“Pagkaplag og Kalig-on sa Pagpasaylo,” Alang sa Kalig-on sa mga Kabatan-onan, Hunyo 2021, 10–11.
Dali, Sunod Kanako
Pagkaplag og Kalig-on sa Pagpasaylo
Ang Ginoo nagsugo kanato sa pagpasaylo sa uban. Siya motabang kanato aron matuman ang Iyang mga sugo, lakip niini.
Paghulagway ni James Madsen
Ang pipila ka mga sugo ingon og mas lisud ba tumanon kay sa uban?
Ania ang usa nga makapahadlok sa daghang tawo: “Ako, ang Ginoo, mopasaylo kinsa Ako mopasaylo, apan kamo gikinahanglan nga mopasaylo sa tanan nga mga tawo” (Doktrina ug mga Pakigsaad 64:10).
Kadiyot lang. Kita kinahanglang mopasaylo sa tanan kinsa nakahimo og sayop kanato? Posible ba kana?!
Lahi ang pagpasaylo sa usa ka tawo tungod sa pagsulti og dili maayo nganha kanimo o tungod sa katapusang roll diha sa kan-anan. Apan unsaon man ang lawom nga mga kasakit? Kadtong seryoso nga mga kalapasan nga mosamok o gani mousab sa dagan sa atong mga kinabuhi?
Usahay ang abilidad sa pagpasaylo sa usa ka tawo kinsa grabing nakapasakit kanato tingali mao ra og dili nato mahimo.
Ania ang maayong balita: Uban sa tabang ni Jesukristo, kita dili gayud limitado sa unsay atong mahimo sa atong kaugalingon.
Ang Tabang nga Iyang Gikinahanglan
Usa ka deboto nga Kristiyano gikan sa Netherlands nga ginganlan og Corrie ten Boom nakakaplag mismo sa gahum sa pagpangutana sa Dios sa pagtabang kaniya nga mopasaylo sa usa ka tawo.
Siya ug iyang igsoon nga si Betsy nabilanggo didto sa bilanggoan sa kampo atol sa Ikaduhang Gubat sa Kalibotan. Si corrie ug ang uban milahutay sa makahahadlok nga pagpang-abuso gikan sa mga Nazi nga gwardiya sa bilanggoan. Gani ang iyang igsoon nga si Betsy namatay isip resulta nianang pag-abuso. Si Corrie nakalahutay.
Human sa gubat, nadiskubrihan ni Corrie ang makaayo nga gahum sa pagpasaylo sa uban. Kanunay siya mipaambit sa iyang mensahe sa pampubliko nga mga kahimtang. Apan usa ka adlaw ang iyang mga pulong gibutang sa katapusang pagsulay.
Pagkahuman sa usa ka pakigpulong sa publiko, giduol si Corrie sa usa sa pinakadagmalan nga gwardiya sa bilanggoan gikan sa mga kampo.
Siya misulti ni Corrie nga siya nahimo nang usa ka Kristiyano sukad sa gubat ug gihinulsolan ang grabing mga butang nga iyang nabuhat isip usa ka gwardya sa bilanggoan.
Siya mitunol sa iyang kamot og miingon, “Mapasaylo mo ba ako?”
Bisan pa sa tanan nga iyang nakat-onan ug gipaambit kabahin sa pagpasaylo sa uban, si Corrie dili makadawat sa kamot niini nga tawo ug mopasaylo kaniya—bitaw, dili nga siya lang.
Sa kadugayan siya misulat, “Bisan pa man og ang masuk-anon, mapanimaslon nga mga hunahuna misurok ngari kanako, akong nakita ang sala niini. … Ginoong Jesus, nag-ampo ko, pasayloa ko ug tabangi ko nga makapasaylo kaniya.
“Naningkamot ko nga mopahiyom, [ug] ako nanglimbasog sa pag-isa sa akong kamot. Dili ko makahimo. Wala koy gibati, bisan gamay nga kaayo o kalooy. Ug busa akong gihimo pag-usab ang hilom nga pag-ampo. Jesus, dili ko makapasaylo niya. Ihatag kanako ang Imong kapasayloan.
“Sa dihang akong gidawat ang iyang kamot ang labing talagsaong butang nahitabo. Gikan sa akong abaga ngadto sa akong bukton ug agi sa akong kamot may nindot nga pagbati nga akong nabati gikan kanako paingon ngadto kaniya, samtang sa akong kasingkasing mitubo ang gugma alang niining estranghero nga halos mibuntog kanako.
“Ug busa akong nadiskobrehan nga dili sa atong kapasayloan labaw na nga dili sa atong kaayo nga nag-agad ang pagkaayo sa kalibotan, apan diha Kaniya. Sa dihang Siya nagsulti kanato sa paghigugma sa atong mga kaaway, Iyang gihatag, uban sa sugo, ang gugma mismo.”1
Anaa ang Dios aron sa pagtabang kanimo nga ikaw makatuman sa iyang mga sugo, lakip sa sugo sa pagpasaylo—bisan kon kini lisud. Siya makatabang kaninyo sama sa Iyang pagtabang ni Corrie ten Boom.
Ang Pagkaayo nga Angay Kaninyo
Ang kinabuhi makalipat kaayo. Samok kini. Ug kini puno gayod sa mga tawo nga adunay kabubut-on nga hinatag sa Dios.
Atol niadtong mga panahon dihang adunay tawo nga naghimo og usa ka pagpili nga nakapahamtang kanimo og grabing kasakit—o bisan sa aksidente lang nga nakabuhat sa ingon—kamo makadawat og gahom sa pagkaayo samtang kamo mag-ampo alang sa tabang ug maningkamot nga makapasaylo.
Ang pagpasaylo sa uban magdala og pagkaayo sa inyong kalag. Uban sa tabang sa Dios, samtang kamo mopasaylo niadtong nakabuhat kaninyo og sayop, inyong gibuhian ang usa ka bug-at nga palas-anon gikan sa inyong mga abaga nga mahimo nga nagpugong kaninyo. Bisan kon ang dalan ngadto sa tinuod nga pagkaayo lisud nga bation, uban sa Dios, kamo dili gayud kinahanglan nga mag-inusara niini.