“Ang Panaghigalaay Nakahimo og Kalainan,” Alang sa Kalig-on sa mga Kabatan-onan, Hunyo 2021, 8–9.
Dali, Sunod Kanako
Ang Panaghigalaay Nakahimo og Kalainan
Ang akong pagkakabig milungtad pa og unom ka tuig. Kon wala pa koy buotan nga mga higala, dili gayod unta ko makahimo niini.
Ako usa ka kinabig. Apan milungtad pa og unom ka tuig una nagpasakop sa Ang Simbahan ni Jesukristo sa mga Santos sa Ulahing mga Adlaw.
Usa sa mga rason kay sa akong pagdako, wala koy maayo kaayong opinyon kabahin sa Simbahan. Kon inyong nabasa unsay akong nabasahan mahitungod niini sa akong libro sa eskwelahan sa dihang nag-edad pa ko og 12, lagmit kamo ingon usab niana. Ang mga gipangsulti niini dili kaayo nindot. Ug tungod kay wala pa ko nakahimamat og usa ka Santos sa Ulahing mga adlaw, akong gidawat isip kamatuoran ang unsay akong nabasa.
Nagdako ko sa Kentucky, USA. Sa akong gipuy-an, diyutay ra kaayo ang mga miyembro sa Simbahan. Mao nga nakalitan ko dihang ang pamilyang Martinez mibalhin sa among kasilinganan sa nag-edad ko og 13.
Ang tanan ganahan nila. Sila mga mabination ug sayon ra nga ikasabot. Sila adunay unom ka mga anak—nga ingon og daghan kaayo! Ug aduna silay usa ka anak nga lalaki nga kaedad nako nga nahimo dayon nakong suod nga higala.
Sa tinuoray, nagtuo ko nga siya suod nga higala sa tanan. Dihay kahayag ni Mateo nga makapadani sa mga tawo ngadto kaniya. Busa bisan kon naghunahuna ko nga medyo lahi ang iyang simbahan, sa ngadto-ngadto wala na kadto nakahasol nako tungod sa among panaghigalaay.
Pakighimamat sa Ubang mga Miyembro
Pila ka tuig ang milabay, si Mateo ug ako nag-high school na. Mao kadtong higayona nga nahimamat nako ang ubang miyembro sa Simbahan. Dihay pipila sa among eskwelahan, ug ang uban sa komunidad. Paglabay sa panahon, maghisgot sila mahitungod sa ilang kinabuhi ug natural lang nila nga maghisgot kabahin sa Simbahan. Sa kataposan nagsugod ko sa pag-adto sa mga kalihokan sa Simbahan, makigdula og basketball sa ubang mga batan-on, ug gani mitambong sa sayo sa buntag nga seminary sulod sa pipila ka semana.
Aduna koy daghang maayo nga mga higala kinsa mipili sa pagsunod sa maayong mga sumbanan, apan adunay butang nga espesyal sa akong mga higala nga mga Santos sa Ulahing mga Adlaw. Siyempre, sila dili moinom o manigarilyo o magdrugas. Ug samtang ang uban nakong mga higala nalambigit sa pisikal nga paagi ngadto sa ilang hinigugma, kini sila dili. Apan mas labaw pa gani niana. Adunay kahayag diha kanila nga makaayo. Wala gayod nila gipugos ang ebanghelyo ngari nako—sila nagsunod lang niini. Kon tukma ang higayon, mopaambit sila og diyutayng mga butang ngari nako.
Ug ang pamilyang Martinez kanunayng bukas kaayo ug manggihatagon. Makadayon ra ko sa ilang balay bisan kanus-a. Ug pwede ra sab kong mokaon kanunay sa ilang kusina!
Nanglimbasog Gihapon Ako
Sa gihapon, lig-on kaayo ko sa akong relihiyon, ug naghunahuna gihapon ko nga ang pipila ka mga butang nga gituohan ni Mateo mga wirdo. Ako usab adunay lig-on nga personalidad. Bisan og gisunod nako ang kadaghanan sa sumbanan sa Simbahan, dili ko gusto nga sultihan ni bisan kinsang tawo kon unsa nga mga sumbanan ang angay nako.
Sa samang higayon, gibati nako ang pagkawala sa espirituhanong paagi. Nagtuo ko nga kana mahimong mahitabo kon imong mabati nga napaduol ngadto sa kahayag ug kaayo sa ebanghelyo apan mosalikway niini. Bisan og mituo ako sa Dios, naglisud ako sa pagdawat nga ang Dios mahimong aktibo nga nalambigit sa akong kinabuhi. Ug bisan pa niana ako nadani sa kahayag sa ebanghelyo sa ubang mga tawo.
Mao tingali kana ang hinungdan nganong nakahukom ko nga mokuyog sa akong mga higala didto sa usa ka eskwelahan sa Simbahan dihang nag-edad ko og 18. Mi-eskwela kami sa Brigham Young University sa Provo, Utah, USA, diin akong nahimamat ang mas daghan pang mga miyembro sa Simbahan. Maayong mga tawo. Mabinationg mga tawo. Puno sa kahayag, sama gayod didto sa amo. Ug ako wala gihapon magpasakop sa Simbahan.
Unsa sa Kataposan ang Nakahimo og Kalainan
Human nianang unang tuig sa eskwelahan, nahutdan ko og kwarta ug mibalik sa Kentucky aron mopuyo uban sa akong papa. 19 anyos na ko, ug ang tanan nakong mga higala misugod sa pagbiya aron moserbisyo og misyon o tua gihapon sa Utah.
Apan ang talagsaon nga butang mao nga ang Dios nagbutang og ubang talagsaon nga mga tawo sa akong kinabuhi. Ang pamilyang Martinez nagpuyo gihapon sa duol ug midapit kanako sa ilang panimalay bisan kanus-a kon gusto nako. Ug akong nahibaloan nga adunay ubang mga Santos sa Ulahing mga Adlaw nga kaedad nako nagpuyo usab sa duol. Silang tanan miunong kanako samtang nakigbisog sa akong mga tinuohan.
Walay usa nga nagtukmod nako nga buhaton ang usa ka butang. Walay usa nga namugos kanako. Maayo lang gayod sila ngari kanako.
Sa kataposan, human sa unom ka tuig, gisugdan nako ang pagtuon uban sa mga misyonaryo. Nagkinahanglan kini og daghang mga lawom nga pagpangutana, apan uban sa pagkamabination ug pag-awhag sa mga higala, sa kataposan andam na ko mobukas sa akong kasingkasing, motuon ug mo-ampo mahitungod sa Basahon ni Mormon, mo-ila sa Espiritu, ug modawat sa bunyag.
Sa tanang mga butang nga nakatabang kanako sa akong panaw, tingali ang labing importante mao ang mapailubon, mabination nga suporta sa ubang mga tawo.