“Alas 6 sa buntag nga Misyonaryo,” Alang sa Kalig-on sa mga Kabatan-onan, Hunyo 2021, 6–7.
Dali, Sunod Kanako
Alas 6 sa buntag nga Misyonaryo
Hapit na unta ko mosulti sa akong higala nganong kinahanglan na nakong mohunong sa pagpadala og text niana nga gabii sa dihang ang Espiritu mihatag kanako og gamay nga pag-aghat.
Samtang nagdako, kanunay kong gitinguha nga mahimong miyembro nga misyonaryo. Nasayod ko kon unsa ka importante ang pagpaambit sa ebanghelyo ngadto sa mga tawo nga dili sa atong tinuohan. Nag-ampo gani ko alang sa mga kahigayonan. Apan, walay usa nga interesado sa mga tawo nga akong nailhan kinsa dili mga miyembro sa Ang Simbahan ni Jesukristo sa mga Santos sa Ulahing mga Adlaw. Kanang tanan nausab sa dihang misulod ko sa hayskol ug nahimamat si Robbie.*
Si Robbie ug ako nagkahigala sa dihang mipasundayag kami sa usa ka musikal diha sa sinehan sa komunidad. Pagkahuman niana, nagpadayon kami sa pagpadala og mga mensahe sa usag usa ug usahay manglaag.
Usa ka gabii nagpadala kami og text sa usag usa. Tungod sa sayo sa buntag nga seminary pagkasunod buntag, gikinahanglan na nakong mohunong aron makatulog na ko.
“Salamat sa pag-chat, apan kinahanglan nakong momata og sayo ugma sa buntag!” Gipadala nako ang text.
“Unsa ka sayo?” Nangutana si Robbie.
“5:30 sa buntag.” Mitubag ko. Dili ko sigurado kon kinahanglan nako nga mopasabot kon ngano, apan mibati ko og gamay nga pag-aghat gikan sa Espiritu nga mopaambit.
“Ako adunay sayo sa buntag nga seminary sa alas 6 sa buntag,” miingon ko. “Usa kini ka klase sa akong simbahan diin magtuon kami sa mga kasulatan ug magkat-on mahitungod sa Dios sa dili pa moeskwela. Kanunayng nindot kaayo ang akong bation human sa klase.”
Dayon, mibati ko og laing gamay nga pag-aghat: “Apil unya puhon,” miingon ko.
Mahinamon si Robbie sa dihang gipasabot nako kon unsa ang seminary. “Murag nindot kana! Mahimong magbisikleta ko padulong didto. Tingali motambong ko ugma.”
Una, nagtuo kong nangomedya ra si Robbie. Apan pagkasunod buntag samtang ang akong papa ug ako misulod paingon sa parkinganan sa wala pa ang alas 6 sa buntag, anaa si Robbie nga naghulat sa gawas sa simbahan nga nagbisikleta. Nakalitan ko.
Nianang adlawa ang among klase nagkat-on kabahin sa mga templo samtang gitun-an namo ang Daang Tugon. Nahimuot si Robbie sa tibuok nga leksyon—ganahan siya sa tanang litrato ug nagkat-on gikan sa tanang estudyante mahitungod sa mga paagi nga ang mga templo naghiusa kanato ngadto sa Dios ug sa atong mga pamilya.
Ang magtutudlo ug ang ubang estudyante miabiabi ni Robbie bisan og walay bisan unsa nga pasidaan nga motambong siya. Nagpadayon sa pagtambong si Robbie sa tibuok tuig ting-eskwela. Mitambong usab siya sa pipila ka kalihokan sa kabatan-onan. Nakighigala siya sa ubang kabatan-onan sa akong ward ug stake. Sa kataposan sa tuig ting-eskwela, mitambong si Robbie uban kanamo sa kataposan sa tuig nga seminary fireside.
Sa sunod nga ting-init ang akong pamilya mibalhin og laing ward, apan sa dihang misugod pag-usab ang eskwela, nagpadayon si Robbie sa pagtambong sa seminary, ug ang tibuok klase miabiabi kaniya.
Wala magpamiyembro sa Simbahan si Robbie, apan kanunay niyang isugilon ngari kanako ang iyang mga maayong kasinatian sa panahon nga magkakita kami.
Ang akong kasinatian sa pagdapit ni Robbie sa seminary nagtudlo kanako nga ang pagpaambit sa ebanghelyo wala lamang nagpasabot sa pagdapit sa mga higala nga makigkita sa mga misyonaryo. Sa pagkatinuod, mahimong dili gayod sila magpamiyembro sa Simbahan. Kini mahimong yano sama sa pagpaambit kon unsay nangahitabo sa inyong kinabuhi isip usa ka miyembro sa Simbahan. Dayon kon kana makapainteres kanila, mahimo ninyo silang dapiton sa pagkat-on og dugang mahitungod sa Simbahan.
Kon nangita kamo og mga kahigayonan sa pagpaambit sa ebanghelyo, sulayi sa pagsugod kon asa kamo ug sa unsay inyo nang ginabuhat. Adunay daghang yano nga mga paagi sa pagpahayag sa inyong pagtuo ug pagpamatuod pinaagi sa pagpaambit sa mga butang nga inyong gibuhat nga nakapaduol kaninyo ngadto kang Kristo. Salig sa Espiritu ug motabang Siya sa paggiya kaninyo.