“5 ka Paagi sa Pagpaambit sa Ebanghelyo,” Alang sa Kalig-on sa mga Kabatan-onan, Hunyo 2021, 32.
Kataposang Pulong
5 ka Paagi sa Pagpaambit sa Ebanghelyo
Gikan sa usa ka pakigpulong sa Abril 2019 nga kinatibuk-ang komperensya.
1. Paduol Ngadto sa Dios
Kon mas magpaduol kamo sa atong Langitnong Amahan, ang Iyang kahayag ug kalipay mas mosanag diha kaninyo. Ang uban makabantay ug mangutana sila ninyo bahin niini.
2. Pun-a ang Inyong Kasingkasing sa Gugma alang sa Uban
Tinguhaa ang pagsunod sa gugma ni Kristo ug ang pagkamaloloy-on ngadto sa uban. Higugmaa sila ug tahora sila isip kaubang mga anak sa Langitnong Amahan.
3. Paningkamot sa Paglakaw sa Dalan sa Pagkadisipulo
Samtang ang inyong gugma sa Dios ug sa Iyang mga anak magkalawom, mao usab ang inyong tinguha sa pagsunod ni Jesukristo. Ang paglakaw sa dalan sa pagkadisipulo nagkinahanglan og pagbansay. Ang pagpakig-istorya sa uban bahin sa inyong pagtuo mahimong normal ug natural. Gani, ang ebanghelyo mahimong usa ka mahinungdanon, bililhong bahin sa inyong kinabuhi nga murag dili na natural ang dili paghisgot niini ngadto sa uban.
4. Ipaambit Unsay Anaa sa Inyong kasingkasing
Sa bisan unsang paagi nga natural o normal para ninyo, ipaambit sa mga tawo ngano nga si Jesukristo ug ang Iyang Simbahan importante para ninyo.
5. Saligi ang Ginoo sa Pagpahinabo sa Iyang mga Milagro
Dili inyong trabaho ang pagkabig sa mga tawo. Mao kana ang tahas sa Espiritu Santo. Ang inyong tahas mao ang paghigugma sa Dios ug sa inyong mga silingan. Ipakita kini pinaagi sa pagdapit kanila nga moduol ug motan-aw, moduol ug motabang, ug moduol ug mahisakop. Ang Dios mohimo og mga milagro pinaagi kaninyo aron sa pagpanalangin sa Iyang bililhon nga mga anak.