“Ko Hono Taukapoʻi ʻEku Tuí,” Ki Hono Fakamālohia ʻo e Toʻu Tupú, Sānuali 2021, 27.
Ngaahi Makatuʻunga Mālohi
Ko Hono Taukapoʻi ʻEku Tuí
Tā fakatātā ʻa Luca Di Bartolomeo
ʻI ha pō ʻe taha ne u feohi mo ha niʻihi ʻo hoku ngaahi kaungāmeʻá. Ne mau fepōtalanoaʻaki, pea naʻa nau kamata ke lauʻi hoku ngaahi kaungāmeʻa kehe ne ʻikai ke mau ʻi aí. Naʻá ku ongoʻi taʻefiemālie ki he meʻa naʻa nau lea ʻakí. Ne u maʻu leva ha ueʻi mei he Laumālié ʻoku totonu ke u taukapoʻi e meʻa ʻoku ou tui ki aí.
Ne ʻikai ke u toe momou, naʻá ku talaange ʻoku ʻikai ke u fuʻu ongoʻi fiemālie ʻi he meʻa ʻoku nau talanoaʻí peá u kole ange ke ʻoua muʻa te nau ngutu lau ʻi he taimi ʻoku mau feohi aí. Naʻa nau talamai ko ha konga pē ia ʻo e mo‘uí pea ʻoku ʻikai mahuʻinga ia. Ne ʻikai ke u ʻita ai, ka naʻá ku fanongo ki heʻenau fakakaukaú peá u fakamatala leva ʻa e meʻa ʻoku ou tui ki aí. Hili iá peá u tuʻu hake leva ʻo ʻalu.
Ne hoko ʻeku aʻusia he pō ko iá ke u fakakaukau ai ki he aʻusia ne foua ʻe Siosefa Sāmitá. ʻI he taimi ne maʻu ai ʻe Siosefa Sāmita ʻa e ʻū lauʻi peleti koulá, naʻá ne aʻusia ha fakatanga lahi. Neongo e lahi e fakatanga ne hokó, ka ne kei tuʻu ʻaliʻaliaki pē ʻa Siosefa Sāmita pea naʻe ʻikai ke ne loto-foʻi. Naʻe kau fakataha mo tokoniʻi ʻe he ʻOtuá ʻa Siosefa Sāmita pea naʻá ku ʻiloʻi ne kau fakataha foki ʻa e ʻOtuá mo au ʻi he taimi ne u taukapoʻi ai ʻa e moʻoní.
Naʻe mole haʻaku ngaahi kaungāmeʻa he pō ko iá koeʻuhi ko ʻeku taukapoʻi ʻeku tuí, pea naʻá ku loto-mamahi ai. Ka naʻá ku ongoʻi ʻa e nonga mo e fiemālie ʻi hono fai e me‘a naʻe totonú. Kimui angé, ne fakamālō mai ha taha ʻo hoku ngaahi kaungāmeʻá koeʻuhi ko e meʻa naʻá ku lea ʻakí. Koeʻuhi ko e meʻa ne hokó, ne u maʻu ha feohi fakakaungāmeʻa naʻe mālohi ange ʻi he tuʻunga naʻe ʻi ai kimuʻá.
Andrew F., ʻIutā, USA