“Kailavaki Rau na Timi Ruarua,” iTokani, Sepiteba 2024, 30–31.
Kailavaki rau na Timi Ruarua
A mataruburubu o Jayne. A sega ni vinakata me qaqa na timi kadua!
Na italanoa oqo a yaco mai na Ceva kei Korea.
A takiva tale o Jayne na otioti ni taki mai na kena supu. Mmmm. Maleka!
“Tou qito Yut Nori mada!” A kaya yani o Momo Ji-Ho.
Sa yaco tale mai na gauna vakaoqo ni yabaki! Eratou marautaka tiko na nona matavuvale na Chuseok, na siga ni Vakavinavinaka mai Korea. Nikua eratou soqoni vata na matavuvale nei Jayne me kania e levu na kakana ka qitotaka vata na Yut Nori. Na Yut Nori e a qito taleitaki nei Jayne.
Eratou a dabe wavoki kece ena fuloa. A veiraiyaki o Jayne. Na timi cava a vinakata o koya me to kina? A toso yani me lai dabe e yasa i Momo Ji-Ho. “Au vinakata meu lewe ni nomu timi!” a kaya o koya. “Edatou sa na qaqa!”
A dredre o Momo Ji-Ho. “Nio lewe ni nodatou timi, sa na rawa ni vakakina!”
A biuta o tinai Jayne na papa ni qito e lomadonu. A vukei koya o Jayne me tuvana na imau. Erau a solia e va na kau ki na timi ena qito e liu.
A qito e liu o Ana na tavalei Jayne. A viritaka cake ki macawa na kau. Na sala era tau kina ki ra na kau ena tukuna na iwiliwili ni lomanibai e rawa ni toso kina na timi ena papa ni qito. Eratou a vakatoboicu kece na kau, ka kena ibalebale nio Ana a rawata edua na Yut! A tosoya o koya na imau ni nona timi ena va na lomanibai ki liu ka qito tale.
Ia o Ana a sega ni tiko ena timi nei Jayne.
E a roqo liga o Jayne ka mataruburubu. “Au a namaka tiko me kua ni vinaka na nona viri,” a vakasolokakanataka vei Momo Ji-Ho.
“Marau tiko!” A kaya yani o Momo Ji-Ho. “E se qai tekivu na qito.” A matadredredre vua me vakayaloqaqataki koya.
Ni oti na ikarua ni qito nei Ana, e a nodratou gauna na timi nei Jayne meratou viritaka na kau. Ia eratou a sega ni tosoya na nodratou imau me vaka na iwiliwili ni lomanibai e a toso kina na timi nei Ana.
Ena veigauna yadua ni qito, eratou a kaila ka dredre na lewe ni matavuvale nei Jayne. A sarava toka o Jayne na veitosoyaki ni imau ena papa. Era a marau kece tiko.
Ka vakavo duadua ga o Jayne. E a lusi tiko na nona timi.
Sa qai yaco mai na gauna nei Jayne. E a viritaka cake na kau, ia edua ga a tau vakatoboicu ki ra. E a toso ki liu na imau ni nona timi ena dua ga na lomanibai.
E a roqo liga o Jayne. “Au sa bese!” a kailavaka mai. “Au vinakata medatou qaqa.”
Vakasauri ga, era sa vakanomodi kece. Ni rai cake yani, a raica niratou wadravi koya toka mai na nona matavuvale. E vaka eratou kurabui ni sa rui cudru vakalevu.
E a wadadamu na matai Jayne. A vakila na logaloga ca ni yalona e sega ni marau vata kei na nona matavuvale. A sega ni dau cudru sara vakaoqo o koya. A tucake o koya me biuta na iwirini.
A dodoliga yani vua o Momo Ji-Ho. “E sega ni dodonu mo lako,” a kaya o koya. “Na qaqa edua walega na tiki ni qito. Tovolea ga mo marau.”
“Sa donu.” A dabe tale o Jayne. E vinakata o koya me marau me vakataki iratou na kena vo. A cegu levu o koya ka saravi Ben na tavalena ni viritaka cake na kau.
“E viri vinaka, Ben!” A kaya yani o Momo Ji-Ho. A rogo mamarau na domona.
A raici Momo Ji-Ho o Jayne ena kurabui. A kailavaka tiko okoya na timi kadua! E rairai oya beka na vuna a marau tiko kina vakalevu.
Ni tekivu na gauna ni qito ka tarava, a nanuma o Jayne me kailavaki ira kece na lewe ni timi ruarua. E dina o Momo Ji-Ho. Na qaqa edua walega na tiki lailai ni qito. O Jisu e rawa ni vukei koya me marau ena vukudra na nona lewe ni matavuvale kevaka sara mada ga e lusi o koya.
Ni gauna tale nei Ana, a matadredredre yani vua o Jayne. “Mo kalougata! Ona rawata.”
Mai na tai ni iwirini kadua, e a dredre lesu mai o Ana. A vakila o Jayne na katakata ni lomana. Sa tekivu me marau mai o koya!
Droini mai vei Uran Duo