“Doktrina e Besëlidhje: Vështrim i Përgjithshëm”, Për Forcën e Rinisë, janar 2021, f. 14–15.
Eja, Më Ndiq
Doktrina e Besëlidhje: Vështrim i Përgjithshëm
Jozefi dhe Sidni, nga Annie Henrie Nader
Çfarë është ajo?
Doktrina e Besëlidhje është një koleksion i zbulesave bashkëkohore nga Perëndia të marra kryesisht nëpërmjet Profetit Jozef Smith. Shumë nga këto zbulesa u dhanë si përgjigje ndaj pyetjeve që Jozefi dhe anëtarë të tjerë të hershëm të Kishës i bënë Perëndisë.
Pse u bë Doktrina e Besëlidhje?
Gjatë ditëve të hershme të Kishës, kishte vetëm disa kopje të shkruara me dorë të këtyre zbulesave. Në vitin 1831, udhëheqësit e Kishës vendosën t’i shtypnin dhe botonin zbulesat në një Libër Urdhërimesh. Në një konferencë në nëntor 1831, duke diskutuar mbi Librin e Urdhërimeve, Jozefi mori zbulesën që tani është seksioni 1, parathënia e librit Doktrina e Besëlidhje.
Doktrina
Koleksioni i parë i zbulesave u quajt Libri i Urdhërimeve. Koleksionet e mëvonshme u quajtën Doktrina e Besëlidhje ngaqë në to u shtuan një seri leksionesh “mbi doktrinën e kishës”, që shkurt njihej si “doktrina” (tani quhet Lectures on Faith [Leksione mbi Besimin]). Që prej botimit të vitit 1921, Lectures on Faith [Leksione mbi Besimin] nuk u përfshi më, por titulli Doktrina e Besëlidhje mbeti i njëjtë.1
Besëlidhjet
Pjesa tjetër e librit përmbante zbulesa që u morën nga Jozef Smithi. Kjo pjesë njihej si “besëlidhjet dhe urdhërimet e Zotit” ose shkurt “besëlidhjet”. Shenjtorët e hershëm përdorën termat “besëlidhje” ose “urdhërime” për t’iu referuar këtyre zbulesave të marra nëpërmjet Profetit me qëllim që t’i dallonin nga shkrimet e tjera të Jozef Smithit, të tilla si predikimet e frymëzuara dhe përkthimet e Biblës prej tij.2
Pse është Doktrina e Besëlidhje e rëndësishme sot?
Doktrina e Besëlidhje përmban zbulesa nga Jezu Krishti drejtuar popullit të Tij. Ajo na mëson se Perëndia e njeh secilin prej nesh me emër, se Ai i dëgjon lutjet tona dhe u përgjigjet pyetjeve tona dhe se Perëndia flet ende sot. Ajo gjithashtu na mëson doktrinë me vlerë rreth planit të shpëtimit dhe na jep pikëpamje shtesë mbi Shlyerjen e Jezu Krishtit. Ajo na siguron ngushëllim duke ilustruar se si Perëndia na do dhe ende na bën thirrje të vijmë tek Ai edhe kur bëjmë gabime.