“Būrojāāk in Science Eo,” Jera, Jeptōm̧ba 2024, 18–19.
Būrojāāk in Jain Eo
“Jemedwōj Ilan̄ ej kōņaan bwe jen kajjieon̄ wōt.”
Bwebwenato in ekar kōm̧m̧an ilo USA.
Bradley ekar lutōke bar juon kab in bo̧k n̄an lowaan bōkaj eo an. Enaaj kar aikuji elōn̄!
Sceince fair eo ilo jikuuļ eo an epaaktok. Bradley ekar kōm̧m̧ane juon m̧ōņōkjān me ekar kwaļo̧k wāween an tsunami jerbal. Ekar katak bwe juon tsunami ej juon ņo̧ ekilep ej ejaak jān juon m̧akūkūt in laļ ilo lo̧jet. Ekar kōņaan bwe būrokjāāk eo an en lukkuun jejjōt. Bōlen enaaj wiini juon kawiinin!
Ke bōkaj eo an ekar obrak, Bradley ekar aiintok jet aļaļ. Innām ekar loe juon nien kopej im jet em̧ kein ikkure jiddik ko ilo basement eo.
Bradley ekar lutōke bok eo n̄an lowaan nien kopej eo n̄an ejaake juon āne. Ekar illik em̧ ko im wōjke ko. Innām ekar itok m̧ōttan eo ekalimomo—dān eo! Ke ekar lutōke n̄an lowaan, ekar maron̄ iuni juon m̧ōttan bo̧o̧k ilo dān eo n̄an ejaak ņo̧.
Innān ekar kōm̧m̧ane juon bōd ļapļap. Ekar ļap an lutōke dān eo! Em̧ ko rekar ibwij leplep—im ekar jan̄in de kōm̧m̧an ņo̧. Bok eo etutu ekar kōm̧m̧ane juon etoon edāpdāp, epedkatkat.
Bradley ekar kūr jinen ilo jikin kōm̧m̧an m̧ōn̄ā eo. “Ta eo ij aikuj kōm̧m̧ane kiiō? Ekar ļap aō illik dān ie.”
“Ej EM̧M̧AN Wōt. Komaron̄ jino jān jinoin,” Jinen ekar ba. “Jen kōm̧m̧ane ippān doon im jon̄ake jidik ilo juon iien.”
“Em̧m̧an.” Bradley ekar totoiki bōran im diwōj nam̧ōjļo̧k im bōktok bar jet pok.
Iien in rekar lukkuun tiljek jon̄e jon̄an dān eo ejim̧we im lutōke ilowaan. Bradey ekar kōm̧akūt peba eo im alooje an ņo̧ ko pun̄ ioon pok ko. Ejerbal!
Innām Bradley in Jinen rekar jerbale ioon peba kileplep eo an. Ekar jino jeje jet m̧ool ko rekalimomo kōn tsunamis. Bōtaab naan ko rekar jab pād aolepāer ilo peij eo.
“Ijjab kōņaan in bar je aolep!” Bradley ekar ba. Bōran ekar jino metak.
“Jejjab kōņaan bar jet aolepāer,” Jinen ekar ba. “Jemaron̄ baj kōraki naan ko bwe ren jeje ioon peij eo.”
Bradley ekar ellotaan. Poster eo an ekar jab āinwōt kōņaan eo an. “Ijjab kōņaan kōm̧m̧ane men ņe. Enaaj nana ad lale eļan̄n̄e naan ko reban jejjet.”
“Katak emaron̄ pen.” M̧am̧a ekar atbakwōje. “Jet iien jej kōm̧m̧an bōd. Ak men eo eaorōk ej bwe jen jab ebbweer. Jemedwōj Ilan̄ ej kōņaan bwe jen kajjieon̄ wōt. Kōn menin jen bōjrak jidik im kam̧ōje ilju jibbon̄.”
Jibbon̄ eo juon, rekar kam̧ōje poster eo an. Ekar jab wājabdik, ak Bradley ekar en̄jake ke em̧m̧an.
Āliktata raan in science fair eo ekar bōk jikin. Jinen ekar joļo̧k Bradley ilo m̧ōn jikuuļ eo. “Keememej,” ekar ba, “kwaar lukkuun jerbale būroojāāk eo am̧ im kar lukkuun ekkatak elōn̄ men. En̄in ej ta eo eaorōk.”
Bradley ekar ineekeļo̧k būroojāāk eo an n̄an jikin ikkure eo. Ekar obrak kōn būroojāāk ko im poster ko. Aolep kūlaaj emān ro rekar jijet im kōttare iien eo aer n̄an aer kwaļo̧ke būroojāāk ko aer.
Ejjab etto ekar iien eo an Bradley. Menono eo an ekar m̧ōkaj an bam̧ ke ej wōnm̧aanļo̧k n̄an m̧aan. Ta eo eļan̄n̄e men otemjej renej bōd?
Bradley ekar iuuni peba eo an jān dān eo im kar kwaļo̧k n̄an riekajet ro wāween an ņo̧ ko itaak ilo āne eo.
“Ta eo ekar ejaake ņo̧ ko rekillep ilo dān eo?” juon iaan riekajet ro ekar kajjitōk.
“No̧ ko rekillep rekar ejaak jān . . .” Kōļmenļo̧kjeņ eo an Bradley kun. “Ijjab maron̄ keememej. Ak imaron̄ jiron̄ eok jet m̧ool ko rekalimomo kōn tsunamis ko.” Ekar riit m̧ool ko ioon peba kileplep eo an.
Ālkin jikuuļ, Bradley ekar tallōn̄e wa eo waan kōn būroojāāk eo an.
“Ejet am̧ kar kōm̧m̧ane?” M̧am̧a eaar kajjitōk.
“Ekar jab jejjet āinwōt aō kar kōņaan.” Bradley ekar ettōn̄ dikdik. “Ak ikar kōm̧m̧ane jon̄an eo em̧m̧antata imaron̄e im kajjieon̄ wōt.”
Kōmeļeļe ko jān Adam Koford