“Kalig-on gikan sa Atong mga Ginikanan,” Alang sa Kalig-on sa mga Kabatan-onan, Hunyo. 2021, 18–19.
Dali, Sunod Kanako
Kalig-on gikan sa Atong mga Ginikanan
Usahay kining tanan nagkinahanglan lang og gamay nga panglantaw gikan sa laing tawo aron sa pagtabang kanato nga magmapasalamaton sa unsay anaa kanato.
Ang pagkabatan-on dili kanunayng sayon. Ug motuo ka o sa dili, ang mahimong ginikanan sa usa ka batan-on labaw nga dili sayon kay sa niana. Apan ang relasyon sa atong mga ginikanan espesyal, ug kon paningkamotan ninyo kini, kana nga relasyon mahimong usa ka dakong panalangin sa inyong kinabuhi.
Ania ang pipila ka mga ehemplo kon unsay gibati sa pipila ka mga lider sa Simbahan kabahin sa ilang relasyon sa ilang mga ginikanan.
Presidente Russell M. Nelson
Presidente sa Simbahan
“Akong gitahud ang akong mga ginikanan. Importante kaayo sila kanako ug mitudlo kanako og mahinungdanon nga mga leksyon. Dili igo ang akong pasalamat kanila alang sa malipayong kinabuhi sa panimalay nga ilang gihimo alang kanako ug sa akong mga igsoon. Apan, bisan sa bata pa ko, nahibalo ko nga naay kulang sa akong kinabuhi. Usa ka adlaw misakay ako sa sakyanan ug miadto sa usa ka … bookstore aron mangita og libro mahitungod sa Simbahan. Ganahan ko nga magkat-on mahitungod sa ebanghelyo.
“Sa dihang ako nang nasabtan ang Pulong sa Kaalam, gusto nako nga ang akong mga ginikanan magsunod niana nga balaod. Busa, usa ka adlaw sa dihang bata pa kaayo ako, miadto ko sa among silong ug gipangbuak ang tanang botelya sa bino sa sementado nga salog! Nagpaabut ko nga silutan ko sa akong amahan, apan wala siyay gisulti bisan usa ka pulong.
“Sa dihang midako na ko ug nagsugod sa pagkasabut sa kahalangdon sa plano sa Langitnong Amahan, kanunay kong miingon sa akong kaugalingon, ‘dili na ako gusto og regalo sa Pasko! Gusto lang ko nga ma-seal sa akong mga ginikanan.’ Kadtong akong gihandom nga hitabo wala mahitabo hangtud nga ang akong mga ginikanan milapas na sa 80, apan nahitabo gayod kini. Dili nako ikapahayag sa hingpit ang kalipay nga akong gibati niadtong adlawa (tan-awa sa Alma 26:16), ug sa matag adlaw akong gibati kana nga kalipay sa ilang pagka-seal ug sa akong pagka-seal ngadto kanila.”1
Mga paghulagwayni Jarom Vogel
Presidente Dallin H. Oaks
Unang Magtatambag sa Unang Kapangulohan
“Ang akong kinaiya ngadto sa balaod sa ikapulo nalig-on pinaagi sa ehemplo ug mga pulong sa akong inahan, nga gihulagway diha sa usa ka panag-istoryahanay nga nahinumdoman nako sa akong pagkabatan-on.
“Atol sa Ikaduhang Gubat sa Kalibotan, ang akong biyuda nga inahan misuportar sa iyang tulo ka gagmayng mga anak sa sweldo sa usa ka magtutudlo nga gamay ra. Sa dihang ako nakamatngon nga kami walay pipila ka mga butang nga gitinguha tungod kay kami walay igong kwarta, akong gipangutana ang akong inahan ngano nga siya mibayad og dako gikan sa iyang sweldo para sa ikapulo. Wala gayud ako makalimot sa iyang pagpasabut: ‘Dallin, tingali adunay pipila ka mga tawo nga makahimo ra nga dili mobayad sa ilang ikapulo, apan kita dili makahimo. Ang Ginoo mipili sa pagkuha sa inyong amahan ug mibilin kanako aron mopadako kaninyo nga mga anak. Dili ako makahimo niana nga wala ang mga panalangin sa Ginoo, ug makuha nako kadto nga mga panalangin pinaagi sa pagbayad og matinuoron nga ikapulo. Kon ako mobayad sa akong ikapulo, anaa kanako ang saad sa Ginoo nga siya mopanalangin kanato, ug nagkinahanglan gayod kita niadtong mga panalangin kon kinahanglan kitang mabuhi.’”2
Sister Michelle D. Craig
Unang Magtatambag sa Kinatibuk-ang Kapangulohan sa Young Women
“Sa batan-on pa ko, akong pamilya mibalhin tabok sa nasud. Uban sa tabang sa uban, migahin kami og usa ka adlaw sa pagkarga sa tanang butang ngadto sa dakong trailer nga ipaguyod sa akong papa diha sa luyo sa among sakyanan. Sa buntag nga mobiya na unta kami, nasurprisa ko sa pagmata ug nahibaloan nga ang among pagbalhin malangay og pipila ka adlaw. Ang akong amahan nahigmata sa tungang gabii nga adunay kusog nga pagbati nga siya dili moguyod sa trailer. Imbis ipangatarungan ang pagbati, gisunod sa akong papa ang pag-aghat ug gilangay ang among pagbalhin. Hinoon, nagsuhol siya og usa ka propesyonal nga tigbalhin kinsa mibutang sa tanan namong mga gamit ngadto sa usa sa ilang trak.
“Sa dihang mibiya na gayod kami sa katapusan, kami nakasugat og kusog nga hangin ug nalintuwad nga mga trak ug mga trailer diha sa dalan. Ang among pamilya mapasalamaton sa among kaluwas. Sa walay pagpamulong, ang akong amahan mitudlo kanako og kaisug sa pagsunod sa pag-aghat gikan sa Espiritu, bisan kon kadtong mga pag-aghat dili sayon, bisan kon kini unta dili masabut. Ako dili gayod mahikalimot niana nga leksyon.”
Elder Quentin L. Cook
Sa Korum sa Napulog Duha ka Apostoles
“Ang akong papa adunay tulo ka patakaran. Una, kami kinahanglan nga adunay maayo nga mga tumong. Ikaduha, kami mahimong mousab sa among mga tumong bisan kanus-a. Apan ikatulo, bisan unsa pa nga tumong ang among pilion, kinahanglan kami nga maningkamot nga makab-ot kini.”
Miingon usab siya, “Ang mga tawo adunay daghang mahatag kanato kon kita andam nga makat-on gikan kanila. Mao nga importante nga libotan ang inyong kaugalingon sa maayo nga mga tawo.”3