“Na Kato ni Lomaleqa,” iTokani, Sepiteba 2024, 36–37.
Na Kato ni Lomaleqa
A vakasamataka vakalevu o Olivia na nona dau lomaleqa.
Na italanoa oqo a yaco mai Amerika.
A vakusakusa yani o Olivia mai na nona rumu ni vuli ni bera ni cava na vuli. A tovolea me kakua ni veiraimata kei na dua.
Nikua na imatai ni siga ni qaravi vakavuniwai nei Olivia. A vakamacalataka o tinana ni na sota tiko kei na dua na vuniwai ka na rawa ni vukei koya ena nona lomaleqa. O Olivia edua e dau lomaleqa vakalevu. Ena so na gauna e dau lomaleqa sara vakalevu ka dau dredre kina na moce se lasa vata kei ira na nona itokani.
A vodo ena motoka o Olivia vata kei Nana ka vakalairoro ena nona idabedabe.
“O vinaka tiko?” A taroga o Nana.
A sega ni sauma me dua na gauna o Olivia. “Na cava na vuna meu lako kina vei vuniwai?”
Sa tekivu draiva yani o Nana. “Na Tamada Vakalomalagi e soli ira mai vei keda na vuniiwai mera vukei keda. Me vaka ga na Nona solia vei keda na veika tale eso me vukei keda, me vakataki ira na itokani kei na ivolanikalou. O nanuma tiko beka na wiliki ni ivolanikalou sema daru a cakava?”
A deguvacu o Olivia. A vukei koya o Nana me kunea na veitiki ni ivolanikalou me veivuke ena nona lomaleqa. Ena veitikina yadua, a vola o Nana e yasana na vanua me kunea kina na kena e tarava. Ni lomaleqa o Olivia ena bogi, ena cabora edua na masu ka vakaraica edua na tikina ena ivolanikalou. Ena qai wilika na veitikina tale eso era sema vata me yacova ni sa moce rawa.
Ni rau curu yani o Olivia kei Nana ki na valenivolavola nei vuniwai, a vakaveikilaitaki koya mai o Vuniwai Posy. A tarogi Olivia me baleta na veika e vakila. A tukuna vakalailai vua o Olivia me baleta na nona dau lomaleqa.
“E levu na tamata e tiko vei ira na ka e vakatokai na nuiqawaqawa,” a kaya o Vuniwai Posy. “Era dau lomaleqa vakalevu me vakataki iko. Ia e rawa ni o cakava eso na ka me vukei iko me vakalailaitaki na nomu lomaleqa. E rawa beka ni o tovolea e dua vei ira vata kei au?”
A raica o Olivia na nona ivava ka deguvacu.
O Vuniwai Posy a solia vei Olivia e dua na kato lailai. “Oqo edua na kato ni lomaleqa. Ena maroroi kina na noda lomaleqa, meda kakua ni vakasamataki ira kina,”
A vakadikeva o Olivia na kato e ligana. A sega ni vaka na irairai nidua na ka vakamareqeti.
“Ena gauna ka tarava nio rere, vola na nomu lomaleqa ena dua na tiki ni pepa ka biuta ki loma ni kato,” a kaya o Vuniwai Posy. “Qai digia e dua na gauna mo dolava kina na kato e veisiga me gauna ni lomaleqa. Kevaka o leqataka e dua na ka ni se bera na gauna ni dola kato, kaya, ‘E sega ni gadrevi meu vakasamataka na ka oqo ena gauna oqo.’”
“Sa donu,” a kaya o Olivia. O Vuniwai Posy a vukei Olivia me vola na veika e lomaleqataka vakalevu duadua, ka qai biuta ki loma ni kato.
Ena mua ni siga o ya, a basika ena vakasama nei Olivia edua na ka edau lomaleqataka. E sa tiko ena kato ni lomaleqa, a tukuna vei koya. Au rawa ni qai lomaleqataka vakamalua. A tovolea me kakua ni vakasamataka tiko. A qito vata kei ganena me kena isosomi.
Ni yaco mai na gauna ni moce, a tavaiyaya o Olivia. Na bogi edau gauna me ca kina vakalevu na nona lomaleqa. A biuta na nona kato ni lomaleqa kei na nona ivolanikalou ena yasa ni nona idavodavo ka kacivi Nana.
“Vakacava ke na sega ni mana?” a taroga o koya.
A mokoti koya o Nana. “Medaru tovolea tiko ga. Na Tamada Vakalomalagi ena vukei iko mo kunea eso tale na sala me veivuke.”
A deguvacu o Olivia. “E rairai dodonu beka meu vola oya me biu tale ga ki na kato ni lomaleqa.”
“Vakasama vinaka oqori,” a kaya o Nana. A cavuta e dua na masu vata kei Olivia. Oqori a vakavuna me vinaka cake mai vakalailai o Olivia.
Ni oti ga vakalailai nona bokoca na cina o Nana, e a nanuma cake o Olivia edua na ka e lomaleqataka. A waqaca tale na nona cina. A vola o koya na nona lomaleqa ka biuta ena kato me qai laurai e muri. A cavuta tale e dua na masu me kerea vua na Tamada Vakalomalagi me vakacegui koya.
Sa qai dolava na nona ivolanikalou ka vakaraica e dua na tikina makataki mai na nona wili ivolanikalou sema. Na kena imatai e kunea oya na Aisea 41:10. E kaya, “Kakua ni rere; niu sa tiko vata kei iko.”
E yasa ni tikina oya, a vola toka kina o Nana na “Vunau kei na Veiyalayalati 6:36.” A vakasaqara o Olivia na ivolanikalou oya ka wilika e cake. “Drau vakararavi tiko mai vei au ena vakasama kece kakua ni vakatitiqa, ka kakua ni rere.”
A vakila o Olivia na vakacegu. E kila o koya ni na rairai vakasamataka e levu na ka e lomaleqataka. Ia a solia na Tamada Vakalomalagi e vuqa na ka me vukei koya me vinaka cake kina. A sauma o Koya na nona masu. Ka sa veivuke sara vakalevu!
Droini mai vei Jennifer Naalchigar