Volai mai vei Kemuni

Senikau Vua ka Tiko Volekati Au

Mai vei Peter E., yabaki 10, Utah, Amerika

Ena vica na yabaki sa oti, a mate kina na watina tagane na noqu neiba. A rarawa dina o koya.

Au kila na cava e vakilai ni mate e dua o lomana. Niu se qai yabaki tolu ga, a mate o tinaqu. Ni oti nona mate, era a volavola vei au kei taciqu o ira na gone ena neitou itikotiko ka ukutaka na neitou lomanibai ena iyaya ni vakatatalo. Au a vinakata meu cakava e dua na ka vinaka vakaoya vua na noqu neiba.

Au a masulaka meu kila na cava meu cakava meu veivuke kina. A votu mai ena noqu vakasama meu solia vua na senikau ena Siga ni Valentine. Ia, au gadreva meu rawata na ilavo me voli kina na senikau. Au cakava e dua na lalawa ena iVoladusidusi ni Gonelalai meu rawata kina na ilavo.

Au rawata na ilavo ena noqu cakava na cakacaka duidui eso vei ira na tani. A saumi au o buqu meu vakasavasavataka na nona iteitei kei na draunikau ena nona lomanibai. E vale, au a rawa ilavo ena noqu wereca na kau e daku ni neitou vale ni maroroi yaya. E a taura e vica na vula ni cakacaka vakaukauwa me rawati kina na ilavo oya.

Kena itinitini a tiko vei au na ilavo veirauti meu lako ki na dua na sitoa ka volia na senikau. A yaco mai na Siga ni Valentine, kau solia vei noqu neiba na senikau kei na dua na ivola. A marau vakaidina o koya. Au a vakila na katakata kau marau tale ga. Au a vakavinavinaka vua na Tamada Vakalomalagi ni a vukei au meu cakava na ka e vinakata o Koya meu cakava.

Droini mai vei Dave Klüg