“Fakafehokotakí,” Ki Hono Fakamālohia ʻo e Toʻu Tupú, Siulai 2021, takafi muʻa ki lotó.
Fakafehokotakí
Orin S.
17, British Columbia, Canada
Laʻitā meia Christina Smith
Naʻe folau tahi hoku fāmilí pea naʻe ʻikai ke mau mamata ki ha fonua ʻo laka hake ʻi ha uike ʻe tolu. Hili ʻa e fuofua uike ʻe uá, ne tō mai ha matangi mālohi. Ne motu ʻemau laá ʻi he havilí, pea faʻaki mai e ngaahi peaú ki he funga vaká, ʻo ngoto ʻaupito ʻa e konga ki muʻa ʻo e vaká. ʻIkai ngata aí, ka ne mei ʻosi ʻemau vai inú—ʻa ia kapau te mau matuʻuaki e afaá, te mau kei hohaʻa pē pe ʻe ʻi ai koaa haʻamau vai inu.
Naʻe fakaʻefihi hifo homau fāmilí ki he konga ʻo e vaká ne mōmoá pea mau lotu ʻi ha meimei houa ʻe taha. Naʻe ʻikai ke u ʻiloʻi pe te mau lavaʻi ʻa e pō ko iá, ka naʻá ku ʻiloʻi, neongo pe ko e hā e meʻa ʻe hokó, te u kei fakataha pē mo hoku fāmilí koeʻuhí kuo silaʻi fakataha kimautolu.
ʻI he ʻosi ʻemau lotú, ne mau fakatokangaʻi kuo malū hifo ʻa e havilí pea tuʻu ʻa e ngaahi peaú. Hili iá, naʻe kamata ke ʻuha lōvai, ʻa ia ʻoku matuʻaki hāhāmolofia ke ʻuha ʻi he potu tahi ko iá. Ne mau fakaʻaongaʻi ha tapoleni ke fakafonu ʻemau ʻū tangikē vaí, pea ko ha mana ia e maʻu ha vai feʻunga ke fakaʻosi ʻaki ʻa e fonongá.
Naʻe fakahā mai ʻe he aʻusia ko iá ʻa e mālohi ʻoku lava ke fakahoko ʻe he lotú pea mo e lahi ʻo e ʻofa ʻa e Tamai Hēvaní kiate kitautolú. ʻI heʻeku fakakaukau ki he matangi ko iá, ʻoku ou ʻiloʻi moʻoni ʻa hono moʻoni ʻo e ongoongoleleí.