“ʻUhinga ʻOku Totonu Ai ke Ke Fiefiá,” Ki hono Fakamālohia ʻo e Toʻu Tupú, Siulai 2021, 6.
Haʻu, ʻo Muimui ʻIate Au
ʻUhinga ʻOku Totonu Ai ke Ke Fiefiá
Fiefia koe! Kuo foaki atu ʻe he ʻEikí ʻa e ngaahi ʻuhingá kiate koe.
Kuo foaki mai ʻe he ʻEikí ha ngaahi fakaafe lahi kiate kitautolu. Pea ʻokú Ne faʻa toutou foaki mai ʻa e ngaahi meʻa mahuʻingá. (Hangē ko ʻení, naʻe tuʻo fiha nai ʻEne folofola ʻaki ha meʻa hangē ko e “Haʻu kiate au”?)
Ko e fakaafe ʻe taha te ke fakatokangaʻi ʻoku toutou ngāue ʻaki ʻi he folofolá ko e: “Ke ke fiefia.”
ʻOku folofola ʻaki ʻeni ʻe he ʻEikí ʻi he taimi ʻoku feinga ai ha niʻihi ʻo Hono kakaí ke muimui ʻiate Ia ka ʻoku nau fehangahangai mo e fakafepakí mo e ngaahi faingataʻá. Pea ʻi he taimi ʻokú Ne fakaafeʻi ai kitautolu ke tau fiefiá, ʻokú Ne faʻa ʻomi ʻa e ngaahi ʻuhinga ki Heʻene poupouʻi kitautolu ke fiefiá. Hangē ko ʻení, naʻá Ne folofola:
“Ke mou fiefia, he te u tataki atu ʻa kimoutolu. ʻOku ʻamoutolu ʻa e puleʻangá pea ʻoku ʻamoutolu ʻa hono ngaahi tāpuakí, pea ʻoku ʻamoutolu ʻa e ngaahi koloa ʻo e taʻengatá” (Tokāteline mo e Ngaahi Fuakava 78:18
Tau veteki ange ia:
“Ke mou fiefia, he [ʻUhinga 1] te u tataki atu ʻa kimoutolu. [ʻUhinga 2] ʻOku ʻamoutolu ʻa e puleʻangá pea [ʻUhinga 2a] ʻoku ʻamoutolu ʻa hono ngaahi tāpuakí, pea [ʻUhinga 3] ʻoku ʻamoutolu ʻa e ngaahi koloa ʻo e taʻengatá” (Tokāteline mo e Ngaahi Fuakava 78:18).
ʻOku fakamanatu mai heni ʻe he ʻEikí ʻa ʻEne fakahinohinó mo e ngaahi tāpuakí. Ko ha ngaahi ʻuhinga lelei moʻoni ia ke tau fiefia ai.
Ko ha sīpinga ʻeni ʻe taha:
“Mou fiefia, ʻe fānau iiki; he [ʻUhinga 1] ʻoku ou ʻi homou lotolotongá, pea [ʻUhinga 2] kuo ʻikai te u liʻaki ʻa kimoutolu” (Tokāteline mo e Ngaahi Fuakava 61:36).
Pea mo e taha:
“Ke mou fiefia, pea ʻoua ʻe manavahē, he [ʻUhinga 1] ko au ko e ʻEikí ʻoku ou ʻiate kimoutolu, pea [ʻUhinga 2] te u tuʻu ʻi homou tafaʻakí” (Tokāteline mo e Ngaahi Fekau 68:6).
ʻOku fakamanatu mai ʻe he ʻEikí ʻokú Ne ofi mai kiate kitautolu pea te Ne tokoni mai ʻi heʻetau feinga ke muimui kiate Ia mo fakahoko ʻEne ngāué. Te tau lava leva ʻo hokohoko atu ʻi he loto-falala, ʻio, pea ʻi he loto-fiefia. Ko hono moʻoní, ko e palani ʻa e Tamai Hēvaní ʻa e “palani ʻo e fiefiá” ( ʻAlamā 42:8, 16), pea ko e muimui ki he ngaahi fekau ʻa e ʻEikí, ʻoku ʻuhinga ia ke moʻui “ʻi he fiefia” (2 Nīfai 5:27).
Neongo kapau ʻoku kamata ke tau hōloa koeʻuhi ko hotau ngaahi faingataʻaʻiá, kapau te tau holi ke muimui ki he ʻEikí, ʻokú Ne poupouʻi kitautolu ke tau fiefia. Pea ʻokú Ne ʻomi ha ngaahi ʻuhinga lelei ki ai.