“Ngāue Lahi,” Ki Hono Fakamālohia ʻo e Toʻu Tupú, Sānuali 2021, 20–21.
Ko Ha Ngāue Lahi
Kaveinga ʻa e Toʻu Tupú ki he 2021:
Tokāteline mo e Ngaahi Fuakava 64: 33–34
Kuo fakaafeʻi koe ʻe he ʻEikí ke ke kau ʻi he “ngāue maʻongoʻonga taha ” ʻi he māmaní.1
ʻOku mou kau ʻa kimoutolu kau finemui mo e kau talavou fakaʻofoofa ki ha meʻa ʻoku fakaofo—ʻoku mou “ʻai ʻa e tuʻunga ʻo ha ngāue lahi” (Tokāteline mo e Ngaahi Fuakava 64:33). ʻOku tokoni ʻa e ngāue ko iá ki he ʻEiki, ko Sīsū Kalaisí, ke fakahoko ʻEne misioná ʻi heʻetau kau atu ki hono tānaki fakataha ʻo ʻIsileli ʻi he ongo tafaʻaki fakatouʻosi ʻo e veilí mo hono langa ʻo Saioné.
Kau ki he Kau Tau Kei Talavoú
Kuo fakaafeʻi ʻe Palesiteni Lāsolo M. Nalesoni ʻa kimoutolu kotoa ke mou kau ʻi he ngāue ko iá ko ha konga ʻo e “kau tau kei talavou ʻa e ʻEikí.”2 Ka ko e hā ʻa e kau tau? Ko e kau taú ko ha ʻiuniti makehe ia naʻe fakataumu‘a ke fakahoko fakataha ha ngaahi fatongia pau. ʻOku ʻuhinga ia ʻoku mou kau ki ha ʻiuniti makehe ke kumi mo fakahoko homou fatongia ʻo he ngāue maʻongoʻonga ʻa e ʻEikí.
ʻI he taimi naʻe fakaafeʻi ai koe ʻe he palōfitá ke vakai ki he taumuʻa hoʻo moʻuí ʻaki ʻa e tokanga taha ki hono tānaki fakataha ʻo ʻIsilelí, ne kamata ke hangē hoʻo moʻuí ko e moʻui ʻa Mōsesé. Ko Mōsese, ʻa ia ne ohi hake ko ha pilinisi ʻo ʻIsipité, naʻe pau ke hola koeʻuhi ko ʻene moʻuí pea kimui angé naʻá ne hoko ʻo fiemālie pē ʻi heʻene moʻui faingofua ko hono tokangaʻi e fanga sipí. Ka ne ui ʻe he ʻEikí ia mo folofola ange, “ʻOku ʻi ai haʻaku ngāue ke ke fai” (Mōsese 1:6). Naʻe ʻafioʻi ʻe heʻetau Tamai Hēvaní ʻa e meʻa naʻe ʻikai ʻiloʻi ʻe Mōsesé: ʻe lava ʻe Mōsese, fakataha mo e tokoni ʻa e ʻOtuá, ʻo hoko ko ha meʻangāue ʻi hono fakahaofi ʻo ha puleʻanga lahi—te ne lava ʻo fai ha faʻahinga meʻa pē.
Te Ke Lava ʻo Fai ha Liliu
Mahalo pē te ke fifili, “ʻOku ʻikai ko Mōsese au. ʻE lava nai ke u fai ha liliu ʻi he māmani ko ʻení?” Kuo mau ongoʻi ʻa e meʻa tatau pē ʻi ha ngaahi taimi, ka kuo mau moʻui ʻo fuoloa feʻunga ke ʻilo ko e talí ko e ʻio. Kuo mau vakai ʻi he ʻaho kotoa pē ki ha toʻu tupu angamaheni ʻoku nau fili ke ʻoua te nau moʻui ʻi he founga angamahení. ʻOku nau fakahoko ha tākiekina mālohi kiate kinautolu ʻoku nau feohí ʻaki ʻenau hoko fakalongolongo pē ko ha kau ākonga moʻoni ʻo Sīsū Kalaisi. ʻOku nau fakatupulaki honau ngaahi talēnití mo tokoni ki honau ngaahi fāmilí ke lavameʻa. ʻOku uiuiʻi koe ʻe ha palōfita ke “ʻai ʻa e tuʻunga ʻo ha ngāue lahi.” ʻI heʻetau falala kia Sīsū Kalaisi mo feinga ke fai Hono finangaló, ʻoku tau fai ai ha liliu!
