“Fiefia ʻa Kōseí,” Ki Hono Fakamālohia ʻo e Toʻu Tupú, Siulai 2021, 12–15.
Fiefia ʻa Kōseí
ʻOku manako ʻa e talavou ko ʻeni mei Siapaní ʻi hono vahevahe ʻo e ongoongoleleí.
Laʻitā mei he Getty Images
ʻOkú ne tā ʻa e pianó. ʻOkú ne lele oma. ʻOkú ne puna lōloa foki! Ka ʻoku ʻikai ko e ngaahi meʻa fakaofo pē ia fekauʻaki mo e talavou taʻu 17 mei Nakasaki, Siapani, ko Kōsei H.
ʻOku pehē ʻe Sisitā Makena Feleisa, ko ha faifekau toki ʻosi mai, naʻe ngāue ʻi Siapani ʻi he feituʻu ne nofo ai ʻa Kōseí, “Ko e taha ia ʻo e faifekau toʻu tupu lelei taha kuó u fetaulaki mo ia.” Naʻá ne pehē, “Naʻe teʻeki sītuʻa ʻa Kōsei mei ha faingamālie ke ngāue fakataha ai mo e kau faifekaú pe fakamoʻoni kia Kalaisi ʻo fakafou ʻi he ngaahi ʻekitivitī ʻa e Siasí mo e mītia fakasōsialé.”
Naʻe lau ʻe Kōsei ʻa e kau faifekaú ko ha niʻihi ʻo hono ngaahi kaungāmeʻa mamaé. Pea ʻoku ʻikai ha ofo ʻi heʻene ongoʻi peheé ʻi he taimi te ke ʻiloʻi ai ʻa ʻene fiefia lahi ʻi hono vahevahe ʻo e ongoongoleleí.
ʻOku pehē ʻe Kōsei, “Ko hoku fiefiaʻangá ʻa e ngāue Fakafaifekaú.” “Naʻe akoʻi mai ʻe Nīfai, ko e fua ʻo e ʻakau ʻo e moʻuí ko e ‘lelei taha ia ʻi he ngaahi meʻa kotoa pē’ (1 Nīfai 11:22). ʻOku fakaʻikaiʻi ʻe he kakai ʻe niʻihi ʻa e fua ko ʻení. Ka neongo ia, koeʻuhi ko ʻeku ʻiloʻi ʻa e melie ʻo e fuá, ʻoku ou loto ai ke vahevahe ʻa e ongoongoleleí mo kinautolu ʻoku mau feohí.”
Mahalo ko e talēniti lelei taha ʻa Kōseí ʻa hono vahevahe ʻo e ngaahi tāpuaki ʻo e ongoongoleleí.
Ola Lelei ʻo e Mītia Fakasōsialé
Hili e kau atu ʻa Kōsei ki he kalasi teuteu ngāue fakafaifekaú, naʻá ne ongoʻi ha holi lahi ange ke ʻomi ʻa e ngaahi fiefia ʻi he ongoongoleleí ki hono ngaahi kaungāmeʻá. Naʻá ne kamata ʻaki ʻene hū ki he ʻinitanetí. Ko e taha ʻo e ngaahi tefitoʻi meʻa ngāue naʻá ne ngāue ʻaki ki hono vahevahe ʻo e ngaahi pōpoaki fekauʻaki mo e ongoongoleleí mo hono ngaahi fakamatalá, ko e mītia fakasōsialé.
Naʻe tali ʻe ha niʻihi ʻo hono ngaahi kaungāmeʻá ʻa e ngaahi post ko ʻeni ʻi he mītia fakasōsialé. Naʻe fakaofi mai ha kaungāmeʻa ʻe taha kia Kōsei ʻo pehē, “ʻOku ou fieʻilo ki homou siasí.”
Ko e kaungāmeʻa ko ʻení ko ha maheni pē, ka naʻe vave ʻa e vāofi ange hona vā fakakaungāmeʻá. Naʻe fakamatalaʻi ʻe Kōsei, “Naʻá ne kamata ʻaki ʻene ʻeke mai kiate au ʻa e ngaahi faikehekehe ʻi heʻeku tuí mo ʻene tuí.” Neongo naʻe teʻeki ke u faʻa talanoa mo ia, ka ne ma hoko ko ha ongo kaungāmeʻa lelei hili ʻeku vahevahe ʻa e ongoongoleleí ʻi he mītia fakasōsialé.”
