“Naglisod ko sa pakigsabot sa akong mga ginikanan. Unsaon nako sa pagpalambo sa among relasyon?” Alang sa Kalig-on sa mga Kabatan-onan, Hunyo 2021, 30–31.
Mga Pangutana ug Mga Tubag
“Naglisod ko sa pakigsabot sa akong mga ginikanan. Unsaon nako sa pagpalambo sa among relasyon?”
Pagsugod sa Gagmay ug Yano
“Ipahayag ang inyong gugma ngadto kanila pinaagi sa mga buhat. Pag-ampo og dungan atol sa mga tingkaon. Tabangi sila sa mga buluhaton sa balay. Pag-ampo alang kanila. Ang atong mga ginikanan kanunay nga atong mga ginikanan, ug kita kanunay nga ilang mga anak. Pagkat-on sa pagtahod kanila ug pagmasulundon. Dili pa gayod ulahi ang pagpalambo sa inyong relasyon kanila.”
Nikki F., 20, Mindanao, Pilipinas
Magmabination
“Sulayi sa paghibalo kon unsay ganahan sa inyong mga ginikanan. Usa ka butang nga kanunayng epektibo alang kanako mao ang pagpasiugda og gabii nga dula sa pamilya [family game night]. Kon maningkamot kamo nga mahimong mas mabination, ug mas kanunayng maminaw, makaayo kamo og mga relasyon.”
William S., 12, Virginia, USA
Magkaubang Mosulay og Bag-ong mga Butang
“Mosulay ko nga hibaloon ang mga butang nga komon kanako ug sa akong mga ginikanan, sama sa musika, mga paugnat sa kusog [sports], o pagluto, ug dayon mangita og mga kahigayonan sa pagbuhat niana nga mga butang nga magkauban. Makalingaw usab nga mosulay sa mga kalingawan ug mga interes sa usag usa.”
Eve D., 16, Wales, United Kingdom
Paminaw
“Usa ka butang nga mahimo ninyong buhaton mao ang pagpaminaw sa tambag sa inyong mga ginikanan ug pagsunod sa ilang mga lagda. Usahay maghunahuna kita nga husto kita, apan ang tambag sa atong mga ginikanan mahimong makaayo sa kataposan. Kini usa usab sa Napulo ka Sugo nga “tahora ang inyong amahan ug inahan” (Exodo 20:12). Mas maduol kita sa atong Langitnong Amahan ug sa atong mga ginikanan pinaagi sa pagsunod niini nga sugo.”
Seth S., 14, Oregon, USA
Pamilya nga Pagtuon sa Kasulatan
“Kini mahimo nga mapalambo pinaagi sa yano nga mga butang sama sa mga pag-ampo sa pamilya ug sa pagtuon og dungan sa Dali, Sunod Kanako. Kini mohimo kaninyo nga mas magkahiusa ug mabati ninyo ang pakig-uban sa Espiritu. Samtang magkat-on kamo og dungan, ang mga relasyon sa pamilya mapalig-on. Makaangkon kamo og pagpamatuod nga ang mga pamilya mahangtoron ug importante.”
Fátima S., 16, Piura, Peru
Lihok gumikan sa Gugma
“Dili gayod bati nga ideya ang pagbuhat og pipila ka buluhaton sa balay nga wala sila nagsulti kaninyo sa pagbuhat niana. Kon adunay usa ka butang nga nasagmuyo ang inyong mga ginikanan, sama sa paggahin og sobra nga panahon sa elektronik nga himan. Pahibaloa sila nga nagpakabana kamo sa ilang opinyon pinaagi sa pagsulay sa paglimita sa panahon sa paggamit sa himan. Ipakita sa ilaha nga nagpakabana kamo pinaagi sa paggahin og panahon uban kanila. Ang inyong mga ginikanan mas mosalig kaninyo ug mas monindot ang inyong relasyon ngadto kanila.”
Justice C., 18, Utah, USA