“Ayaw Gayod Pagpakawala og Paglaom!” Alang sa Kalig-on sa mga Kabatan-onan, Hunyo 2021, 14–17.
Ayaw Gayod Pagpakawala og Paglaom!
Isip usa ka bakwit, nakakat-on si Muriel sa iyang kaugalingon nga ang Dios anaa kanunay kon inyo Siyang labing gikinahanglan.
Mga litrato pinaagi ni Cody Bell, gawas kon gipahibalo
Matag karon ug unya, ingon og ang inyong tibuok kalibotan mahugno palibot kaninyo.
Ug dayon masunog.
Diha sa usa ka kusog kaayo nga bagyo.
Usahay ang kinabuhi mabati nga daw samok kaayo ug makawala og paglaom nga kamo tingali maghunahuna kon ang mga butang mabati pa ba nga mahusto pag-usab.
Si Muriel B., kinsa migahin og panahon sa usa ka kampo sa mga bakwit isip usa ka bata, adunay ikasulti mahitungod sa paglahutay sa lisod nga mga kahimtang: “Paduol gayod sa Dios sa tanang panahon ug ayaw gayod pagpakawala og paglaom. Temporaryo lang gayod ang dili maayo nga mga panahon!”
Kini siya usa ka tawo kinsa nasayod mahitungod sa dili maayo nga mga panahon.
Ug nasayod siya kon unsaon sa paglahutay niini.
Gubat ug Seguridad
Ang kinabuhi ni Muriel nagsugod nga normal lang. Usa siya ka gamay nga bata didto sa Democratic Republic of Congo. Siya adunay malipayon nga pamilya, usa ka luwas ug komportable nga panimalay, dili tugnaw nga higdaanan, ug daghan nga makaon.
Dayon miulbo ang gubat.
Human niana, ang mga butang dali kaayo nga migrabe. Miabot ang iyang kinagrabehan nga higayon sa dihang giguyod sa masuk-anon nga mga lalaki ang iyang mahigugmaon nga amahan—“Ang labing lig-ong Kristiyano nga akong nailhan”—palayo sa pamilya nga gitionan og pusil.
Maayo gani, ang iyang amahan nahiusa pag-usab kanila sa kadugayan. Apan ang kinabuhi dili na luwas alang kang Muriel o sa iyang pamilya. Milayas sila ngadto sa usa ka kampo sa mga bakwit didto sa Uganda.
Nag-edad og lima si Muriel sa dihang ang iyang pamilya milayas ngadto sa usa ka kampo sa mga bakwit sa Uganda.
Litrato sa maayong kabubut-on ni Muriel B.
Ang kampo sa mga bakwit temporaryo nga mga pinuy-anan alang sa mga tawo kinsa napugos sa pagbiya sa ilang panimalay tungod sa gubat o ubang mga rason. Gihimo kini aron sa pagtanyag og seguridad, ug kini nga kampo nakabuhat sa ingon, apan ang kinabuhi ni Muriel ug sa iyang pamilya lisod gihapon kaayo.
Pagsugakod [Survival] ug Kalig-on
“Mapasalamaton kami nga nalayo sa gubat,” miingon si Muriel. “Ug ang mga tawo kinsa midumala sa kampo mibuhat kutob sa ilang mahimo aron sa pagtabang kanamo, apan dili igo.”
Walay igong pagkaon, walay igong kapuy-an, walay igong tambal—walay igong bisan unsang butang.
“Paakon kami sa mga insekto sa gabii,” nakahinumdom siya. “Ug kami walay pagkaon sulod sa pipila ka adlaw. Adunay daghang sakit usab sa kampo.”
Ang kampo nga pinuy-anan sa mga bakwit karon.
Litrato gikan sa Getty Images
Si Muriel ug ang iyang pamilya dili mga miyembro sa Ang Simbahan ni Jesukristo sa mga Santos sa Ulahing mga Adlaw niadtong panahona, apan mapahinunguron ug aktibo sila nga mga Kristiyano. Sila adunay hugot kaayo nga pagtuo sa Dios ug sa Iyang Anak, si Jesukristo. “Ang akong mga ginikanan kanunay nga nagsulti kanako nga mahimo akong mag-ampo ug magpuasa kanunay.”
Busa mao kana ang iyang gibuhat. Isip usa ka bata didto sa usa ka kampo sa mga bakwit, sa edad nga nagkat-on sa pagbasa ug pagsulat ang daghang bata, si Muriel nag-ampo matag adlaw alang sa pagsugakod. Nag-ampo siya alang sa pagkaon. Nag-ampo siya alang sa seguridad. Nag-ampo siya alang sa kalig-on ug kaisog nga magpadayon.
Ug nakakita siya sa Dios nga naghimo og mga milagro sa ilang kinabuhi.
