“Barog nga Lig-on,” Alang sa Kalig-on sa mga Kabatan-onan, Hunyo 2021, 20–23.
Barog nga Lig-on
Pagpili sa pagbarog ug ayaw pagbalhin gikan sa mga gamot sa inyong hugot nga pagtuo ug sa tinubdan sa pagpadayag.
Gikan sa usa ka debosyonal nga pakigpulong, “Stand and Be Not Moved,” nga gihatag didto sa Brigham Young University–Idaho niadtong Pebrero 11, 2020. Alang sa kompleto nga pakigpulong, adto sa web.byui.edu/devotionalsandspeeches.
Gusto ko kamong sultihan kabahin sa lasang diin gigahin nako ang dakong bahin sa akong pagkabata. Igang kini sa ting-init ug bugnaw sa tingtugnaw, uban sa panagsa nga pag-snow. Kini adunay tanang matang sa makapaikag nga mga mananap nga magpatutoy [mammal], mga mananap nga nagkamang [reptile], mga insekto, ug mga langgam.
Apan unsay akong labing nahinumduman mao ang mga kahoy. Ang siyentipikanhong ngalan niini mao ang yucca brevifolia, ug dili kini mga kahoy gayod. Kasagaran nabuhi kini sa Desiyerto sa Mojave, nga makita sa California, Utah, Arizona, ug sa Nevada, USA.
Giingon nga ang mga pioneer mao ang nagngalan niining matang sa tanom nga “Joshua nga kahoy” tungod kay gisundog niini ang propeta sa Daang Tugon nga si Joshua nga nagwara-wara kanila, uban sa gipataas nga mga bukton, padulong sa gisaad nga yuta. Isip usa ka bata, naghunahuna ko kon kinsa si Josue ug unsay akong angay mahibaloan mahitungod kaniya.
Isip usa ka hamtong, nasayod ko nga gipangulohan ni Josue ang mga anak sa Israel ngadto sa gisaad nga yuta. Usa siya ka simbolo ni Kristo, kinsa nangulo sa tanan nga matinud-anon ngadto sa kataposang yuta sa saad, ang presensya sa Langitnong Amahan.
Sa wala pa mamatay si Josue, gipundok niya ang iyang katawhan ug gipahinumdoman sila sa tanan nga mga butang nga nahimo sa Ginoo alang kanila. Gitambagan sila niya, nag-ingon, “Pagpili karong adlawa kon kinsay alagaran ninyo” (Josue 24:15).
Gusto kong mopaambit og tulo ka mensahe gikan sa tambag ni Josue.
1. “Pagpili”
Si Elder Dale G. Renlund sa Korum sa Napulog Duha ka mga Apostoles mitudlo, “Ang tumong sa atong Langitnong Amahan sa pagkaginikanan dili ang pagpabuhat sa Iyang mga anak sa unsay matarung; kini ang pagpapili sa Iyang mga anak sa pagbuhat sa matarung ug sa katapusan mahimong sama Kaniya.”1
Sa Basahon ni Mormon, si Lehi nagsulti kanato nga “sa pagpahigayon sa … walay katapusan nga mga katuyoan [sa Dios] sa sangputanan sa tawo, … ang Ginoong Dios mihatag ngadto sa tawo nga siya molihok alang sa iyang kaugalingon” (2 Nephi 2:15–16).
Ang atong balaan nga gasa ug abilidad sa pagpili mahimong talagsaon ug makapaugtas. Dili pa dugay, nakig-istorya ko og babaye nga mga 20 ang pangidaron. Mipasabot siya nga mibati siya nga nabug-atan sa tanan nga mga pagpili nga kinahanglan niyang himoon. Miingon siya, “Unta adunay usa ka tawo nga mopili alang kanako.”
Samtang naminaw ko, naghunahuna ko niini nga mga pulong gikan ni Josue: “Magmalig-on ka ug magmaisogon! Ayaw kahadlok o kaluya tungod kay ako, ang Ginoo nga imong Dios, mag-uban kanimo bisan asa ka” (Josue 1:9).
Ang mga desisyon kabahin sa balaanon nga laraw sa atong Langitnong Amahan. Ang atong tibuok mortal nga kasinatian nakasentro sa atong kabubut-on. Makatabang kini sa atong mahangturong pag-uswag.
Si Presidente Russell M. Nelson mitudlo, “Kon gusto kamo nga magmalipayon, pilia ang paagi sa Ginoo.”2
Pagbaton og kaisog sa pagpili sa matarong nga paagi sumala sa mga pakigsaad nga inyong gihimo.
2. “Pagpili Karong Adlawa”
Bantayi nga giingon ni Josue nga “karong adlawa,” dili “sa umaabot nga adlaw.” Ang paglangay-langay mahimong adunay dili maayong mga sangpotanan. Hunahunaa ang paglangay sa imong homework o mga buluhaton sa pagbasa hangtod sa kataposan sa termino. Dili kana maayo! Daghan sa mga pagpili nga atong himoon dili mahimong langayon alang sa umaabot nga adlaw kon kita adunay kahigayonan sa pagbuhat niini karon. Ang uban kinahanglan nga himoon kada adlaw, uban sa tinuyo nga kakugi.
