“Na Cakacaka Ni Vakadidike,” iTokani, Sepiteba 2024, 18–19.
Na Cakacaka Ni Vakadidike
“E vinakata na Tamada Vakalomalagi meda tovolea tiko ga.”
Na italanoa oqo a yaco mai Amerika.
A sovara o Bradley e dua tale na bilo nuku ki na nona vokete. Ena gadreva o koya e levu sara na nuku!
Sa roro voleka tiko mai na siga ni vakaraitaki-ka e nona koronivuli. A cakava tiko o Bradley e dua na cakacaka ni vakadidike ka vakaraitaki kina na sala edau yaco kina na ua-loka. A vulica o koya ni ua-loka e dua na ua ni waitui vakaitamera ka vu mai na dua na uneune e wasa titobu. A vinakata o koya me vinaka sara na nona vakadidike. Ena rawa beka ni rawata o koya edua na icocovi!
Ni sa sinai na nona vokete, a vakasoqona o Bradley eso na kau. A qai e kunea o koya edua na vokete palasitika kei na so na vale lalai ni vakatatalo e ruku ni vale.
A sovara o Bradley na nuku ki na vokete me cakava kina na vanua mamaca. A tuvai ira vakamaqosa na vale kei na vunikau o koya. Qai tarava mai na tikina taleitaki—na wai! Ni sa sovara oti yani, sa rawa vua me biliga e dua na tiki ni kateni e loma ni wai me bulia kina na ua.
Ia a qai cakava e dua na cala levu. A sovara vakasivia o koya na wai! Era a luvu na vale—ka se bera mada ga ni cakava na ua. Na nuku suasua e a bulia edua na soso kabikabi qai duka.
A kacivi tinana o Bradley e valenikuro. “Na cava meu cakava qo? Au a biuta vakalevu kina na wai.”
“Sega nidua na ka qori. E rawa ni o tekivu tale,” a kaya o Nana. “Medaru cakava vata ka sovara vakalalai na wai ena dua na gauna.”
“Sa donu.” A vakacuva na uluna o Bradley ka gole ki tautuba me kauta mai eso tale na nuku.
Ena gauna oqo erau vakarautaka vakavinaka na levu ni wai ka sova yani. A yavalata na kateni o Bradley ka sarava na ua ni coqa na nuku. E cakacaka!
A tarava yani nodrau cakava o Bradley kei Nana na nona ivolakabi. A tekivu me vola eso na dina lasa me baleta na ua-loka. Ia na vosa e a sega ni veirauti kei na tabanipepa.
“Au sega ni via vola tale!” A kaya o Bradley. Sa tekivu me mosi na uluna.
“E sega ni vinakati medaru volai ira kece tale,” a kaya o Nana. “E rawa nidaru vakalekalekataka me rauta na taba ni pepa.”
A kudru o Bradley. Na nona ivolakabi a sega ni vaka na iraira ni kena a vinakata o koya. “Au sega ni via cakava na ka oqori. Ena rairai ca kevaka ena sega ni rauta vinaka na draunipepa na vosa.”
“Na vuli e rawa ni dredre.” A mokoti koya o Nana. “Ena so na gauna eda na caka cala. Ia na ka bibi oya meda kua ni soro. E vinakata na Tamada Vakalomalagi meda tovolea tiko ga. Me daru cegu mada ka qai vakacavara ena mataka lailai.”
Ena mataka ka tarava, rau a vakacavara kina na nona ivolakabi. A sega ni uasivi sara, ia a vakila o Bradley ni marautaka cake.
Sa qai yaco mai na siga ni vakaraitaki-ka. A lai biuti Bradley mai koronivuli o tinana. “Nanuma tiko,” a kaya o koya, “o a cakacaka vakaukauwa ena nomu vakadidike ka vulica kina e levu na ka. Sai koya oqori na ka e bibi.”
A kauta o Bradley na nona cakacaka ni vakadidike ki na vale levu ni vakaukauwa yago. Era a sinai tu ena cakacaka ni vakadidike kei na ivolakabi. Era a dabe kece tu na kalasi va ka ra waraka tiko na gauna mera vakaraitaka kina na nodra cakacaka.
Sega ni dede sa gauna nei Bradley. A totolo na tatuki ni nona uto ni taubale yani ki liu. Vakacava ke cala na veika kece?
A biliga na kateni o Bradley e loma ni wai ka vakaraitaka vei ira na turaganilewa na kena roba na ua na vanua.
“Na cava e vakavuna na ua lelevu oqori e wasawasa?” a taroga e dua na turaganilewa.
“Na ua lelevu era sa vu mai na…” E a sega ni nanuma rawa o Bradley na ka me kaya. “Au sega ni nanuma rawa. Ia au rawa ni tukuna vei kemuni eso na dina lasa me baleta na ua-loka.” A wilika o koya na veika e volai tu ena nona ivolakabi.
Ni suka na vuli a vodo o Bradley vata kei na nona cakacaka ni vakadidike ki na motoka.
“A bau vakacava tu?” A taroga o Nana.
“Sega ni vaka sara na ka au a vinakata.” A drere o Bradley. “Ia au a cakava na noqu vinaka taucoko ka tovolea tiko ga.”
Droini mai vei Adam Koford