“Siga Vakavucesa vei Peteriki,” iTokani, Sepiteba 2024, 10–11.
Siga Vakavucesa veiPeteriki
Erautou dau osooso tu ga na tuakai Peteriki ka sega ni vakayagataka vata kei koya edua na gauna.
Na italanoa oqo a yaco mai Amerika.
E wadrava cake o Peteriki na doka ni vale ni davo toka ena nona idavodavo. A sega ni kila na ka me cakava o Koya. Sa wilika oti na nona ivola baleti ira na manumanu, ladelade ena vanua ni lade, ka vodo basikeli wavokita na nona itikotiko. Na cava ena rawa ni cakava oqo?
A tucake o Peteriki ka lako ki na rumu nei Taniela na tuakana. “O rawa ni qito vata kei au?” A taroga o Peteriki.
“Vosota, e sega ni rawa. O au na vuli lesoni mada,” a kaya o Taniela. E sega mada ga ni rai cake mai na ivola e wilika tiko.
A yacovi Peteriki edua na yalolailai. O Taniela sa vuli tu ga. E sega beka ni rawa ni dau vakacagicagi?
Veitalia ga. E osooso o Taniela, ia e rawa vei Peteriki me taroga na tacina kadua, o Simioni. “E sega ni dua na ka au cakava tiko. E rawa beka nio qito vata kei au?” A taroga o Peteriki.
“Sega, sega nikua. Au na lako vata kei ira noqu itokani.” A daramaka o Simioni na nona jakete ka curu yani e katuba e liu.
A cudru vakalevu sara o Peteriki! A totolo na tavatukituki ni nona uto. Eratou dau osooso tu ga na tuakana ka sega ni vakayagataka vata kei koya edua na gauna. A cici ki na nona rumu ka sogota vakaukauwa na katuba.
“E sega ni dodonu na ka oqo! A vakasamataka o Peteriki.
A vakabutubutu ka davo sobu ena nona idavodavo. E vakila ni tadre na serena. A sa sega sara ga ni kila na ka me cakava! Ia e a cudru sara ga vakalevu me nanuma kina edua na ka me cakava.
A qai nanuma mai edua na ka a vulica mai koronivuli. A vakavulica vei ira na nona qasenivuli ni nodra cegu vakatitobu ena rawa ni vukei ira mera yalo vakacegu.
“E dredre me vakavinakataki edua na ka nio cudru tiko,” a kaya o koya. E rairai kevaka me a malumu tiko, ke a rawa ni vakasamataka o Peteriki e dua na sala me walia kina na nona leqa ni masa.
Sa qai taura o Peteriki e dua na icegu levu, ka titobu. Qai taura edua tale. Ni oti e vica tale, a vakila ni sa oti na tadre ni serena. Ia e se sega tikoga ni kila na ka me cakava.
A dabe cake ka raica na iyaloyalo kei Jisu Karisito ena nona lalaga. Na cava ena vinakata o Koya me cakava o Peteriki?
E a tekiduru o Peteriki. “Tamaqu Vakalomalagi, yalovinaka ni vukei Taniela ena nona vuli-ka,” a kaya o koya. “Vukei Simioni me marau vata kei ira nona itokani. Ka vukei au meu kakua ni masa vakalevu.”
Ni tinia na nona masu, a lako mai vei Peteriki edua na vakasama. A cici sobu yani ki na rumu nei Taniela.
“Taniela, ni sa oti nomu vuli-ka, e rawa ni daru qito vata?”
A rai cake mai o Taniela mai na nona ivola ki na kaloko e lalaga. “Au na cegu ena loma ni 30 na miniti mai oqo. Sa na qai rawa nidaru lako i tautuba. “O na via cakava oya?”
“Io!” A matadredredre o Peteriki ka cici lesu ki na nona rumu. A kunea e dua na ivola ni manumanu me baleti ira na taika ka dau taleitaka me sarava. Ni oti nona wilika vakalailai, a qitora na buloko. Sega ni dede sa yaco mai na gauna, ka rau gole yani kei Taniela ki na veikau volekata na nodratou vale.
“O vinakata beka mo qitotaka na ivalu e macawa se o ira na dauvakadidike ena veikau?” A taroga o Taniela.
“Dua ga e rawa. Au marau ga ni rawa nidaru vakayagataka vata edua na gauna. E vinaka cake sara mai na sega ni cakava edua na ka,” a kaya o Peteriki.
A dredre o Taniela. “Io, na qito vata kei iko e lasa cake mai na vuli lesoni baleta na veitarogi.”
A marau o Peteriki ni rau qasi vata kei Taniela e loma ni veico. Nona taura vakamalua na nona icegu a vukei koya me vakasama vakamakare cake me walia rawa kina na nona leqa. Ka a vukei koya na Tamada Vakalomalagi me vakataki Jisu Karisito vakalevu cake. E a vuki me dua na siga vinaka e muri.
Droini mai vei Linh My Nyguyen