Usa niana nga pagpili mao ang kahigayonan sa paghinulsol kada adlaw (tan-awa sa Alma 34: 32–33). Si Presidente Nelson mitudlo, “Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag-adlaw nga paghatag og gibug-aton sa paghinulsol.”3
Ang pagpili sa paghinulsol makapabilin kanato nga gawasnon gikan sa mga palas-anon sa pagbati nga sad-an, pagkaadik, kaulaw, makanunayon nga mga pagdumot, pagkadili takos, ug paglimbong sa kaugalingon. Sa kalainan, ang atong inadlaw nga paghinulsol makahatag og paglaom, pagsalig, kadasig, kaalam, pagpasaylo, paglambo sa mga relasyon, ug dugang nga abilidad sa pagdawat og personal nga pagpadayag.
Si Presidente Nelson mahigugmaon nga nangamuyo niadtong kinsa mibiya sa dalan, “Palihug ayaw pagtipas sa dalan sa pakigsaad og dugang nga minuto. Palihug balik pinaagi sa tinuod nga paghinulsol, karon.”4
3. “Pagpili Karong Adlawa Kon Kinsay Alagaran Ninyo”
Isip mga disipulo ni Jesukristo, kita “andam sa pagtambayayong sa usag usa nga mga alantuson, nga sila mahimo nga magaan; … pagbangutan uban niadto nga nagbangutan; … ug sa paghupay niadto nga nagkinahanglan sa kahupayan” (Mosiah 18:8–9).
Kon buhaton nato kining mga butanga tungod sa usa ka pormal nga buluhaton sa pagpangalagad o kon hilom nga giaghat sa Espiritu Santo, kon kita anaa sa pag-alagad sa atong mga isigkatawo, kita nag-alagad sa atong Dios (tan-awa sa Mosiah 2:17).
Ang mga kahigayonan sa pagserbisyo anaa tanan sa inyong palibot. Ang uban moabot sa usa ka organisado nga paagi o isip kabahin sa usa ka grupo nga paningkamot. Ang uban gipahaom sa indibidwal, wala gipahibalo, ug nasayran lamang sa tigdawat.
Palihog hatagi gayod og pagtagad ang mga tawo sa inyong palibot. Dili sulagma kon hain kamo nahimutang. Adunay usa ka balaan nga laraw sa buhat sa atong Amahan sa Langit alang sa Iyang mga anak. Mahimo nga kamo ang mahigugmaon nga silingan, ang andam nga tigpaminaw, ang mahigalaon nga dagway, ang mahunahunaon nga anak nga lalaki o anak nga babaye, ang lig-on nga kasandigan, o ang matinabangon nga mga kamot nga gidesinyo sa Langitnong Amahan aron sa pagserbisyo niadtong labing suod kaninyo—inyong pamilya ug kaparyentehan, mga higala, mga kauban sa trabaho, mga kauban sa grupo, mga kauban sa klase, ug sa uban.
Mapadpad Ngadto Nganhi
Mobalik kita sa hulagway sa akong lasang sa pagkabata didto sa desiyerto. Gawas sa Joshua nga mga kahoy, kanunay akong makakita og mga tumbleweed [sagbot nga paliron sa hangin]. Samtang konektado ang mga tumbleweed sa ilang mga gamot diha sa yuta, magpabilin kini nga nakaangkla, naamumahan, ug nagtubo. Apan ang mga tumbleweed nakabaton sa ngalan niini alang sa usa ka rason.
Ang mga tumbleweed walay hunahuna nga ilang kaugalingon. Molihok sila sa usa ka direksyon—sa direksyon sa hangin. Kon ang koneksyon tali sa tanom ug sa mga gamot niini malaya na, ang tanom matangtang gikan sa pundasyon niini sa usa ka yanong paghuros sa hangin.
Litrato gikan sa Getty Images
Mipasidaan si Pablo sa mga Taga-Efeso nga ang ubang mga tawo “mapadpad ngadto nganhi ug madala sa matag hangin sa doktrina pinaagi sa kaigmat ug lipatlipat sa mga tawo nga batid sa pagmugnag kasaypanan” (Mga Taga-Efeso 4:14).
Ang Joshua nga mga kahoy ug ang mga tumbleweed magtupad sa pagtubo. Ang matag usa ubos sa samang kainit ug kabugnaw, mga kahimtang sa yuta, ug hangin. Apan ang usa magpabilin sa lugar niini ug ang lain mapadpad sa hangin.
Ang Ginoo miingon, “Apan ang akong mga tinun-an magbarug sa balaan nga mga dapit, ug dili mabalhin”” (Doktrina ug mga Pakigsaad 45:32).
Pagpili sa pagbarog ug ayaw pagbalhin gikan sa mga gamot sa inyong hugot nga pagtuo ug sa tinubdan sa pagpadayag. Barog ug ayaw pagbalhin gikan sa mga saad sa inyong mga pakigsaad o gikan sa buhat sa Amahan sa Langit nga kamo gipadala dinhi sa pagbuhat.
“Pagpili karong adlawa kon kinsay alagaran ninyo,” mopasalig sa inyong kaugalingon nga “alang kanako ug sa akong pamilya, mag-alagad kami sa Ginoo” (Josue 24:15).