“Pagkuha og mga Tubag gikan sa Ginoo,” Alang sa Kalig-on sa mga Kabatan-onan, Hunyo 2021, 26–27.
Pagkuha og mga Tubag gikan sa Ginoo
Aniay tulo ka butang nga angay hinumdoman aron sa pagtabang kaninyo nga makadawat og mga tubag sa inyong mga pag-ampo.
Paghulagway sa litrato gikan sa Getty Images
Nakapangutana ba kamo sa Dios ug mibati nga wala Siya motubag sa inyong pag-ampo? Nasayod ko nga nakasinati na ako niana—ug lisod kini nga masabtan kon ngano. Apan wala kana magpasabot nga ang Dios wala naminaw. Sa pagkatinuod, Siya maminaw ug motubag sa atong tanan nga mga pag-ampo (tan-awa sa Mateo 7:7–8). Usahay nagkinahanglan lamang kini og panahon ug kakugi aron kita makasabot sa Iyang mga tubag.
Aniay tulo ka baroganan nga angay hunahunaon nga makatabang kaninyo nga makadawat og mga tubag gikan sa Ginoo ug makaila niini kon kini moabot.
1. Ayaw Dali-dalia ang Tayming sa Dios
Kon kamo sama kanako, kamo dili gusto nga maghulat alang sa mga tubag kon kamo adunay pangutana. Ganahan ko nga makapangutana ni Google, Siri, o Alexa ug makakuha og diha-diha nga tubag.
Apan ang Ginoo kasagaran dili ingon niana ang paagi. Usahay maghulat Siya hangtod nga andam na kita. Bisan si Propeta Joseph Smith kasagaran gikinahanglan nga maghulat sa mga tubag sa iyang mga pag-ampo. Niadtong 1833 daghang miyembro sa Ang Simbahan ni Jesukristo sa mga Santos sa Ulahing mga Adlaw ang nagpuyo didto sa Jackson County, Missouri, USA. Apan, sa Nobyembre niana nga tuig, ang mga manggugubot nga panon miabog kanila gikan sa lalawigan. Nabalaka si Joseph. Nangutana siya sa Ginoo kon nganong nahitabo kini. Ang Ginoo wala motubag niana nga pangutana diha-diha dayon, apan Iyang gihupay si Joseph, nag-ingon, “Pagmalinawon ug hibaloi nga Ako mao ang Dios.”1 Ang sumpay sa tubag miabot pagkasunod bulan (tan-awa sa Doktrina ug mga Pakigsaad 101).
Kon ang akong mga pag-ampo dili matubag dihadiha dayon, mokuha ako og kalig-on gikan sa kahibalo nga bisan ang mga propeta usahay kinahanglan nga maghulat. Kon kita adunay hugot nga pagtuo ug pagsalig sa tayming sa Ginoo sama ni Joseph, ang Ginoo motubag sa atong mga pag-ampo sa Iyang kaugalingong panahon. Ug usahay tingali kinahanglan kita nga maghulat og dugay kaayo nga panahon.
2. Padayon sa Pagkugi
Si Presidente Russell M. Nelson mitudlo, “Ang Ginoo ganahan og paningkamot, ug ang paningkamot magdala og mga ganti.”2 Kon maghunahuna kamo mahitungod niini, kana magamit sa tanan nga atong buhaton. Ang paningkamot gikinahanglan aron sa paglig-on sa kaunoran ug sa pagkat-on og bag-o nga mga kahanas.
Ang sama nga baroganan magamit sa pagdawat og mga tubag gikan sa Ginoo. Si Alma nga Batan-on nakakita og anghel, apan kana nga kasinatian lamang dili igo. Ang iyang pagpamatuod kang Jesukristo ug sa Iyang Pag-ula nahimong mas lig-on lamang human siya “nagpuasa ug nag-ampo sa daghan nga mga adlaw” (Alma 5:46).
Paghunahuna mahitungod ni Joseph Smith ug sa Unang Panan-awon. Wala lamang mimata si Joseph usa ka buntag ug nakahukom nga mangutana sa Dios kon hain nga simbahan ang apilan. Sa pagkatinuod nanglimbasog siya sa iyang pangutana sulod sa duha ka tuig.3 Nagkugi siya og maayo aron makakaplag og mga tubag, ug sa dihang andam na siya, ang Langitnong Amahan mitubag kaniya.
3. Tan-awa og Balik—Tingali Nakadawat Na Kamo sa Inyong Tubag
Niadtong batan-on pa ko, naghunahuna ko nga ang Dios mitubag lamang sa mga pag-ampo sa piho nga mga paagi. Daghang tawo mohilak kon mohatag sila sa ilang pagpamatuod, ug naghunahuna ko nga kon ako wala naghilak, ang Espiritu wala namulong ngari kanako. O kon ako walay kainit sa dughan sama sa gihulagway sa Ginoo ngadto kang Oliver Cowdery (tan-awa sa Doktrina ug mga Pakigsaad 9:8), naghunahuna ako nga wala ako mibati sa Espiritu.
Apan akong nakat-onan nga ang Dios makigsulti sa matag usa kanato sa lain-lain ug personal nga mga paagi. Ang labing importante alang kanako mao ang pagkat-on kon unsa kadto nga mga paagi. Diha sa Bag-ong Tugon, si Pablo mitudlo mahitungod kon sa unsang paagi ang Espiritu mopabati kanato: “Apan ang Espiritu naghatag sa gugma, kalipay, kalinaw, pailob, kaluoy, kaayo, pagkamaminatud-on, pagkamapaubsanon ug pagkamapinugnganon sa kaugalingon” (Mga Taga-Galacia 5:22–23). Ang Espiritu Santo makagamit sa bisan unsa niana nga mga pagbati sa pagpakigsulti kanato.
Ug ang mga tubag gikan sa Espiritu Santo sa kasagaran hilom ug yano. Usahay mahimong moabot kini “sa dinalian … sa hingpit, ug sa hinanali,” sama sa pagpasiga sa suga sa ngitngit nga kwarto, sama sa gitudlo ni Elder David A. Bednar sa Korum sa Napulog Duha ka mga Apostoles. Apan mas kanunayng moabot kini sama sa pagsubang sa adlaw—usa ka “hinay-hinay nga pagtubo sa kahayag”—o sama sa kahayag sa gabunon nga adlaw. Makadawat kita og igong giya aron makahimo og pipila lamang ka lakang sa unahan.4 Busa tan-awa og balik, ug siguroa nga ang Dios wala ba mihatag kaninyo og tubag nga wala lang ninyo mailhi tungod kay kamo nagdahom og lain nga butang.
“Ang Dios buot ba gayud makigsulti kaninyo?” Nangutana si Presidente Russell M. Nelson. “Oo!”5 Kon kita mapailobon ug mobuhat sa gikinahanglan nga pagkugi, makadawat kita og mga tubag sa atong mga pag-ampo. Hangtod moabot kana nga mga tubag, makasalig kita sa Ginoo ug magpadayon sa unahan. Ang Ginoo misulti kang Joseph Smith, “Pagmalinawon ug hibaloi nga Ako mao ang Dios” (Doktrina ug mga Pakigsaad 101:16). Kana nga tambag makahupay usab kanato.