Founga ʻo ʻEmau Moihuú

ʻI Seni Tieko, USA

ʻŪ Tā mei he Getty Images

Mālō e lelei! Ko hoku hingoá ko Seisi B. ʻOku ou taʻu 14, pea ʻoku ou nofo ʻi Seni Tieko. ʻOku tuʻu ʻa Seni Tieko ʻi he tuliki fakatonga ʻo e siteiti ʻo Kalifōnia, USA. ʻOku kehekehe ʻaupito ʻa e funga ʻo e fonuá. ʻOku ʻi Seni Tieko ha ngaahi taulanga, potu tokalelei mo ha ngaahi lilifa, teleʻa, ngaahi potu maomaonganoa, mo ha ngaahi tafungofunga. ʻOku faʻa māfana e ʻeá mo laʻalaʻā ʻi he taʻú kotoa.

Feʻiloaki mo Hoku Fāmilí

ʻOku ou nofo mo hoku fāmilí ʻi he ngahi ʻotu moʻunga ʻo Seni Tiekó. ʻOku ou nofo mo ʻeku faʻeé; ko hoku tuofefine taʻu 10, Peisilī; mo ʻeku abuelito mo e abuelita (kui tangatá mo e kui fefiné). ʻOku mau nofo ʻi ha faama ʻoku lahi ai e fanga monumanú. ʻOku mau feinga ke moʻui ʻi ha tuʻunga moʻui faingofua mo fakakuonga muʻa.

Fakahoko e Sākalamēnití ke Makehe

Lolotonga e kolonitini COVID-19, naʻe fakaʻau ke mau fuʻu faʻifaʻiteliha ʻi ʻapi ʻi he ʻaho Sāpaté, ʻo mau tui vala noaʻia pē ʻo tangutu ʻi heʻemau sea lotofalé. Naʻá ku fie fakahoko ha meʻa ke makehe ʻa e Sāpaté. Naʻá ku fili leva ke faʻu ha laulau sākalamēniti maʻa hoku fāmilí pē, ko ha taha ʻo ʻeku ngaahi taumuʻa fakalaumālie ki he polokalama foʻou ʻa e Fānaú mo e Toʻu Tupú.

ʻUluakí, ne u toʻo ha konga papa pea vili ha ngaahi foʻi ava ʻi he konga ʻe tahá ke hili ai e fanga kiʻi ipú. Ne u tongi leva ʻi he tafaʻaki ʻe tahá ha laulau maʻá e maá. Naʻe tokoniʻi au ʻe heʻeku kui fefiné ke sanipepaʻi ia kae ʻoua kuo molemole ʻaupito. Naʻá ma fakapipiki leva ha meʻa ke puke ʻaki pea fakapipiki ʻa e papá.

ʻI he Sāpate ʻuluakí, naʻa mau teuteuʻi ʻa e sākalamēnití pea naʻe ʻikai ke maʻu ha ngaahi ipu ʻe hao ki he ngaahi foʻi ava ʻi he laulaú. Ne laulau houa ʻemau fakasio ha ipú. Hili ha taimi siʻi, naʻá ku pehē leva, te mau kei maʻu pē ʻa e sākalamēnití ʻaki ha ipu pe ʻikai. Naʻe ʻikai ke mau tuku ke taʻofi ʻe he meʻá ni ʻemau tauhi e ʻaho Sāpaté ke māʻoniʻoní.

Naʻa mau maʻu ʻa e sākalamēnití ʻi he Sāpate ko iá, pea naʻe lōngonoa, taumuʻa lelei, pea molumalu ange. Naʻá ku ongoʻi fiefia ʻi he taumuʻa naʻá ku fokotuʻu mo lavaʻí. ʻOku ou ʻiloʻi pea ongoʻi naʻe polepole ʻa e Tamai Hēvaní ʻiate au ʻi he taumuʻa mo e ngaahi fili naʻá ku fakahokó.

• ʻOku tupu ʻi Seni Tieko ʻa e ʻakau hāhāmolofia ko ia ko e paini Tōlieí (Torrey pine).

  

• ʻOku tupu ʻa e ʻāvoká ʻi Seni Tieko ʻo lahi ange ʻi ha toe feituʻu ʻi USA.

• ʻOku ui ʻaki ʻa Kalifōnia ʻa e “Vahefonua Koulá.”

• Ko e Temipale San Diego California ʻa e temipale hono 45 ne fakatāpuí.

  

• ʻOku ʻi ai ha misiona ʻe taha ʻi Seni Tieko, pea ʻoku aʻu hifo ia ki he kauʻāfonua ʻo Mekisikoú.

• ʻOku tuʻu ʻi Seni Tieko ʻa e Feituʻu Fakahisitōlia ʻa e Siasí ki he Patalione Māmongá.

  

Fakamatalaʻi Mai e Founga Homou Moihuú

Te mau fiefia ke fanongo ki he founga homou moihuú he feitu‘u ʻokú ke nofo aí. ‘Omi kiate kimautolu ha fakamatala nounou ki homou feitu‘ú, meʻa ʻokú ke fai ‘i he ʻaho Sāpaté, ngaahi ʻekitivitī ‘okú ke saiʻia taha aí, mo ha me‘a pē te ke lava ʻo fakakaukau ki ai. ʻAve ia ki he [e-mail].