“Sa Melbourne, Australia,” Alang sa Kalig-on sa mga Kabatan-onan, Hunyo. 2021, 12–13.
Giunsa Namo Pagsimba
Sa Melbourne, Australia
Mga litrato sa maayong kabubut-on ni Benjamin H.
Komosta! Ako si Benjamin H. Ako 18 anyos, ug gikan ako sa Glen Iris, usa ka komunidad sa Melbourne, Australia. Ang Melbourne mao ang kapital sa Victoria ug ginganlan nga “ang labing nindot nga siyudad nga puy-an sa kalibotan.” Kami adunay daghang dili matag-an nga panahon sa Melbourne ug posible nga makasinati kamo sa tanang upat ka matang sa panahon sa usa lamang ka adlaw!
Kinabuhi sa Melbourne
Nagpuyo ako uban sa akong mama, sa akong papa, ug sa akong upat ka manghod. Mibalhin kami sa dapit sa Melbourne alang sa trabaho sa akong papa.
Sa pagkatinuod nagtambong ko sa usa ka relihiyoso nga eskwelahan, ug nagsul-ob kami og mga uniporme—tapol nga mga dyaket [blazer] ug itom nga karsones nga giparisan og polo ug korbata. Bisan kon kini usa ka relihiyoso nga eskwelahan, dili kaayo daghan ang mga tawo kinsa mituo, ug ang mga tawo nga relihiyoso dili gayod mopakita niini. Ganahan ko sa tanang misyonaryo nga mga kahigayonan nga akong makuha tungod kay ako lamang ang bugtong nga miyembro sa Ang Simbahan ni Jesukristo sa mga Santos sa Ulahing mga Adlaw sa akong eskwelahan.
Ang akong wallpaper sa cell phone usa ka hulagway ni Jesus tungod kay sa daghang higayon ang mga tawo makakita kanimo nga moabli sa imong cell phone ug makakita sila niini ug mangutana mahitungod niini. Kini usa ka nindot kaayo nga paagi nga makasugod og panag-istoryahanay kabahin sa ebanghelyo! Ako usab adunay pulseras nga nag-ingon, “Ako Anak sa Dios.” Pirme gayod nako kining gisul-ob hinungdan nga aduna na akoy lakra sa puti nga linya sa akong panit [tan line] tungod niini, apan mihukom lamang ko nga magpadayon sa pagsul-ob niini tungod kay ang mga tawo kanunayng mangutana kanako kabahin niini. Sa daghang higayon mangutana sila kon pwede ba silang mahimo nga anak sa Dios. Sultihan lamang nako sila nga sila anak gayod sa Dios!
Mga Paugnat sa Kusog [Sports]
Ang pagdula og basketball maayo gayod ug nakatabang kanako nga makabaton og mga higala. Adunay usa ka parke tupad sa among balay ug nakahatag kini kanako og dugang kadasig nga mogawas ug moitsa, aron mahimong maayo gayod sa basketball. Nagdula kami alang sa eskwelahan, ug maayo kaayo ko nga midula batok sa usa ka team. Duha ka adlaw ang milabay nahibaloan nako nga mihatag sila kanako og posisyon sa team sa labing maayong mga magdudula sa estado [all-state team], nga mahinungdanon gayod kaayo. Mihimo kami og pipila ka pagsiksik ug nakaamgo nga modula sila og ma-Dominggo, ug mao nga wala gayod nako gikonsiderar ang pagdula didto pagkahuman niana.
Simbahan
Kami wala kaayoy daghang kabatan-onan sa among ward. Kon iphon ang young men kay ako ra, laing duha ka priest, ug mga lima ka deacon. Ang among mga lider ganahan nga modala kanamo matag bulan aron sa pagbisita ug paghimamat sa kabatan-onan nga wala na motambong ug modapit kanila sa mga kalihokan sa kabatan-onan. Nindot lang kaayo nga makakita kon unsa ka dako ang pagpakabana sa mga lider bahin sa uban.
Ang among ward nakatutok gayod sa mga tumong tungod sa bag-o nga programa sa Kabataan ug Kabatan-onan. Kami adunay usa ka gitipon nga kalihokan sa kabatan-onan nga naglakip sa tanang upat ka bahin [area]! Ang matag bahin adunay lahi nga kalihokan nga nakalakip. Ako ang nangulo sa pagtutok sa pisikal nga tumong nga kalihokan, busa nagdula kami og volleyball.
Naningkamot gayod kami sa paghatag og gibug-aton nianang upat ka bahin sa among mga kinabuhi. Nakatabang usab kini kanako nga makaamgo kon unsa ka importante ang paghimo og tumong. Kon walay mga tumong, lisod nga makita nga kamo naglambo sa inyong kinabuhi.
Nagtuo ko nga importante kini alang sa mga tawo sa Simbahan nga makasabot kon unsa ka nindot nga makabaton sa kahibalo nga ania kanato, sama sa plano sa kaluwasan.