ʻOku ʻikai te ke tuenoa he ngāué ni. ʻI hoʻo kau ki he kau tau ʻa e ʻEikí, ʻokú ke kau fakataha mo ha kulupu toʻu tupu tokolahi ʻi he funga ʻo e māmaní. ʻOku mau tuʻu mo kimoutolu ʻi homou tafaʻakí fakataha mo hoʻomou ngaahi mātuʻá, kau takí mo e ngaahi kaungāmeʻá, kau ʻaposetoló mo e kau palōfitá pea mo e kau ʻāngelo ʻo e langí, ʻi he faifeinga kotoa ke fakahoko ʻa e ngāue ʻa e ʻEikí (vakai, Tokāteline mo e Ngaahi Fuakava 84:88).
ʻOku Tupu mei he Ngaahi Meʻa Īkí ʻa e Ngaahi Fuʻu Meʻa Lalahí
Te tau fakahoko māmālie ia. ʻOku fakaafeʻi kitautolu ʻe he ʻEikí ke tau kaka ʻi he fanga kiʻi sitepu iiki mo faingofuá ʻi heʻetau fai ʻa e ngāue maʻongoʻonga ko ʻení (vakai, Tokāteline mo e Ngaahi Fuakava 64:33). Ko e ngaahi ngāue tui faivelenga mo fakahoko maʻu peé, te ne teke kitautolu ki muʻa mo fakaafeʻi kitautolu ke tau ala atu ʻo tokoniʻi ʻa kinautolu ʻoku tau feohí. ʻE lava ke fakafeʻungaʻi ha niʻihi ʻo e ngaahi meʻa faingofuá ni ke fakafoʻituitui pē kiate koe koeʻuhí he ʻikai ke tatau ʻa e fononga ʻa e tokotaha kotoa pē.
Lotu ke ʻiloʻi pe ko hai koe peá ke mahino kiate koe ho fatongia fakafoʻituitui ʻi he palani ʻa e ʻOtuá. Lotu ke ʻilo ʻa e ngaahi meʻa iiki mo faingofua ʻoku totonu ke ke fai he ʻaho takitaha. Mahalo ʻe fie maʻu ke ke mavahe mei he meʻa ʻokú ke anga ki aí, ka ʻi hoʻo loto-vēkeveke ke ngāue ʻo fakatatau mo e ngaahi ueʻi ʻokú ke maʻú, ʻe foaki atu ʻo lahi ange.
Hangē ko ia ne akoʻi mai ʻe Palesiteni Nalesoní: “ʻI heʻetau feinga ke hoko ko e kau ākonga ʻa Sīsū Kalaisí, ʻoku fie maʻu ke lahi ange e taumuʻa ʻo ʻetau feinga ke fanongo kiate Iá. ʻOku fie maʻu ha ngāue ʻiloʻi pau mo hokohoko ke fakafonu ʻetau moʻui fakaʻahó ʻaki ʻEne folofolá, ʻEne ngaahi akonakí, mo ʻEne ngaahi moʻoní.”3
ʻE Fakalahi ʻe he ʻEikí Hoʻo Ngaahi Ivi Malavá mo Fakatupulaki Hoʻo Fiefiá
ʻI hoʻo fekumi ki he fakahaá, ʻe tataki koe ʻe he ʻEikí ke ʻilo ʻa e founga hono fakaʻaongaʻi hoʻo ngaahi talēniti fakafoʻituituí mo e tōʻongá ke ngāue mo moʻui ʻaki e ongoongoleleí. Te ne fakalahi atu hoʻo fakakaukaú, mohu foungá mo e ivi malavá ʻi ha ngaahi founga naʻe ʻikai te ke teitei pehē ʻe malava.
ʻI hoʻo ʻoatu ki he ʻEikí ʻa ho loto mo e ʻatamai fie ngāué, te ke ʻilo ai ha ngaahi kaungāmeʻa lahi ange mo ha ngaahi faingamālie lahi ange ke ngāue tokoni. ʻE fakamālohia ho ongoʻi ʻoku ʻi ai ha tuʻunga mo e taumu‘á, pea te ke maʻu ʻa e fiefiá.
Mahalo te tau ongoʻi nonga pē he ngaahi taimi ʻe niʻihi ke tau nofo fakafiefiemālie, ka ʻoku fakakaukau e ʻEikí ki ha meʻa kehe. ʻOku ʻi ai Haʻane ngāue maʻongoʻonga maʻau hangē ko e ngāue maʻongoʻonga naʻá Ne maʻu maʻa Mōsesé. ʻOua naʻá ke fiu he faileleí! ‘Oku mau maʻu ʻa e loto-falala kakato kiate kimoutolu—ko e kau tau kei talavou ʻa e ʻEikí.