Dua na Veitalanoa kei Tenikamu me baleta na iVolanikalou

O Tenikamu e tiko mai Viti. Keitou a tarogi koya ena so na taro me baleta na sala e dau vuli kina mai na iVola i Momani.

Vakamacalataki iko mada.

Au sa yabaki ciwa ka gone duadua vei iratou e ono na gone. Na damudamu e noqu roka taleitaki, ka kequ kakana taleitaki na kari toa kei na raisi. Au taleitaka na qito rakavi! E dua na ka duatani me baleti au sai koya na yacaqu. Na imatai ni yacaqu e kau mai vua e dua na tamata qaqa ena iVola i Momani, na ikarua ni yacaqu e kau mai vei noqu momo mai Nigeria, kei na iotioti ni yacaqu e vaka Viti tiko.

Na cava e vukei iko ena nomu vuli mai na ivolanikalou?

Au taleitaka na wili ivolanikalou vata kei na noqu matavuvale. Keitou vuli vata mai na lesoni ni Lako Mai, Mo Muri Au . Au taleitaka na vulica na italanoa vovou eso e veimacawa. Keitou veitalanoataka na veika keitou vulica ka veiwaseitaka vakai keitou. Niu wilika na ivolanikalou, au vinakata talega meu raitayaloyalotaki e loma ni italanoa.

Era vukei iko vakacava na ivolanikalou?

Na ivolanikalou e vakananuma vei au meu yalodoudou ka yaloqaqa ka masuta na veivakacegui. Ena veigauna kece au rere kina se galili, au kila ni Yalo Tabu ena dau vakacegui au.

Na cava na nomu italanoa taleitaki mai na iVola i Momani?

Na noqu italanoa taleitaki mai na iVola i Momani sai koya na italanoa kei Tenikamu baleta ni o koya e dua na iliuliu cecere ka dau vala. A vala ena vukudra na nona matavuvale, nona itokani, kei na Lotu. Au kila ni rawa niu vakataki koya talega ka dau taqomaka na veika au lomana vakalevu duadua.

Na ivakasala cava o na solia vua e dua e dredre na nona kila na ivolanikalou?

Kevaka e dua e dredre tiko na nona vuli mai na ivolanikalou, e rawa nira tarogi tinadra se tamadra se o ira sara mada ga na tacidra me vukei ira. E dau vukei au vakaidina na noqu matavuvale. E rawa talega ni o kerea e dua na qasenivuli ni Lalai se iliuliu ena lotu!

iVakaraitaki mai vei Augusto Zambonato