Ngaahi Fehuʻi mo e Talí

“ʻOku vaʻinga hoku ngaahi kaungāme‘á kotoa ʻi he ʻū keimi vitiō kuo fakafuofuaʻi maʻá e kau taʻu hongofulu tupú, ka ʻoku ou fili ke ʻoua te u vaʻinga ai. ʻOku sai pē nai ʻa e ʻū keimi kuo fakafuofuaʻi maʻá e kau taʻu hongofulu tupú?”

“Ko e moʻoni ʻoku lelei ke tau mamata he ngaahi fakafiefia ʻoku fakatupulakí pe maʻu mai ha ngaahi fakamatala mālie. Ka ʻoku ʻikai mahuʻinga tatau ʻa e ngaahi meʻa kotoa ko iá mo e konga ʻo ʻetau moʻuí ʻoku tau foaki ke maʻu mai ʻaki iá. ʻOku ʻi ai ha ngaahi meʻa ʻoku lelei ange mo ha ngaahi meʻa kehe ko e lelei tahá ia.”

Palesiteni Dallin H. Oaks, Tokoni ʻUluaki ʻi he Kau Palesitenisī ʻUluakí, konifelenisi lahi ʻo ʻOkatopa 2007 (Ensign pe Liahona, Nōvema 2007, 105).

Ngaahi Tuʻunga Moʻui ʻo e Māmaní

“ʻOku ou fili foki mo au ke ʻoua te u vaʻinga ʻi he ʻū keimi kuo fakafuofuaʻi maʻá e kau taʻu hongofulu tupú. ʻE lava pē ke fakafiefia hanau niʻihi, ka he ʻikai te ke teitei ʻilo pe ko e hā ha meʻa ʻe ala hoko. ʻOku ou vaʻinga mo hoku fāmilí ʻi he ʻū keimi fakafiefiá, pea ʻoku ou ongoʻi lelei ange ʻi he ʻikai ke u vaʻinga ʻi he ʻū keimi kuo fakafuofuaʻi maʻá e kau taʻu hongofulu tupú. ʻOku ʻikai ke feʻunga mo e ngaahi tuʻunga moʻui ʻa e ʻOtuá ʻa e ngaahi tuʻunga moʻui ʻoku maʻu ʻe he māmani he ʻaho ní, pea ʻoku ou fie hangē ko Iá.”

Payton D., taʻu 13, Nevata, USA

Fakafanongo ki he Laumālié

“ʻOku ʻi ai nai ha faʻahinga lea taʻefeʻunga pe teunga taʻetaau he ʻū keimi vitioó? ʻOku totonu ke tau feinga ke fakaʻehiʻehi mei he ngaahi meʻá ni, koeʻuhi ʻoku tuli ʻe he ngaahi meʻá ni ʻa e Laumālié. ʻE lava foki ʻe he fetāʻakí ʻo tuli ʻa e Laumālié. Fakakaukauʻi fakalelei pea ʻi he faʻa lotu pe ʻokú ke lava nai pe ʻikai ʻo ongoʻi ʻa e Laumālié ʻi hoʻo moʻuí ʻi he taimi ʻokú ke vaʻinga maʻu pē ai ʻi he ʻū keimi ko ʻení.”

Miriana B., taʻu 18, Uasingatoni, USA

Kau Fakafofonga ʻo Sīsū Kalaisi

“ʻOku mahuʻinga ke manatuʻi kuo tau ʻai ʻa e huafa ʻo Sīsū Kalaisí kiate kitautolu, pea ko ʻEne kau fakafofonga ʻa kitautolu. Ko e meʻa kotoa pē ʻoku tau faí, ʻoku totonu ke tau fehuʻi kiate kitautolu pe ʻoku tau ngāue nai ʻo hangē ko Iá pea ʻoku tau ʻomi nai kitautolu ke ofi ange kiate Ia.”

Brandon K., taʻu 17, ʻOhaiō, USA

Lelei, Lelei Ange, mo e Lelei Taha

“ʻOku totonu ke tau manatuʻi ʻoku ʻi ai maʻu pē e ngaahi meʻa lelei, lelei ange mo lelei taha te tau lava ke mamata, vaʻinga mo fanongo ki ai. Tatau ai pē kapau ʻoku ʻi ai ha ngaahi meʻa kovi ange te tau lava ʻo fai, mahalo ʻoku lahi ange ʻa e ngaahi meʻa fakatupulaki mo langaki moʻui te tau lava foki ke faí.”

Ash H., taʻu 17, Veisinia, USA

Ko e Hā Nai e Ongo ʻa e Fakamoʻuí?

“ʻI hono fili ʻo e fakafiefiá, ʻoku ou fehuʻi kiate au pe ʻe ongoʻi fiemālie nai e Fakamoʻuí ke mamata pe vaʻinga mo au. Kapau ko e talí ko e ʻikai, pea ʻoku ʻikai leva ke u fakaʻaongaʻi ʻa e heleʻuhila ko iá, neongo ʻa hono tuʻungá (rating). ʻOku lahi ha ngaahi keimi lelei ʻe lava ke fakafiefia mo faingataʻa mo kei fakaafeʻi mai pē e Laumālié ke ʻiate kitautolu.”

Brigitte D., Kalefōnia, USA

ʻOku fakataumuʻa ʻa e ngaahi talí ko ha tokoni mo ha fakakaukau, ka ʻoku ʻikai ko hano fakahaaʻi ʻo ha tokāteline ʻo e Siasí.

Ko e Hā Hoʻo Fakakaukaú?

ʻOku ou taʻu 16, pea ko kinautolu kotoa pē ʻoku mau feohí ʻoku nau ʻi ha vā feʻofaʻaki ka ʻoku ʻikai ke u pehē au. ʻOku ou ongoʻi tuenoa. Ko e hā e meʻa ʻoku totonu ke u faí?

ʻOmi hoʻo talí mo e laʻitaá kimuʻa he ʻaho 15 ʻo Fepueli, 2021.

ʻAlu ki he ftsoy. ChurchofJesusChrist.org, lomiʻi ʻi he “Submit Your Work.” Hū ʻaki hoʻo ʻAkauni ʻi he Siasí pea fili leva ʻa e “For the Strength of Youth” ʻi lalo ʻi he “Choose Magazine.” Lomiʻi ʻi he “Add File” ke fili hoʻo failé mo e ʻū taá, pea lomiʻi ‘i he “Submit” ke fakahū pea ʻomi kiate kimautolu hoʻo failé. Pe ʻave ha ʻīmeili ki he [e-mail].