti Nei Robilyn ni daru yaco i vale?” a taroga yani. “Au via kere veivosoti. Kau na cakacaka vakaukauwa meu rawata na ilavo me vakavinakataki kina na nona motoka.”
A matadredre o Na. “Sa dua na vakasama uasivi oqori.”
Sa yali na veika a vakila e ketena, ka vakila o Taniela na vakacegu. E a yaloqaqa o koya me tukuna na ka dina. Ena vuku i Jisu Karisito, sa rawa vua me veivutuni ka cakava me dodonu na veika eso.
Droini mai vei Josh Talbot