Itok, Ļoor Eo M̧akūtkūt ko

N̄an nokon in jota ak ekkatak jeje ko rekwojarjar—ak n̄an baj kam̧ōņōņō!

O̧kwōj 26–Jeptōm̧ba 1

Pedped ko Rekajoor

N̄an Hilamōn 1–6

Hilamōn ekar katakin ļaddik ro nejin kalōk mour ko aer ioon pedped ko rekajoor an Jisōs Kraist (lale Hilamōn 5:12). Juon pedped ej ta eo juon men ej ekkal ioon. Juon pedped ekajoor ej kōm̧m̧an an aolep m̧weo kajoor, men̄e ļan̄ ko. Kalōk ruo tawōr ko—juon ioon juon pedped ekajoor im juon ioon juon pedped em̧ōjņo̧. Tawōr ta eo eļapļo̧k an pen? Ewi wāween ad kalōk pedped in mour ko ad ioon Jisōs Kraist?

N̄an ajri ro reddikļo̧k: Jipan̄ ro nejūm̧ reddik pukot juon men rej ļōmņak elukkuun kajoor. Ta eo rekar loe? Katakin bwe jemaron̄ erom̧ kajoor kōn Jisōs Kraist.

Jeptōm̧ba 2–8

Naan in kam̧ool eo an Kraist

N̄an Hilamōn 7–12

Elōn̄ armej ilo jeje ko rekwojarjar rekar katakin im kam̧ool kōn Jisōs Kraist (lale Hilamōn 8:16–20). Komaron̄ jino kalōk naan in kam̧ool eo an kōn E barāinwōt! Juon naan in kam̧ool ej juon men eo kwoj tōmak ie ak jeļā bwe ej m̧ool kōn Jemedwōj Ilan̄ im Jisōs Kraist. Je naan in kam̧ool eo am̧ im kamminene kwaļo̧ke ippān baam̧le eo am̧ ak ro jeram̧.

N̄an ajri ro reddikļo̧k: Kajjitōk ippān ajri ro nejūm̧ reddik kōn ta eo rej iakwe kōn Jisōs Kraist. Innām kwaļo̧k am naan in kam̧ool kōn Rilo̧mo̧o̧r eo ippāer.

Jeptōm̧ba 9–15

Samuel Ej Tallōn̄e Wōrwōr Eo

N̄an Hilamōn 13–16

Samual ekar juon rikanaan eo ekar katakin kōn Jisōs Kraist ioon lōn̄in juon wōrwōr (lale Hilamōn 13:4). Etal n̄an peij 12 im kōm̧m̧ane juon annan̄ kōm̧m̧an jen pepa n̄an jipan̄ eok kwaļo̧k bwebwenato eo an Samuel.

N̄an ajri ro reddikļo̧k: Jibwe ajri ro nejūm̧ reddik ilo aer jutak ioon juon jea im kwaļo̧ke ta eo rejeļā kōn Jisōs Kraist, āinwōt an Samuel kar kōm̧m̧ane.

Jeptōm̧ba 16–22

Ikkure in Aiintok Doon

N̄an 3 Nipai 1–7

Jisōs Kraist ekar kallim̧ur bwe Enaaj kar aiintok aolep ajri ro Nejin kōnke Ej iakwe aolep im ekōņaan bwe er ren bōk gospel eo (lale 3 Nipai 5:24). Ikkure juon ikkure kōn aiintok doon. Kōm̧m̧an bwe rikkure ro ren jutak ilowaan juon doulul. Juon armej ilo pād ioļapļap ej ba juon men em̧ool kōn er make, āinwōt kōļar eo aer em̧m̧antata. Eļan̄n̄e naan eo em̧ool ippān aolep, er rej itok n̄an ioļapļap barāinwōt. Wōnm̧aanļo̧k wōt m̧ae iien aolep rej aiintok doon ilo ioļapļap.

N̄an ajri ro reddikļo̧k: Ikkure kitileek im kappukote ippān ajri ro reddik. Bakwij er n̄e kwoj lo er. Kōnono kōn wāween an Jisōs Kraist kallim̧ur bwe Enaaj aiintok kōj jekdo̧o̧n ia eo jej pād ie.

Jeptōm̧ba 23–29

Jisōs Ej Meram Eo

N̄an 3 Nipai 8–11

Jisōs Kraist ej “meram eo im mour eo an laļ” (3 Nipai 9:18). Alooje ippān baam̧le eo am̧ juon iien an aļ tak ak tulo̧k. Innām jin̄aiki juon pija kōn ta eo kwaar loe. Ilo iien eo kwoj jin̄a, kōnono kōn un ko kwoj iakwe Jisōs Kraist im ewi wāween An bōktok n̄an eok meram.

N̄an ajri ro reddikļo̧k: Diwōj nam̧ōjļo̧k im lale meram ko roktak, āinwōt aļ, iju ko, ak allōn̄. Kajjitōk ippān ro nejūm̧ reddik ewi wāween aer en̄jake kōn meram eo. Kōnono kōn wāween an Jisōs Kraist ej meram eo ad.

Kōmeļeļe ko jān Katy Dockrill