Pōpoaki mei he Kau Palesitenisī ʻUluakí

Siʻomau kāinga kei talavou,

ʻOku mau houngaʻia ke fakafeʻiloaki kimoutolu ki he makasini foʻou ko ʻeni maʻá e toʻu tupu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní: Ki Hono Fakamālohia ʻo e Toʻu Tupú. ʻOku mau fakamālōʻia koeʻuhi ko hoʻomou leleí mo e mālohi ko e toʻu tupu ʻo e Siasí he ʻaho ní. Ko kimoutolu ʻa e ʻamanakiʻanga moʻoni ʻo ʻIsilelí. Ko ʻemau loto-moʻoní ke tokoniʻi kimoutolu ʻe he pulusinga foʻou ko ʻení ke mou kei mālohi mo ofi ki hoʻomou Tamai Hēvaní mo hotau Fakamoʻui ko Sīsū Kalaisí.

ʻOku ʻi ai ha ngāue maʻongoʻonga ʻa e ʻEikí maʻamoutolu mo hoʻomou toʻu tangatá. Ke tokoni atú, ʻe ʻoatu ʻi he makasini ko ʻení ʻa e ngaahi akonaki taimi totonu ʻa e kau palōfita mo e ʻaposetolo ʻo e kuonga ní, ʻa ia ʻoku nau ʻofa ʻiate kimoutolú. ʻI hoʻomou ako ʻa e ngaahi folofolá ʻo fakaʻaongaʻi ʻa e ngaahi maʻuʻanga tokoni ʻo e Haʻu, ʻo Muimui ʻIate Aú ki hono moʻui ʻaki mo ako ʻa e ongoongolelei ʻo Sīsū Kalaisí, te mou lava foki ke vakai ki he makasini ko ʻení ki ha ʻilo, ngaahi fakakaukau mo e ueʻi fakalaumālie lahi ange.

Ko e fuofua taimi ʻeni ʻoku maʻu ai e pulusinga makehe ko ʻeni maʻá e toʻu tupú ʻi he ngaahi fonua mo e lea fakafonua kehekehe. ʻOku mau fakatauange te ne ʻomi ha laumālie ʻo e kau fakataha mo e uouangataha fakaemāmani lahi pea te mou maʻu ai ha mālohi mei he ngaahi fakamoʻoni mo e aʻusia kuo vahevahe ʻe he toʻu tupu kehe mei he funga ʻo e māmaní.

ʻOku fakahaaʻi atu ʻe he hingoa ʻo e makasini ko ʻení ʻemau loto-falala ki homou mālohi ko e toʻu tupu ʻo e Siasí. ʻOku mau fakamoʻoni ʻoku maʻu ʻa e fiefia moʻoní ʻi heʻetau tui kia Sīsū Kalaisi mo ʻEne ongoongoleleí pea mo Hono Siasi kuo fakafoki maí.

Fakaʻapaʻapa Atu,

Kau Palesitenisī ʻUluakí