Sikolasipi Fakamalu-ʻa-Tēvoló

Fai ʻe Jun Hori

Ko e hā ha ngaahi lēsoni te u lava ʻo ako mei ha meʻa palakū hangē ko e fakamalu-ʻa-tēvoló?

Tā ʻa Julia Yellow

ʻOku ʻikai ke u saiʻia ʻi he fakamalu-ʻa-tēvoló. ʻA hono nanamu mo hono faʻunga—ʻoku ʻikai ʻaupito haʻaku teitei saiʻia ai! Ka naʻe kamata ngoueʻi heʻeku ongomātuʻá e fakamalu-ʻa-tēvoló ʻi heʻeku kei siʻí, ko ia ai ne mau kai ia ʻi heʻemau ngaahi houa maʻu meʻatokoni he ʻaho kotoa pē. ʻI he lolotonga ʻo e faʻahitaʻu ututaʻú, ne u tokoni ki heʻeku ongomātuʻá ʻo aʻu ki he tuʻuapoó. Ne u fua ha kalami ʻe 200 ʻo e fakamalu-ʻa-tēvoló, faʻo ia ʻi ha milemila pea silaʻi e fakamaʻu he kofukofú. ʻOku ou manatuʻi ʻeku fiefia lolotonga ʻeku talanoa mo hoku fāmilí. Naʻe meimei hangē pē ia ha efiafi fakafāmili ʻi ʻapi he ʻaho kotoa pē.

Ne maʻu foki ai e paʻanga hū mai ʻa e fāmilí, ko ia ai ne pau ke mau tokoni. Ka naʻe ʻi ai ha tafaʻaki ʻe ua ne ʻikai sai: ʻUluakí, naʻe hulu e taha ʻo e ngaahi polokalama televīsone ne u saiʻia taha aí ʻi he taimi ne pau ke mau ngāue aí, ko ia ai ne ʻikai ke u lava ʻo sio ai. Pea ko hono uá, ko e taimi ne ʻosi ai ʻeku ngāué, ne ʻuliʻuli hoku ongo nimá mei he fakamalu-ʻa-tēvoló, pea naʻe faingataʻa ke toʻo ʻa e lanú mo e nanamú ʻaki ʻa e koá. ʻI heʻeku kei siʻí, naʻá ku faʻa lāunga pe ko e hā ne pau ai ke u tokoni lahi ʻaupito he ʻaho kotoa peé.

Ne ʻomi ʻe he ʻū fakamalu-ʻa-tēvoló ha paʻanga hū mai lelei ʻi ha kiʻi vahaʻataimi, ka naʻe holo hifo e mahuʻingá ʻi he fakaʻau ke tokolahi ange ʻa e kau faama fakamalu-ʻa-tēvoló, pea naʻe ʻikai ke toe ngoueʻi heʻeku ongomātuʻá ʻa e fakamalu-ʻa-tēvoló. Naʻá ku fakakaukau ne na taʻofi pē koeʻuhí ko e holo hifo ʻa e mahuʻingá, ka ne u ako ha moʻoniʻi meʻa ne fakaofo kiate au ʻi he taimi ne u ʻosi ai mei he ʻunivēsití.

Ne kamata ngoueʻi heʻeku ongomātuʻá ʻa e fakamalu-ʻa-tēvoló ke tātānaki ha paʻanga ako ʻunvēsiti maʻaku mo hoku ongo tuongaʻané. Naʻá na taʻofi pē koeʻuhí kuó na maʻu e lahi ʻo e paʻanga ne na fakataumuʻa ki aí. ʻI he taimi ne u ʻiloʻi aí, ne u ongoʻi mā ʻi he faʻa lāungá. Naʻe ʻikai ke u ʻilo ne u ngāue pē maʻá e ngaahi fakamole ki heʻeku ʻunivēsiti he kahaʻú. Pea hiliō aí, kuo tokoniʻi au ʻe hoku fāmilí!

Ne u toutou lāunga pē mo e taʻeʻilo ne mau ngoueʻi ʻa e fakamalu-ʻa-tēvoló maʻá e sikolasipi pē ʻaʻakú. Naʻe hangē ʻeku lāungá ko Leimana mo Lemiuela ʻi he 1 Nīfai 2:12: “Pea naʻe pehē ʻa e lāunga ʻa Leimana mo Lemiuela … naʻá na lāunga koeʻuhi ko e ʻikai te na ʻiloʻi ʻa e ngaahi fengāueʻaki ʻa e ʻOtua ko ia naʻá ne fakatupu ʻa kinauá.” ʻOku ou fiefia lahi ʻoku ʻafioʻi lelei au ʻe he ʻEikí mo tāpuekina au, neongo ʻeku lāungá.

ʻOku ʻikai ke u tui te u teitei saiʻia hono kai e fakamalu-ʻa-tēvoló. Ka ʻo kapau ne taʻeʻoua e fakamalu-ʻa-tēvoló, ko e moʻoni te u kiʻi loto-mamahi, koeʻuhí he ʻikai te u maʻu ha faingamālie ke manatuʻi e ngaahi aʻusia ko ia mo hoku fāmilí. Koeʻuhi ko kinautolu, kuó u ako ke fakamahuʻingaʻi ʻa hoku ngaahi tāpuakí pea falala ki he palani ʻa e ʻEikí—pea ʻoua ʻe lāunga! Ko ia ai neongo ne ʻikai ke u saiʻia he fakamalu-ʻa-tēvoló, ka ʻoku ou houngaʻia ai he taimí ni. Ko ha fakaʻilonga mahuʻinga ia ke u manatuʻi ai hoku ngaahi vā fakafāmilí.

ʻOku nofo e tokotaha naʻá ne faʻú ʻi Sinakaua Siti, Siapani.