“Raan Eo An Patrik Ejelimo,” Jera, Jeptōm̧ba 2024, 10–11.
Raan Eo An Patrik Ejelimo
Ļaddik ro jein Patrik rekar aolep iien boub n̄an e.
Bwebwenato in ekar kōm̧m̧an ilo USA.
Patrik ekar reilōn̄ļo̧k n̄an jiliin̄ eo ke ej babu ioon beet eo an. Ekar jelimo. Ekar dedeļo̧k an riiti bok in mennin mour ko an, ekkāke ioon trampoline eo im iuwe ioon baajkōļ eo waan ipeļaakin jikin eo ej jokwe ie. Ta eo emaron̄ kōm̧m̧ane kiiō?
Patrik ekar jerkak im etetal ļo̧k n̄an ruum̧ eo an ļaddik eo jein erūtto. “Komaron̄ ke ikkure ippa?” Patrik ekar kajjitōk.
“Joļo̧k bōd, ijjab maron̄. Ij aikuj katak,” Daniel ekar ba. Ekar jab bōk bōran jān bok eo ekar riiti.
Patrik ekar būrom̧ōj. Daniel ekar aolep iien katak. Eban baj bōk jidik iien kakkije ke?
Ekwe em̧m̧an. Daniel ekar poub, ak Patrik emaron̄ kajjitōk ippān ļaddik eo jein juon, Simion. “Ijelimo. Kwomaron̄ ke ikkure ippa?” Patrik ekar kajjitōk.
“Jaab, ejjab rainin. Ij itōn etal ippān raņ jera.” Simion ekar kōņak jacket eo an im diwōj nam̧ōjļo̧k ilo kōjam̧ eo im̧aan.
Patrik ekar lukkuun illu! Menono eo an ekar ium̧ļo̧k an bam̧. Ļaddik ro jein rerūtto rej aolep iien lukkuun poub n̄an e. Ekar ettōrļo̧k n̄an ruum̧ eo an im kappokļo̧k kōjem̧ eo.
Ejjab jim̧we! Patrik ekar ļōmņak.
Ekar katōn̄tōn̄ neen im babu ilo an illu. Ubōn ekar en̄jake an kankan Ekar lukkuun jelimo! Ekar en̄jake an lukkuun illu n̄an an ļōmņake juon men n̄an kōm̧m̧ane.
Innām ekar keememej juon men ekar ekkatak ilo jikuuļ. Rūkaki eo an ekar katakin er bwe ren bōk kitweer emaron̄ jipan̄ er ineem̧m̧an.
“Epen n̄an kōm̧m̧ane jabdewōt men n̄e kwoj en̄jake am̧ illu,” lieo ekar ba. Bōlen eļan̄n̄e ekar ineem̧m̧an, Patrik emaron̄ ļōmņake juon wāween n̄an ņamejļan inepata ko an.
Kōn menin, Patrik ekar bōk kitwōn. Innām ekar bar bōk kitwōn bar juon alen. Ālkin jejjo kōttan, ubōn ekar jako an kankan im metak. Ak ekar jab jeļā ta en kōm̧m̧ane.
Ekar jijet im reilo̧k n̄an pija in Jisōs Kraist ioon wall eo. Ta eo Enaaj kōņaan bwe Patrik en kōm̧m̧ane?
Ekar bukwelōlō ioon bukien. “Jemedwōj Ilan̄, jouj jipan̄ Daniel ilo an ekkatak,” ekar ba. “Jipan̄ Simion bwe en m̧ōņōņō ippān ro jeran. Im jouj im jipan̄ eō bwe in jab jelimo.”
Ke ekar dedeļo̧k an jar, Patrik ekar wōr juon an ļōmņak. Ekar ettōr laļļo̧k n̄an ruum̧ eo an Daniel.
“Daniel, n̄e enej dedeļo̧k kwe, kōjro maron̄ ke ikkure ippān doon?”
Daniel ekar reilo̧k jān bok eo an n̄an awa eo ioon wall eo. “Imaron̄ bōk jidik iien kakkije emaron̄ 30 minit jen kiiō. Innām jemaron̄ diwōj n̄an nam̧ōj. Kokōņaan ke kōm̧m̧ane menin?”
“Aaet!” Patrik ekar ettōn̄ dikdik im ettōrļo̧k an ruum̧ eo an. Ekar loe juon bok in menin mour kōn taikō ko ekōņaan alooji. Ālkin riit ium̧win jidik iien, ekar ikkure kōn block ko. Ejjab etto iien eo ekar m̧ootļo̧k, im e im Danie rekar jibadōkļo̧k būlen wojke ko turin m̧weo m̧weer.
“Kokōņaan ke ikkure ritariņae ro io jikin eo ak riitoitak ro ilo jan̄kōļ?” Daniel ekar kajjitōk.
“Ijjab kea. Ij baj m̧ōņōņō bwe jemaron̄ joļo̧k iien ippān doon. Em̧m̧anļo̧k jān ad jelimo̧,” Patrik ekar ba.
Daniel ekar ettōn̄ dikdik. “Ekwe, ikkure ippem ekalimomo ļo̧k jān katak n̄an juon teej.”
Patrik ekar en̄jake an m̧ōņōņō ke e im Daniel rej eddābwilbwil ioon ujooj ko. Ineem̧m̧an ekar jipan̄ e em̧m̧anļo̧k an kōļmenļo̧kjeņ bwe en maron̄ ņamejļan inepata eo an. Jemedwōj Ilan̄ ekar jipan̄ e erom̧ āinwōt Jisōs Kraist. Ekar oktak im erom̧ juon raan eo em̧m̧an āliktata.
Kōmeļeļe ko jān Linh My Nyguyen