“Ko Hono Tauhi ʻEtau Ngaahi Palōmesí,” Ki Hono Fakamālohia ʻo e Toʻu Tupú, Siulai 2021, 32.
Lea Fakaʻosí
Ko Hono Tauhi ʻEtau Ngaahi Palōmesí
ʻŪ tā ʻa Emily Davis
ʻI ha efiafi ʻe taha ʻi heʻeku kei talavoú, ne u tangutu mo ʻeku faʻeé ʻi mui ʻi hono funga mohengá pea talanoa fakamātoato ki he mahuʻinga hono moʻui ʻaki e Lea ʻo e Potó. Naʻá ne sio hangatonu mai kiate au peá u ongoʻi ʻa e tō mamafa ʻo ʻene ngaahi leá ki hoku lotó: “Palōmesi mai kiate au he ʻahó ni, Loni, te ke moʻui ʻaki maʻu pē ʻa e Lea ʻo e Potó.” Naʻá ku fakahoko molumalu e palōmesi ko iá kiate ia, pea kuó u tauhi pau ia ʻi he ngaahi taʻu kotoa ko ʻení.
Naʻá ku tomuʻa fai foki ha fili mahuʻinga ke muimui ki he ngaahi fono ʻa e ʻOtuá, pea kuo teʻeki fie maʻu ke u toe fakahoko ia. Kuo folofola ʻe he ʻEikí, “Ko au, ko e ʻEikí, ʻoku ou haʻisia, ʻo ka mou ka fai ʻa e meʻa ʻoku ou lea ʻakí; ka ʻo ka ʻikai te mou fai ʻa ia ʻoku ou lea ʻakí, ʻoku ʻikai hamou talaʻofa” (Tokāteline mo e Ngaahi Fuakava 82:10).
ʻI heʻeku hoko ko ha ʻAposetolo ʻo e ʻEiki ko Sīsū Kalaisí, ʻoku ou fakaafeʻi kimoutolu ke mou fakakaukau ki he ngaahi palōmesi mo e ngaahi fuakava ʻoku mou fai mo e ʻEikí, pea mo e niʻihi kehé, ʻi he faitotonu lahi, ʻo ʻiloʻi ʻoku mou haʻisia ki hoʻomou palōmesí. ʻOku ou palōmesi atu ʻi homou fai ʻení, ʻe fokotuʻu maʻu ʻe he ʻEikí homou leá mo tāpuekina homou ngaahi ngāué ʻi homou faifeinga ʻi he faivelenga lahi ke langaki homou moʻuí, mo homou fāmilí, pea mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Te Ne ʻiate kimoutolu, pea te mou lava, ʻi he loto-falala ʻo fakatuʻamelie ki hono “maʻu hake ʻa [kimoutolu] ki he langí koeʻuhi ke [mou] nofo mo e ʻOtuá [ha] tuʻunga fiefia ʻoku ʻikai hano ngataʻanga” (Mōsaia 2:41).