“Ang Dios mikuha kanamo palayo gikan sa gubat,” miingon siya, “mao nga nasayod ko nga makasalig ko Kaniya. Matag higayon nga kami labing nagkinahanglan Kaniya, sama kon kami walay makaon sa dugay kaayo nga panahon, Siya kanunay nga mipanalangin kanamo. Mihimo Siya og ginagmay nga mga milagro nga mipalambo sa akong hugot nga pagtuo diha Kaniya.”
Pinaagi sa pagtabang sa pagpadako sa iyang mga manghod, adunay daghan nga mga kahanas nga magamit ni Muriel karon samtang nagpadako siya sa iyang kaugalingong anak.
Human sa hapit duha ka tuig didto sa kampo sa mga bakwit, nausab na pod ang dagan sa iyang kinabuhi. Si Muriel ug ang iyang pamilya mibalhin ngadto sa Estados Unidos sa pagsugod og bag-ong hugna sa kinabuhi diha sa bag-ong yuta. Sa tanan niyang nakita ug nasinati, si Muriel otso anyos pa lamang.
Mao kana ang higayon nga ang iyang mga ginikanan mihukom sa pagpangita og bag-o nga simbahan nga tambongan.
Hugot nga Pagtuo ug mga Higala
“Ang akong Mama ug Papa kanunay nga gustong mosimba sa Dios ug mohatag og pasalamat ngadto Kaniya,” miingon si Muriel. “Usa ka Dominggo, dili pa dugay human mi miabot sa Estados Unidos, miingon sila, ‘Mangita kita og simbahan.’”
Wala na sila nangita pa sa layo. Samtang naglakaw libot sa lungsod nakasugat sila og duha ka misyonaryo sa Ang Simbahan ni Jesukristo sa mga Santos sa Ulahing mga Adlaw diha sa dalan.
Sa wala madugay, nabunyagan si Muriel uban sa iyang mga ginikanan. Ang mga manghod ni Muriel nabunyagan sa dihang husto na sila sa pangidaron.
Si Muriel uban sa iyang inahan ug kinamanghoran nga igsoon.
Daghan sa unsay iyang nakat-onan sa simbahan pamilyar kang Muriel, kinsa gitudloan na mahitungod sa Dios ug ni Jesukristo sa tibuok niyang kinabuhi. Bag-o ang ubang mga hilisgotan. “Wala pa gayod ako makadungog bahin ni Joseph Smith o ni Brigham Young o sa Basahon ni Mormon,” miingon siya.
Dili lamang kadto ang bag-o nga mga butang. Dihay bag-o gayod nga kultura nga kat-onan. Dinhi, ang mga miyembro sa Simbahan mihimo og dakong kalainan. Gitudloan nila ang pamilya kon unsaon sa paggamit ang pipila sa elektronik nga mga himan ug mga appliance nga lahi kay sa didto sa ilang gigikanan. Mitabang sila sa pinulongan. Ug sila mitabang labaw sa tanan pinaagi sa yanong pagpakighigala.
Tabang ug Paglaom
Nag-awhag si Muriel sa kabatan-onan karon sa pagbuhat sa samang butang. “Ang mga bakwit nagkinahanglan usab og mga higala. Ang among pamilya walay mga higala sa dihang miabot kami niini nga nasod, apan sa dihang mipasakop kami sa Simbahan, adunay daghan kaayong mga tawo nga mibisita kanamo! Karon kami adunay daghang higala.”
Sulod sa katuigan, nakahimo si Muriel sa pagtabang og serbisyo niadtong samang mga higala kinsa unang mipanalangin sa iyang kinabuhi.
Human siya miapil sa Young Women, miserbisyo si Muriel sa mga kapangulohan sa klase ug mitabang sa tanang matang sa kalihokan sa kabatan-onan. Miserbisyo siya ug mitudlo ug mipaambit sa iyang pagpamatuod.
Pinaagi sa hugot nga pagtuo diha sa ebanghelyo, si Muriel ug ang iyang pamilya nagpadayon nga nakakaplag og paglaom atol sa mga kalisod sa kinabuhi.
Apan usa sa labing maayong mga paagi nga siya nagpadayon sa pagtabang sa iyang mga higala mao ang pinaagi sa pagpaambit sa iyang kalig-on diha sa ebanghelyo ug sa iyang hugot nga pagtuo sa Dios.
“Pipila sa akong mga higala naglisod nga makakaplag og paglaom karon,” miingon siya. “Apan kanunay ko nga mosulti kanila, walay dili maayo nga molungtad hangtod sa kahangtoran. Alang kanako, gibati nako nga walay babag nga dili makatabang ang Dios ninyo sa pagbuntog.
“Usahay ang tanan nga akong maampo mao ang kaisog nga mas makalahutay pa. Nga magsige og padayon. Ang Dios kanunay nga mitabang kanako nga makakaplag niana nga kaisog. Sa kasagaran, ang panalangin sa kaisog nga magpadayon sa unahan mao lamang gayod ang inyong gikinahanglan.”