“Fanongo, Tokanga pea Talangofua,” Ki Hono Fakamālohia ʻo e Toʻu Tupú, Sānuali 2021, 32.
Lea Fakaʻosí
Fanongo, Tokanga pea Talangofua
Ko e fuofua foʻi lea ʻi he Tokāteline mo e Ngaahi Fuakavá ko e tokanga (vakai, Tokāteline mo e Ngaahi Fuakava 1:1). ʻOku ʻuhinga ia “ke fakafanongo ʻi he taumuʻa ke talangofua.” ʻOku ʻuhinga e tokangá ke “fanongo kiate Ia”—ke fanongo ki he meʻa ʻoku folofola ʻaki ʻe he Fakamoʻuí pea talangofua ki Heʻene naʻinaʻí. ʻI he foʻi lea ko iá— “Fanongo kiate Iá”—ʻoku ʻomi ai ʻe he ʻOtuá kiate kitautolu ʻa e sīpinga ke lavameʻa, fiefia, mo nēkeneka ʻi he moʻui ko ʻení. Kuo pau ke tau fanongo ki he ngaahi folofola ʻa e ʻEikí, tokanga kiate kinautolu, mo talangofua ki he meʻa kuó Ne fakahā kiate kitautolú!
Ko e fē ʻa e feituʻu te tau lava ʻo fanongo ai kiate Iá?
Te tau lava ʻo fanongo kiate Ia ʻi he folofolá. Te tau lava foki ʻo fanongo kiate Ia ʻi he temipalé. ʻOku tau toe fanongo kiate Ia foki ʻo lelei ange ʻi heʻetau fakaleleiʻi ʻetau malava ko ia ʻo fakatokangaʻi e fanafana ʻa e Laumālie Māʻoniʻoní. Pea ko e fakaʻosí, ʻoku tau fanongo kiate Ia ʻi heʻetau talangofua ki he lea ʻa e kau palōfitá, kau tangata kikite, mo e kau tangata maʻu fakahaá.
Ko e hā ʻe hoko ʻi hoʻo fanongo, tokanga, mo talangofua moʻoni ange ki he meʻa kuo folofola ʻaki ʻe he Fakamoʻuí mo e meʻa ʻokú Ne folofola ʻaki he taimí ni ʻo fakafou ʻi Heʻene kau palōfitá? ʻOku ou palōmesi ʻe tāpuekina kimoutolu ʻaki ha mālohi lahi ange ke fepaki mo e ʻahiʻahí, faingataʻá, mo e vaivaí. ʻOku ou talaʻofa atu ha ngaahi mana ʻi hoʻomou feohi fakafāmilí mo e ngāue fakaʻahó. Pea ʻoku ou palōmesi ʻe tupulaki homou ivi ke ongoʻi e fiefiá neongo ʻo ka fakautuutu e palopalemá ʻi hoʻomou moʻuí.