Sipotí, Ngaahi Manakó, mo e Feohi Fakakaungāmeʻa Taʻengatá
ʻOku ʻikai ko e mītia fakasōsialé pē ʻoku vahevahe ai ʻe Kōsei ʻene tuí. Manatuʻi, ʻoku femoʻuekina ʻene moʻuí ʻi ha ngaahi ʻekitivitī lahi. ʻOku lahi hono ngaahi faingamālie ke feʻiloaki ai mo ha kakai mo feohi fakakaungamēʻa. Pea ʻokú ne fakaʻaongaʻi ʻa e ngaahi faingamālie ko iá ke vahevahe ai ʻa e fiefia ʻi he ongoongoleleí.
Naʻe fakamatalaʻi ʻe Kōsei, “Naʻá ku fakaafeʻi ha kaungāmeʻa ʻokú ma feohi ʻi he sipotí, ki ha kalasi lea faka-Pilitānia naʻe akoʻi ʻe he kau faifekaú ʻi ʻapi siasi.” “Naʻá ne kaungāmeʻa lelei mo e kau faifekaú lolotonga ʻene ako lea faka-Pilitāniá.”
Ka neongo ia, naʻe ʻikai ngata ʻa e ngaahi fetalanoaʻakí ʻi he ngaahi lēsoni lea faka-Pilitāniá.
“Naʻe kamata ke fakakaukau hoku kaungāmeʻá pe ko e hā e ʻuhinga ʻoku fakahoko ai ʻe he kau faifekau ko ʻení ʻa e ngāue taʻetotongi mo hoko ko ha kau faifekau ʻi Siapani, neongo ʻoku nau meimei taʻu tatau pē. Ko ʻene fehuʻi hokó ke ʻeke pe ko e hā naʻá ne ueʻi e kau faifekau ko ʻení ke nau ʻalu ʻo ngāué. Kuó ne fanongoa he taimí ni ʻa e ngaahi lēsoni fakafaifekaú pea ʻoku kei fetuʻutaki pē mo e kau faifekaú ʻi he talanoa vitioó (video chat).”
Ko e taimi pē ʻoku ʻohake ai ʻe Kōsei ʻa e ongoongoleleí ki hono ngaahi kaungāmeʻá, ʻokú ne feinga ke fakahoa e meʻa ʻokú ne vahevahé mo e tuʻunga ʻo ʻenau tokangá. ʻOkú ne pehē, “Hangē ko ʻení, ʻoku ou ʻuluaki talanoa fekauʻaki mo e meʻa ʻoku hoko hili ʻa e maté, ko e hā ʻa e taumuʻa ʻo e moʻuí, pe ʻoku ʻi ai nai ha ʻOtua pe ʻikai. Pea te u lava leva ʻo fulihi makatuʻunga ʻi he meʻa ʻoku nau tokanga ki aí.”
Ko e moʻoni, ʻokú ne ʻiloʻi ʻe ʻikai tokanga ange ʻa e tokotaha kotoa pē. Kuo fakaholomui ha ngaahi meʻa, ʻo tatau mo ha tokotaha pē. ʻI ha ʻaho ʻe taha, hili hano fehuʻia ʻe ha taha ʻo e ngaahi kaungāmeʻa ʻo Kōseí kiate ia fekauʻaki mo e Siasí, naʻá ne feinga ke vahevahe ha pepa tufa ʻa e Siasí mo ha taha ʻo kinautolu. Naʻe pehē ʻe Kōsei, “Neongo ia, naʻe lele ʻa e kaungāmeʻa ko iá ki tuʻa peá ne kataʻi leʻo lahi au mei he holo ʻi he tuʻa loki akó.
Naʻe tupu ai haʻaku mamahi lahi.”
Ka ʻoku ʻikai ke ne tuku ke taʻofi ia ʻe he fakalotofoʻí. ʻOkú ne ʻiloʻi ko e meʻa ʻokú ne vahevahé, te ne tāpuekina ʻenau ngaahi moʻuí ʻo taʻengata ʻo kapau te nau fakafanongo.
Ko e Fiefia ʻOkú ne Ueʻi Iá
ʻOku pehē ʻe Kōsei, “ʻOku ou ongoʻi fiefia ʻi he ngaahi akonaki ʻa Kalaisí. Kapau ne ʻikai ke u ʻilo ʻa e ngaahi akonaki ko iá, te u maʻu ha moʻui ʻoku ʻikai ha fiefia moʻoni ai.”
ʻI he feinga ʻa Kōsei ke fakakakato ʻene ngaahi ʻekitivitií mo ʻene ngaahi manakó, ʻokú ne ʻiloʻi e ngaahi meʻa ke fakamuʻomuʻá. ʻOkú ne pehē, “ʻOku ʻomi ʻe he ongoongolelei ʻo Sīsū Kalaisí ʻa e ʻamanaki lelei ki heʻetau moʻuí mo fakahā ʻa e ngaahi meʻa kotoa pē ʻoku totonu ke tau fakahokó. Naʻa mo e taimi ʻoku tau loto-hohaʻa pe foua ai ha faingataʻá, ʻe ʻomi ʻe he lotu fakamaatoató ʻa e nongá mo tokoniʻi kitautolu ke tau maʻu ha ʻulungaanga lelei.”
Ko e ʻuhinga ia ʻokú ne fakapapauʻi ai ke vahevahe ʻa e ongoongoleleí ʻi he faingamālie kotoa pē te ne maʻú. ʻOkú ne loto ke aʻusia ʻe he niʻihi kehé ʻa e meʻa ʻokú ne fiefia fakaʻaho aí! ʻOkú ne pehē, “ʻOku ou ʻamanaki mei he kotoa hoku lotó, ʻe ala maʻu ʻe he kakai tokolahi ʻa e faingamālie ke aʻusia ʻa e fiefia moʻoni ko ʻení.”
Meʻa ʻOku Mahuʻinga Tahá
Ko hono moʻoní, ʻoku ʻikai toʻo ʻe hono vahevahe ʻo e ongoongoleleí ʻa e kotoa ʻo hono taimí. ʻOku ngāue malohi ʻaupito ʻa Kōsei ʻi heʻene ngaahi taumuʻa kehe ʻi he moʻuí. ʻI he ʻaho takitaha, ʻokú ne fakamālohisino lahi ʻi he lelé mo e ngaahi fakamālohisino fakaiví. Ko e taimi ʻokú ne fie mālōlō aí, ʻokú ne tā ʻa e pianó. ʻOkú ne fiefia foki ʻi he ʻaʻahi ki natula mo feohi fakataha mo hono fāmilí. ʻOkú ne pehē, “ʻI heʻeku ʻi tuʻa mo e fānau ʻi hoku kiʻi fāmilí—he ʻikai toe ngalo ʻiate au ʻa e ʻaho ne mau maʻu ai ha ika pea mau kaí.”
Ko hono fakakātoá, ʻoku hokohoko atu hono tuku ʻe Kōsei ha taimi ki he ngaahi meʻa mahuʻinga tahá.
Pea ʻoku ʻi ai ʻene kiʻi faleʻi ki ha tokotaha pē ʻoku loto ke fakahoko e meʻa tatau: “ʻOku tau maʻu e fakahinohinó ʻi he taimi ʻoku tau tauhi ai ʻa e ngaahi fekaú. ʻI heʻetau fai iá, ʻe lava ke fakamālohia kitautolu ʻe he ʻEikí. ʻOku fetongi ʻa e ilifiá mo e tailiilí ʻe he ʻamanaki leleí mo e loto-falalá. Kapau te tau fakaava hotau ngutú ʻo ʻikai maaʻi e ongoongoleleí, ʻe ʻiloʻi ʻe he kakaí ʻa e ʻofa faka-Kalaisí pea fakafonu kinautolu ʻaki ʻa e fiefia.”